Umudepite wo muri Uganda yajyanye inzige mu nteko

Yanditswe na Bukuru JC
Kuya 19 Gashyantare 2020 saa 03:18
Yasuwe :
0 0

David Obala, umudepite uhagarariye agace ka Ngora gaherereye mu Burasirazuba bw’igihugu yazanye ibyonnyi by’inzige mu ngoro y’Inteko Ishinga Amategeko ngo agaragaze uburyo Leta igenda gahoro mu kurwanya ibyo byonnyi.

Amashusho ya Obala afite icupa ryuzuye inzige yakwirakwijwe ku mbuga nkoranyambaga muri icyo gihugu.

Uyu mugabo yazanye izo nzige mu nteko kuri uyu wa Kabiri, avuga ko nta kigaragara Leta ya Uganda iri gukora mu guhangana n’inzige ziri kwigabiza imirima itandukanye y’abahinzi, bishobora gutera inzara mu minsi iri imbere.

Undi mudepite yahise ahaguruka avuga ko ibyo Obala yakoze bidakwiriye, biba ngombwa ko bamusaba guhereza ushinzwe umutekano iryo cupa ryuzuyemo inzige bakajya kurijugunya.

BBC yatangaje ko Perezida w’Inteko Ishinga Amategeko ya Uganda yahise asaba Minisiteri ibishinzwe kujya itanga amakuru ya buri cyumweru y’uburyo Guverinoma iri guhangana n’izo nzige.

Hashize iminsi inzige zibasiye ibice bitandukanye byo muri Afurika y’Iburasirazuba nka Kenya, Ethiopia na Tanzania. Mu mpera z’icyumweru gishize nibwo zageze muri Uganda. Loni itangaza ko Guverinoma iri kugenda biguru ntege mu guhangana n’icyo cyorezo nubwo hatumijwe indege zitera imiti mu kirere zigamije guhangana n’ibyo byonnyi.

Loni yatangaje ko irumbu riringaniye ry’inzige rishobora kurya ibihingwa bingana n’ibyatunga abaturage bose ba Kenya mu munsi umwe ari nayo mpamvu isaba imbaraga mu guhangana nazo kuko bidakozwe ingaruka zazo zaba mbi.

Inzige zimaze iminsi zibasiye ibihugu bitandukanye byo mu Burasirazuba bwa Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza