00:00:00 IGIHE NETWORK KN KINYARWANDA EN ENGLISH FR FRANCAIS

Yabaye Umu-Nazi, ntiyajyaga imbizi n’abatinganyi: Ibyaranze ubuzima bwa Papa Benedigito XVI

Yanditswe na Igizeneza Jean Désiré
Kuya 31 Ukuboza 2022 saa 06:45
Yasuwe :

Kuri uyu wa Gatandatu tariki ya 31 Ukuboza 2022 ni bwo hatangajwe amakuru y’uko Papa Benedigito wa XVI yitabye Imana aguye i Vatican nyuma y’igihe yari amaze arembye kubera izabukuru.

Ku wa 28 Ukuboza 2022 ni bwo Papa Francis yatangaje ko Benedigito XVI w’imyaka 95 arembye, gusa nta makuru arambuye yatanze ku burwayi bwe.

Papa Benedigito XVI witabye Imana ku myaka 95, mu 2013 nibwo yeguye ku mwanya w’Umushumba wa Kiliziya Gatolika ku Isi kubera impamvu z’uburwayi.

Kwegura nk’uko kwaherukaga kubaho mu myaka 600 yari ishize bikozwe na Papa Grégory XII mu 1415.

Ni umupapa wa munani ukomoka mu Budage. Yamenyekanye cyane mu bikorwa byiganjemo kugendera ku bya kera (conservateur) akarangwa n’ibitekerezo byo gushyigikira umuco wa kera aho yakunze kudahuza n’abatezaga imbere Iyobokamana rivuguruye riha n’umwanya abatinganyi.

Ku rundi ruhande ariko ubuyobozi bwe bwaranzwe n’abapadiri bakunze kugaragaraho ibikorwa byo gusambanya abana, aho nko mu 2009 hagaragaye ubwiyongere bw’abapadiri bo muri Irlande bashakaga gusambanya abana ariko bagakingirwa ikibaba.

Ubwo yeguraga ku mwanya wo kuyobora Kiliziya mu Isi, mu ibaruwa yageneye abakaridinali, yagaragaje ko yashenguwe bikomeye no kuba abaye Papa wa mbere kuva mu 1415 weguye.

Amazina ye yiswe n’ababyeyi ni Joseph Aloisius Ratzinger. Yavutse tariki 16 Mata 1927 mu gace ka Bavalia mu Mujyi wa Munich.

Se wari umupolisi na Nyina wikoreraga imirimo yo mu rugo, banzuye ko impano baha umwana wabo ari ukumuyobora mu ishuri rya gikirisitu.

Nk’uko byari itegeko ku muntu wese wari wujuje imyaka 14 mu 1941, na we yagiye kuba umunyamuryango w’urubyiruko rwa Hitler.

Nk’umwana wari ufite se utarakundaga Abanazi, yitabiriye inama nke z’uru rubyiruko cyane ko yateganyaga kuruvamo vuba.

Yahawe ubupadiri mu 1951 aho yigishije muri za kaminuza zitandukanye nk’iya Bonn na Regensburg nyuma ajyanwa i Roma kuba umujyanama w’Inama ya Vatican (Vatican Council) kuva mu 1962 kugeza mu 1965.

Papa Benedigito XVI ntiyigeze ashyigikira ubutinganyi

Papa Yohani Pawulo VI ni we wamugize Arikiyepisikopi wa Munich mu 1977 ndetse amugira umukaridinali muri uwo mwaka.

Yagiye ku mwanya wo kuyobora Kiliziya mu Isi ubwo yari afite imyaka 78 asimbuye Papa Yohani Pawulo II mu 2005 nyuma y’urupfu rwa Papa Yohani Pawulo II.

Ku ngoma ye nibwo havuzwe cyane iby’abapadiri basambanya abana bato, ndetse hatangira amaperereza atandukanye.

Yabaye umupapa wa mbere wasabye imbabazi ku marorerwa nk’aya yabaye mu bice bitandukanye by’Isi ndetse yiyemeza kuzahura n’abagizweho ingaruka n’ibyo bikorwa byo gushaka gusambanywa byakorwaga n’abapadiri.

Mu 2017 Barbara Blaine washinze umuryango w’abahohotewe n’abapadiri (Survivors Network), yavuze ko ibikorwa bya Papa Benedigito XVI bitigeze bihura n’ayo magambo yo gusaba imbabazi kuko “ku buyobozi bwe abana bari bari mu byago bikomeye cyane.”

Raporo yo muri Mutarama 2022 yagizwemo uruhare n’abo muri Arikidiyosezi y’i Munich, yagaragaje ko Papa Benedigito we ubwe yagize uruhare rukomeye mu kujenjekera abapadiri basambanyaga abana bato hagati ya 1977 na 1982.

Nyuma mu ibaruwa yanditse yavuze ko “biteye isoni kuba hari abana bakorewe ihohoterwa rishingiye ku gitsina ku buyobozi bwanjye, mbikuye ku mutima ndasaba imbabazi.”

Papa Benedigito yaranzwe no kudashyigikira bimwe mu byemezo abo mu Burengerazuba bashakaga, birimo gukuramo inda, guhuhura abarembejwe n’uburwayi runaka ndetse no gushyingira abatinganyi.

Yaranzwe n’imbwirwaruhame zitavugwagaho rumwe

Nko mu 2009 yasabye ko amakimbirane ya Israel na Palestine yahoshwa n’uko ubwo butaka bwacibwamo kabiri igice kimwe kikaba icy’Abarabu ikindi kikaba icy’Abayahudi, ibintu bitishimiwe na benshi.

Yatesheje agaciro ibitekerezo byo gushaka abagore ku bapadiri, anemeza ko kuryamana kw’abahuje ibitsina ari uguhonyora nkana indangagaciro z’ikiremwamuntu.

Mu 2006 yongeye gutuma Kiliziya gatorika igarukwaho cyane ubwo yavugaga ko Idini ya Islam yarazwe guhohotera abantu (inherited violent), ibyatumye haba imyigaragambyo ikomeye mu bihugu byinshi bigatuma abakilisitu na bo bibasirwa.

Ntabwo impirimbanyi ziharanira kurwanya Sida zamwibagirwa kuko mu ruzinduko yigeze kugirira muri Afurika, yavuze ko ikoreshwa ry’agakingirizo ryongera ubusambanyi.

Papa Benedigito XVI yaranzwe n'imbwirwaruhame zitavuzweho rumwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .