IGIHE

Umwarimu wabaye umunyamakuru! Ibyo wamenya kuri Jean Daniel Sindayigaya umaze imyaka 10 kuri Radiyo Rwanda

0 23-07-2020 - saa 12:03, Nsengiyumva Emmy

Jean Daniel Sindayigaya cyangwa JDS nk’uko akunda kwiyita, ni umunyamakuru wa Radiyo Rwanda umazeyo imyaka icumi, azwi cyane mu kuvuga amakuru mu Kinyarwanda nubwo bitamubuza kugira ibindi biganiro akora.

Usibye kuba wumva amakuru mu Kinyarwanda kuri Radiyo Rwanda, ijwi rya Sindayigaya ushobora kuba wararyumvise no mu bindi biganiro nka Makuruki mu binyamakuru akorana na Nyirarukundo Xavera na Twegerane akorana na Marcel Rutagarama.

Sindayigaya ni umugabo wubatse ufite umwana umwe w’imyaka irindwi. Iyo umubajije imyaka ye avuga ko ari hejuru ya 40.

Ni umunyamakuru wakuze adatekereza ko azavamo umunyamakuru w’icyitegererezo nk’uko biri, cyane ko no mu ishuri yize ubwarimu.

Sindayigaya warangije amashuri yisumbuye mu 1993, yatangiye kwigisha mu mashuri abanza kugeza mu 1998 ubwo yajyaga kwiga muri kaminuza.

Iby’itangazamakuru byamujemo agiye muri kaminuza

Yagize ati "Ubwo twageraga muri KIE cyane ko ndi mu bantu bafunguye ririya shuri, habayeho gutora ubuyobozi bw’abanyeshuri, icyo gihe rero bantoye nk’ushinzwe itangazamakuru no kumenyekanisha amakuru mu banyeshuri bagenzi banjye."

"Icyo gihe nakundaga cyane kumva radiyo, nari umuntu ukurikirana amakuru umunsi ku wundi, nguko uko ninjiye mu itangazamakuru ngize Imana riranampira."

Sindayigaya yinjiye mu itangazamakuru mu 2004 ubwo Flash Fm yatangiraga, amarayo amezi atatu akomereza kuri Contact Fm.

Ati "Sinzibagirwa amezi atatu ya mbere nakoze bampembye ibihumbi 15000 by’amafaranga y’u Rwanda, ibaze ko twari ikipe y’abantu umunani buri wese bamuha ayongayo.”

Kuri Contact Fm yahamaze imyaka itanu kuko yahakoze kugeza mu 2010, ubwo yerekezaga muri RBA agikoramo kugeza ubu. Azwi cyane mu bijyanye no gusoma amakuru ku maradio atandukanye.

Kumva ikinamico no gukunda gusoma ibitabo by’urwenya, biri mu byatumye amenya kuganira ndetse no kuzimiza bikunze kumufasha mu biganiro akora kuri radiyo.

Uyu mugabo avuga kandi ko yari umukinnyi mwiza wa Volleyball kuva yiga mu mashuri yisumbuye kugeza mu 2009 ubwo yari atangiye kubohwa n’imirimo. Usibye kuyikina ku ishuri, Sindayigaya yanakinnye mu Umubano Blue Tigers ari naho yasoreje gukina Volleyball.

Ni n’umukunzi wa ruhago, mu Rwanda yirinze kuvuga ikipe afana ariko mu Bwongereza akaba umufana wa Arsenal, mu gihe mu Bufaransa afana PSG.

Muri Espagne ni umufana ukomeye wa Real Madrid mu gihe mu Butaliyani ari umufana wa Juventus, mu Budage agakunda bikomeye Bayern Munich.

Agira inama urubyiruko yagize ati "Gushaka ni ugushobora, kugirango ukore ikintu neza ni uko ukijyamo wese nubwo cyakuvuna gute, ariko ukagikora neza. Urubyiruko rukunde gusoma kuko ni ibintu nakuze nkunda.”

Ikiganiro na Jean Daniel Sindayigaya

Jean Daniel Sindayigaya azwi cyane mu gusoma amakuru kuri radiyo Rwanda
Umwarimu wavuyemo umunyamakuru! Jean Daniel Sindayigaya amaze imyaka 10 mu kigo cy'igihugu cy'itangazamakuru
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza