00:00:00 IGIHE NETWORK KN KINYARWANDA EN ENGLISH FR FRANCAIS

Umugabo wo mu Bubiligi yatsindiye miliyari zisaga 143 Frw muri betting

Yanditswe na Zigiranyirazo Bajecteur
Kuya 7 Ukuboza 2022 saa 11:15
Yasuwe :

Abenshi bamaze gusubira ku isuka bazize kwirundumurira mu bikorwa bijyanye n’imikino y’amahirwe bitewe no kubijyamo batizigama bagashiduka bamariyemo utwabo twose, icyakora ibi si ko bimeze ku mugabo w’Umubiligi waraye uciye ukubiri n’ubukene abikesha gutsindira ama-euro agera kuri 142 897 164 muri iyi mikino y’amahirwe izwi nka betting.

Uyu mugabo wabaye uwa gatatu mu bafite agahigo ko gutsindira amafaranga menshi mu Bubiligi mu bijyanye n’imikino y’amahirwe ya Euro Millions. Ni imikino ikinwa hahishurwa imibare, wavuga ijyanye n’iyo bahishe ukaba uratsinze.

Nubwo uyu mugabo ari muri batatu bamaze gutsindira umubare w’amafaranga menshi mu Bubiligi, ntabwo yabashije kugera ku gahigo k’abantu 10 bamaze gutsindira amafaranga menshi ku rwego rw’isi aho uri ku isonga ari uwabashije gutsindira miliyoni 230 z’ama-euro mu Bwongereza mu mpeshyi y’uyu mwaka.

Iyi mikino ya jackpot imaze kuba ikimenyabose mu bihugu nk’u Bwongereza, u Bufaransa n’u Bubiligi, ikomeje kugenda ihesha benshi amahirwe yo guhindurirwa ubuzima aho nk’uyu waraye utsinze byamuhaye ubushobozi bwo kuba yakwishyura inshuro eshatu umuzamu w’ikipe y’igihugu cyabo y’umupira w’amaguru, Thibaut Courtois waguzwe miliyoni z’ama-Euro 40 mu 2018.

Byitezwe ko uwatsindiye aya mafaranga agomba kuba yayahawe mu gihe cy’iminsi itandatu, aho akenshi bakunda guhitamo kujya kubaho mu buzima bw’ibanga kubera gutinya ababagirira nabi babakurikiranyeho ayo mafaranga.

Abandi Babiligi bari barabashije gutsindira amafaranga menshi muri iyi mikino, umwe yari yegukanye miliyoni 153 z’ama-euro mu 2017 mu gihe undi yatsindiye ama-euro 168 085 323 mu Ukwakira, 2016 ari na we ufite agahigo muri icyo gihugu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .