00:00:00 IGIHE NETWORK KN KINYARWANDA EN ENGLISH FR FRANCAIS

Yatawe muri yombi azira kuzomera no gufata amashusho Abapolisi bari gusamba

Yanditswe na Muhonzire Sylvine
Kuya 28 Mata 2021 saa 11:47
Yasuwe :
0 0

Richard Pusey, Umunya-Australia w’imyaka 42 utuye mu Mujyi wa Melbourne, yatawe muri yombi azira kuzomera no gufata amashusho y’abapolisi bane bari gusamba nyuma yo kugongwa n’ikamyo yari iri ku muvuduko ukabije.

Kugira ngo abo bapolisi bagongwe, bari bahagaritse Richard Pusey kuko nawe yari kugendera ku muvuduko mwinshi, maze mu gihe bagiye kumuhana hahita haza ikamyo yihuta cyane irabagonga maze bose barapfa.

Uyu mugabo wari kuri ruhande rwo hirya y’umuhanda, aho kugira ngo arokore n’uwari ukiri muzima, yafashe umwanzuro wo gufata amashusho abazomera, ameze nk’uwishimiye ko bagonzwe, cyane ko bari bagiye kumuhana, maze ahita yatsa imodoka ye arahunga.

Ku munsi ukurikiyeho yahise afatwa na polisi yo muri icyo gihugu imusanze iwe mu rugo, imuta muri yombi ashinjwa ibyaha birimo kugendera ku muvuduko ukabije, gukoresha ibiyobyabwenge ndetse no kwirengagiza ibyago byari biri kuba.

Aya mashusho yaciye igikuba ku mbuga nkoranyambaga no mu binyamakuru muri Australia ku buryo uyu mugabo yanzwe bikomeye n’abantu benshi muri icyo gihugu.

Umucamanza wakijije urubanza rwe, Trevor Wraight, yavuze ko ibyo Pusey yakoze ari “agasuzuguro, ubunyamaswa no kutagira umutima” ndetse ko ashobora kuba ari we muntu wa mbere wanzwe muri Australia.

Wraight ariko yaje kugaragaza ko uyu mugabo yigeze kugira ibibazo byo mu mutwe birimo no kugira imyitwarire idasanzwe, gusa avuga ko ibyo bitaba urwitwazo rw’amahano yakoze.

Pusey asaba imbabazi yagize ati “Ndumva ntewe isoni n’amashusho nafashe, gusa kenshi bimbaho nkavuga amagambo adahwitse kubera ko ari byo biba byaje mu mutwe wanjye.”

Richard Pusey yahawe igihano cy’igifungo cy’amezi icumi, gusa yari amaze iminsi 300 muri gereza bivuze ko mu minsi mike araba arangije igihano cye.

Mu bindi bihano yahawe, yaciwe ihazahu y’amadolari ya Amerika 774 (hafi ibihumbi 800 Frw), uruhushya rwe rwo gutwara imodoka rurahagarikwa ndetse asabirwa no gushyirwa mu kigo ngororamuco mu gihe cy’imyaka ibiri.

Umushoferi wari utwaye ikamyo yagonze abo bapolisi bane, Mohinder Singh, yarafunzwe mu ntangiriro z’uku kwezi, asabirwa igihano cy’igifungo cy’imyaka 22 kugeza ku rupfu, kuko byagaragaye ko yatwaye yafashe ibiyobyabwenge byinshi nk’uwataye umutwe.

Abapolisi bane bapfuye bagonzwe n'ikamyo ubwo bari bagiye guhana Richard Pusey wari warenze ku mategeko y'umuhanda / Ifoto: Victoria Police
Richard Pusey yahawe igihano cy'igifungo cy'amezi icumi acibwa n'ihazabu y'amadolari 774 / Ifoto: EPA

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .