Ambasaderi Rwamucyo yatanze impapuro zo guhagararira u Rwanda mu Buyapani

Yanditswe na Ferdinand Maniraguha
Kuya 24 Kamena 2020 saa 04:33
Yasuwe :
0 0

Ambasaderi w’u Rwanda mu Buyapani, Ernest Rwamucyo yatanze impapuro zimwemerera guhagararira u Rwanda muri icyo gihugu.

Umuhango wo gushyikiriza izo mpapuro Umwami w’Abami w’u Buyapani, Naruhito wabaye kuri uyu wa Gatatu tariki 24 Kamena 2020 mu Ngoro y’Ibwami.

Ambasaderi Rwamucyo yagejeje ku Mwami w’Abami Naruhito intashyo za Perezida Paul Kagame amwifuriza ubuzima bwiza n’ibyishimo. Yanamugejejeho kandi icyifuzo cya Guverinoma y’u Rwanda mu gukomeza umubano mwiza urangwa hagati y’ibihugu byombi.

Umwami w’Abami Naruhito yifurije ubuzima bwiza n’iterambere Perezida Kagame n’Abanyarwanda, anamushimira ubuyobozi bwe bwiza.

Yifurije kandi Ambasaderi Rwamucyo imirimo myiza, amusaba gukomeza guteza imbere umubano mwiza uri hagati y’ibihugu byombi.

Umwami w’Abami kandi yashimye iterambere u Rwanda rwagezeho nyuma ya Jenoside yakorewe Abatutsi mu 1994.

Ambasaderi Rwamucyo yagaragaje ibyo u Rwanda rwagezeho nyuma ya Jenoside yakorewe Abatutsi, ubu kikaba ari igihugu gitekanye kandi cyunze ubumwe.

Yavuze ko ubu ari kimwe mu bihugu bifite ubukungu buzamuka ku kigero cyo hejuru, aboneraho gushima uruhare rw’u Buyapani muri iryo terambere.

Yagaragaje kandi uburyo ari igihugu cyateje imbere ubukerarugendo by’umwihariko cyizwi ku ngagi zo mu misozi, aboneraho gutumira umwami w’abami kuzaza gusura u Rwanda nabona umwanya.

Ambasaderi Rwamucyo yagaragaje ko Abanyarwanda bashimira u Buyapani ku ruhare rwabwo mu nzira y’iterambere n’imibereho myiza y’abaturage.

U Buyapani ni umuterankunga ukomeye w’u Rwanda, aho nibura guhera mu 2008 kugeza mu 2017, bwahaye u Rwanda inkunga igera hafi kuri miliyoni $350 binyuze muri JICA. Yashyizwe ahanini mu nzego zirimo iterambere ry’ibikorwa remezo bifasha mu bukungu, ubuhinzi, ikoranabuhanga, kongera ubushobozi bw’abakozi n’ibindi.

Mu bikorwa byabyawe n’ubwo bufatanye harimo abaturage 131 000 bagejejweho amazi meza mu Burasirazuba; ihangwa rya FabLab rimaze gutuma havuka ibigo bisaga 62; abakorerabushake 280 bagize uruhare mu bikorwa binyuranye mu Rwanda n’amashanyarazi yagejejwe ku baturage 195,000 inyubako 65 z’ubuyobozi n’ibigo nderabuzima icyenda.

Hubatswe kandi ibikorwa birimo umupaka uhuriweho wa Rusumo na kilometero 145 z’imihanda ihuza u Rwanda n’abaturanyi; Abanyarwanda 1165 bungukira ubumenyi mu Buyapani; hahugurwa abarimu 63 563 n’ibindi byinshi.

Ubwo Ambasaderi Rwamucyo yashyikirizaga Umwami w'Abami impapuro zo guhagararira u Rwanda mu Buyapani

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .