00:00:00 IGIHE NETWORK KN KINYARWANDA EN ENGLISH FR FRANCAIS

Urubori rw’uruyuki rushobora gutangira kwifashishwa mu kuvura kanseri y’ibere

Yanditswe na Zigiranyirazo Bajecteur
Kuya 6 April 2022 saa 10:43
Yasuwe :

Ubushakashatsi bushya bwakorewe mu Kigo cya Harry Perkins, bwagaragaje ko urubori rw’inzuki rufite ubushobozi bwo kwica uturemangingo tw’indwara ya kanseri y’ibere.

Ibi byemejwe nyuma y’aho abahanga bo mu burengerazuba bwa Australia bifashishije ubumara bavanye mu mbori z’inzuki zirenga 300 bagasanga ibigize ubwo bumara bifite ubushobozi bwo kwica uturemangingo twa kanseri y’ibere mu gihe cy’isaha imwe gusa.

Abashakashatsi bavuga ko nubwo amagerageza ya mbere bayakoreye muri laboratoire bizeye neza ko ubu buryo bwifashisha urubori rw’inzuki bushobora gufasha cyane mu buvuzi bwa kanseri y’ibere dore ko banashimangira ko ubu bumara buba bwakuwe mu mbori ngo bwice uturemangingo twa kanseri, bukora uwo murimo neza kandi ntibwangize utundi turemangingo dusanzwe mu mubiri w’uwavuwe.

Hagaragajwe kandi ko bimwe mu biba bigize urubori rw’uruyuki bizwi nka “melittin” ari byo nyirizina bigira uruhare mu gusenya no kwica utwo turemangingo twa kanseri y’ibere.

Ubu bushakashatsi bugezweho nyuma y’ubundi bwaherukaga kuvumburwa kuri iyi kanseri buzwi nka “Cryoablation”. Bwo bwagaragazaga ko kanseri y’ibere ishobora kuvurwa hifashishijwe ubukonje bwinshi buterwa ahari ikibyimba ku buryo kiyenga kigashira umuntu atarinze kubagwa.

Dr. Malirena Tauro, umushakashatsi ku bijyanye na kanseri y’ibere mu Kigo cya Moffitt avuga ko nubwo ibyavumbuwe kuri iyi nshuro byakiriwe neza, hagikenewe gukora ubundi bushakashatsi bwimbitse kugira ngo ubu buryo bwifashisha urubori rw’inzuki butangire kwifashishwa mu buvuzi bw’iyi kanseri.

Ati “amakuru meza ni uko ubu bushakashatsi bwerekanye ko’melittin’ ishobora gufasha mu guhagarika ikwirakwira rya kanseri y’ibere, icyakora ni kenshi twabonye ubushakashatsi butanga umusaruro muri za laboratwari cyangwa ku nyamaswa ariko bigafatwa indi myaka myinshi kugira ngo hemezwe ko ibyavuye mu bushakashatsi bishobora koko gufasha umurwayi.”

Tauro atanga icyizere avuga ko kuba hafi kimwe cya kabiri cy’imiti yifashishwa mu kuvura kanseri ari imiti ikomoka ku bintu by’umwimerere, bishobora kuba indi mpamvu itanga ibyiringiro ko koko urubori rw’inzuki rushobora kuzafasha mu buvuzi bwa kanseri y’ibere.

Urubori rw’uruyuki rushobora gutangira kwifashishwa mu kuvura kanseri y’ibere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .