00:00:00 IGIHE NETWORK KN KINYARWANDA EN ENGLISH FR FRANCAIS

Umugore yafunzwe azira gutobora agakingirizo k’umugabo baryamanye

Yanditswe na Zigiranyirazo Bajecteur
Kuya 30 May 2022 saa 07:59
Yasuwe :

Mu Budage, umugore w’imyaka 39 yahamijwe icyaha cy’ihohotera mu bijyanye n’imibonano mpuzabitsina bitewe n’uko yatoboye agakingirizo k’umugabo baryamanye.

Itangazamakuru ryo muri icyo gihugu rivuga ko uyu mugore yari yaramenyanye n’uyu mugabo w’imyaka 42 biciye kuri internet mu 2021.

Bahise batangira kujya bahura kenshi kugeza ubwo uwo mugore yagize ibyiyumviro bidasanzwe ariko ku ruhande rw’umugabo akabona ko atifuza ko byagera kure.

Mu ibanga rikomeye, uwo mugore yahise yigira inama yo gutobora imyenge mu dukingirizo tw’uwo mugabo twari iruhande rw’ameza, ateganya ko mu gihe baba baryamanye n’uwo mugabo byamufasha guhita asama nubwo uyu muvuno utabashije kumuhira.

Nyuma yo kudahirwa ngo asame nk’uko yabiteganyaga,yahishuriye umugabo ko yibwiraga ko yaba yarasamye anamubwira iby’uko yagerageje gutobora udukingirizo, ibintu byateye umugabo guhita atanga ikirego ku ihohoterwa yakorewe.

Mu rukiko abashinjacyaha bemeje ko iki cyaha cyabayeho ariko umucamanza ahera mu rungabangabo ku bihano bishobora gufatirwa uyu mugore.

Yibazaga niba abyita gufata ku ngufu cyangwa guhohotera ku buryo byamusabye kubanza kongera kubumbura umuzingo ukubiyemo ibyaha n’ibihano.

Umucamanza yaje kubona ko hari icyaha kizwi nka “stealthing”, kibaho mu gihe abantu babiri bari gukora imibonano mpuzabitsina, umwe akaba yakuramo agakingirizo mbere y’uko igikorwa kirangira kandi atabiherewe uburenganzira n’uwo baryamanye.

Umucamanza Astrid Salewski yafashe umwanzuro w’uko uyu mugore akatirwa igifungo cy’amezi atandatu nyuma yo guhamwa n’icyaha cyo kuba yaratoboye udukingirizo tw’umugabo bakoranye imibonano mpuzabitsina atabimuhereye uburenganzira, igikorwa cyafashwe nk’ihohotera.

Si ubwa mbere habayeho icyaha nk’icyo kuko mu 2020 mu Bwongereza, urukiko rwakatiye umugabo igifungo cy’imyaka ine nyuma yo guhamywa icyaha cyo gutobora agakingirizo ke, mbere yo gukorana imibonano mpuzabitsina n’umugore.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .