00:00:00 IGIHE NETWORK KN KINYARWANDA EN ENGLISH FR FRANCAIS

Umunyamakuru Mugenzi yanywereye igikoma muri studio kubera gutsindwa intego ya Champions League

Yanditswe na Umwali Zhuri
Kuya 19 Werurwe 2021 saa 10:21
Yasuwe :
0 0

Umunyamakuru wogeza imipira y’i Burayi kuri Radio 10, Mugenzi Faustin ‘Simbigarukaho’, yanywereye igikoma muri studio nyuma yo gutsindwa intego yari yakoze muri Champions League ubwo yavugaga ko Atlético Madrid izasezerera Chelsea ku kinyuranyo cy’ibitego bibiri.

Uyu munyamakuru yahiguye ibyo yari yavuze ubwo umukino wari urangiye ku wa Gatatu, Chelsea imaze gutsinda Atlético Madrid ibitego 2-0, ikayisezerera ku giteranyo cy’ibitego 3-0.

Mbere y’uko uyu mukino uba, mu kiganiro 10 Zone kiba hagati ya saa kumi n’ebyiri na saa mbiri n’igice z’umugoroba kuri Radio 10, Mugenzi Faustin ‘Simbigarukaho’, yavuze ko Chelsea idashobora gusezerera Atlético Madrid, yemeza ko niramuka ibikoze, azanywera igikoma muri studio.

Yari yagize ati “Chelsea nidasezererwa ku kinyuranyo cy’ibitego bibiri, ncibwe kumara telemusi y’igikoma gishyushye. Atlético iratsinda!”

Bitandukanye n’ibyo uyu munyamakuru yari yavuze, umukino warangiye Chelsea itsinze ibitego 2-0. Mugenzi we bakorana mu kiganiro 10 Zone, Jado Max ’Söyüncü’, na Julius Chita bari batumiye kuri uyu mukino, bombi bamuzaniye telemusi irimo igikoma, bamusukira mu gakombe, atangira kukinywera muri studio.

Si ubwa mbere Mugenzi Faustin yari akoze intego agatsindwa ndetse bikarangira asabwe guhigura ibyo yari yiyemeje.

Mu ntangiriro z’uku kwezi, yogoshewe muri studio nyuma y’uko yari yavuze ko Manchester United nitsinda Manchester City mu mukino wa Premier League, bizagenda bityo.

Uwo mukino wabaye tariki ya 7 Werurwe 2021, warangiye Manchester United itsinze Manchester City ibitego 2-0 bya Bruno Fernandes kuri penaliti ndetse na Luke Shaw.

Gusa, nyuma y’uko atsinzwe ku ntego ya kabiri, ku wa Kane, Mugenzi Faustin yatangaje ko atazongera gutega.

Abinyujije kuri Twitter, yagize ati “Sinzongera gutega, murabeho.”

Mugenzi Faustin 'Simbigarukaho' yanywereye igikoma muri studio za Radio 10 nyuma yo gutsindwa intego yakoze ku mukino Champions League wahuje Chelsea na Atlético Madrid
Muri iyi minsi, Mugenzi Faustin nta musatsi mwinshi agifite nyuma yo kogosherwa muri studio

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .