00:00:00 IGIHE NETWORK KN KINYARWANDA EN ENGLISH FR FRANCAIS

USA: Abakozi bo mu irimbi bafunzwe bazira gucuruza ibice by’imirambo

Yanditswe na Igizeneza Jean Désiré
Kuya 4 Mutarama 2023 saa 12:14
Yasuwe :

Megan Hess w’imyaka 46 na nyina Shirly Koch w’imyaka 69 bahoze ari abayobozi b’irimbi ryo muri Leta ya Colorado ho muri Leta zunze Ubumwe za Amerika bakatiwe igifungo cy’imyaka 20 na 15, nyuma yo guhamwa n’ibyaha byo gucagagura imirambo bakagurisha ibice byayo.

Aba bagore bahamijwe ibi byaha kuri uyu wa 3 Mutarama 2023 aho ubushinjacyaha bwo muri Colorado bwatangaje ko bacagaguye imirambo 560 bakagurisha ibice byayo, ibyaha bakoze kuva mu 2010 kugeza mu 2018.

Ubushinjacyaha bwagaragaje ko aba bagore uretse kugurisha ibice by’umubiri bijyanye n’ibyo abakiliya babo babaga bakeneye, hari n’ubwo bagurishaka imirambo yose uko yakabaye.

Hess wayoboraga irimbi rya Sunset Mesa ryo mu gace ka Montrose yishyuzaga 1000$ ku murambo umwe kuri serivisi zo gushyingura mu buryo bugezweho bwo gutwika imirambo.

Gusa umuryango wemeraga gutanga ibice by’umurambo w’umuntu wabo wenda bikazakoreshwa mu buryo bw’ubuvuzi n’insimburangingo ku barwayi, nta mafaranga wacibwaga.

Umukozi w’Urwego rw’Ubugenzacyaha rwa Amerika, FBI mu Mujyi wa Denver ho muri Colorado, Leonard Carollo aba bagore bahinduye imirambo uburyo bubaha amafaranga mu gihe ababaganaga babaga bari mu marira y’ababo babavuyemo.

Ati “Aho gutanga serivisi aba bagore b’ibisambo n’inda nini bakoraga ibya mfura mbi ku mirambo amagana bakayikata uko bishakiye.”

Ibi bikorwa byashenguye abo mu miryango yakorewe aya marorerwa. Nancy Overhoff wari ufite umubyeyi wakuwemo umutima ukagurishwa yabwiye Denver Post ko “Ubwo Megan yibaga umutima wa mama yashenguye n’uwanjye.”

Umucamanza waciye uru rubanza rw’aba bagore, Christine Arguello we yavuze ko “kuva natangira uyu mwuga ni bwo mpuye n’ikibazo kigomeye nk’iki.”

Kugira ngo bitahurwe abanditsi bakora inkuru zicukumbuye ba Reuters ni bo batungiye agatoki FBI hanyuma kuva mu 2018 batangira gukurikirana iki kibazo.

Amategeko ya Leta zunze Ubumwe za Amerika kugeza ubu ntiyemerera abantu gucuruza ibice by’imibiri y’abantu, gusa biri kwigwaho ku buryo byazahabwa umurongo mu bihe biri imbere.

Megan Hess w’imyaka 46 na nyina barashinjwa kugurisha imirambo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .