00:00:00 IGIHE NETWORK KN KINYARWANDA EN ENGLISH FR FRANCAIS

Umuranga mu isura nshya; ubuhamya bw’abahuriye kuri ‘blind date’

Yanditswe na Léana Bisa
Kuya 29 June 2022 saa 09:47
Yasuwe :

Ni gute wahuye n’umuntu mukundana, cyangwa se mubana? Birashoboka cyane ko mwahuriye ahantu runaka nko mu birori, mu rusengero cyangwa se ukamubona binyuze muri ‘passe.’ Uko byagenda kose, biragoye ko mwahujwe n’abaranga.

Umuranga yahoze ari umuntu wabaga azi imiryango mu bihe byo hambere, ku buryo amenya ko umuryango wa runaka n’uwa kanaka ibyiruye, ubundi agatangira akazi gakomeye ko guhuza abo bana, akanyura mu babyeyi bakabiha umugisha bwajya gucya ukumva ngo ubukwe bwatashye.

Rimwe na rimwe wasangaga abo bagiye guhuzwa bataziranye cyangwa se ari ubwa mbere bagiye guhura amaso ku maso, ubundi ugasanga bari baziranye ariko bitari cyane.

Uyu muco ujya gucika byatewe n’iterambere, ariko mu isura isa nk’itandukanye, hari ibisigaye bikorwa bijya gusa neza nko ‘kuranga’ kwa kera.

Ibi bizwi nka ‘blind date,’ aho inshuti runaka iba izi abantu babiri bataziranye, noneho ikagira uruhare mu kubahuza kugeza ubwo bamenyanye ndetse bakaba bakwinjira mu rukundo.

Uyu muntu rero uba uhuje inshuti ebyiri, ni nk’aho ari we twakwita umuranga, kuko ahuza inshuti ze ebyiri cyangwa se abantu babiri azi neza ko badafite abakunzi, akababwira ko bishoboka ko bagerageza kurema urukundo hagati yabo.

Uyu muranga kenshi aba azi imico ya buri nshuti ye, ku buryo amahirwe y’uko bashobora kurema urukundo aba ari hejuru.

Ibi niko byagendekeye Seth na Olive (amazina yahinduwe) bahujwe n’inshuti yabo, bikaza kurangira bubatse urukundo rugashinga imizi.

Aba bombi ntabwo bari baziranye ndetse nta hantu bari barigeze bahurira, uretse inshuti yabo, nta kindi kintu kigaragara bari bahuje. Nyuma yo kwitegereza aba bombi, iyi nshuti yaje kugira igitekerezo cyo kubahuza kugira ngo bamenyane, nibinarimba bakundane.

Iyi nshuti yabanje kuganiriza buri wese ku buryo yamenye neza ko nta n’umwe uri mu rukundo, ibyo bituma aza gufata icyemezo cyo kubahuza. Ibi ntabwo ari bya bindi byo gutanga nimero ngo bivuganire, ahubwo bavugana ari uko bamaze guhura bwa mbere kandi bigizwemo uruhare na ya nshuti yabo.

Mu kiganiro na IGIHE, uyu muhuza yatubwiye uko byagenze. Yavuze ko yabanje kubibwira Seth (umuhungu), ati “Nafashe iya mbere ndamwegera, ndamubwira nti ‘hari umukobwa nzi mwiza kandi ushobora gukunda, ntabwo ameze nk’abakobwa usanzwe utereta ariko ndabizi neza ko uzamukunda.”

Seth yabanje kubyanga yumva ko kujya guhura n’umukobwa atazi ari ibintu bidasanzwe kandi bishobora gutuma atisanzura, cyane ko atari azi n’uko Olive asa.

Na Olive yumvaga iki gitekerezo agifitiye amakenga, kuko guhura n’umusore atazi atanabanje kubaririza amakuru ye bigoye cyane, ariko akumva ko kugerageza ayo mahirwe ntacyo bitwaye.

Aba bombi baje kubyemera, iyo nshuti bahuriyeho ipanga aho bazahurira n’isaha. Kugira ngo babashe kumenyana. Umunsi nyirizina warageze, iyi nshuti iherekeza Seth bategereza Olive aho bagombaga guhurira.

Mu kiganiro na IGIHE, Seth yatubwiye ko yabanje kugira ubwoba ubwo bari bategereje Olive, ariko akihagararaho kuko atagomba kwica gahunda yateguwe igihe kirekire.

Ati “Nari mfite ubwoba kuko urumva sinari muzi kandi nawe ntabwo yari anzi. Numvaga nshobora kubura amagambo yo kumubwira bikarangira twese ducecetse, nkumva nari kuba mpasebeye cyane, nkanasebya inshuti yanjye.”

Yakomeje ati “Ikindi kandi nibazaga niba (Olive) ari bukunde uko nsa, abakobwa ntawamenya yashoboraga kunyanga agahaguruka akigendera. Nari mfite amatsiko menshi yo kumubona, nibazaga uko asa cyane ko nta n’ifoto ye nari mfite. Ibyo byose byari ibitekerezo nari mfite mu mutwe.”

Amasaha Olive yari yatanze nta n’umunota yarengeje, akihagera abanza gusuhuza inshuti basanzwe baziranye nyuma aza no gusuhuza Seth, ubwo aricara ibiganiro biratangira.

Mu kiganiro twagirane, Olive nawe yagaragaje uburyo ajya kugenda yari afite ubwoba, ati “Namaze amasaha ndi gutekereza ku cyo ndi bwambare, nahageze umutima uri gutera amasigamana, njye bari bambwiye ko ari umusore utagize icyo abaye ariko nta foto nari mfite, namaze amasaha nk’abiri nkiri kwitegura.”

Yakomeje ati “Nagezeyo mbanza kureba mu idirishya ngo ndebe uko asa ariko sinababona, ninjiye nibwo nababonye ndabasuhuza nawe mubonye mbona koko ntacyo abaye.”

Nyuma yo gusuhuzanya baricaye batumiza icyo kunywa, inshuti yabo ivanamo akayo karenge irigendera ngo babashe kuganira bonyine.

Seth yavuze ko yagowe no kumenya ingingo Olive akunda ngo abe ari yo banzikiraho ikiganiro, ati “Byabanje kungora kumenya uko muganiriza kuko sinari nzi uko ateye n’uko aganira, numvaga ntazi uko mbigenza. Ashobora kuba yarabibonye kuko yahise atangira kumbaza ibibazo byinshi byatumye tuganira byinshi.”

Olive yamuciye mu ijambo ati “Nabonaga byamunaniye, kandi nashakaga ko yisanzura, ni uko ntangira kugenda mubaza utubazo dusanzwe kugira ngo abanze yisanzure.”

Bakomeje kuganira mu gihe cy’amasaha atatu, babona gusezerana buri wese aca ukwe.

Nyuma yaho ntibongeye kuganira kuko ntawibutse kwaka undi numero kugeza ubwo nyuma y’ibyumweru bibiri, Olive byamwanze mu nda akayishakira akamwandikira.

Olive aseka yagize ati “Abantu benshi bakunda kuvuga ko namwitereteye ariko nabonaga yitonze cyane adashobora kunyandikira.”

Koko niko byari bimeze kuko Seth yari afite nimero ya Olive ariko atatinyutse kumwandikira ngo bakomeze baganire.

Seth ati “Njye nimero ye nari nyifite ariko sinari nzi neza niba ashaka gukomeza kuvugana nanjye. Nari namukunze, nabonaga ari umukobwa ushabutse wifitiye icyizere. Narategereje ngo we azanyandikire kugira ngo ndebe koko niba we yarankunze.”

Nyuma yo kumwandikira, Seth ntiyatinze kumusubiza bahera aho baraganira ndetse baba inshuti cyane, kuko buri wese yisangaga mu wundi.

Seth ati “Njye nari ntuje cyane we atari ko ameze, nkabona nyine birajyanye biruzuzanya, ndibuka ko nyuma nk’umwaka ari bwo twatangiye gukundana bizwi.”

Yakomeje ati “Nabonye ari ibintu byikoze, uburyo twahuye n’ubu bijya binsetsa kuko ari ibintu bidasanzwe, numvaga ari iby’abazungu.”

Magingo aya, aba bombi baracyari mu rukundo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .