00:00:00 IGIHE NETWORK KN KINYARWANDA EN ENGLISH FR FRANCAIS

Uko watoza imbwa yawe kudahora imoka cyane mu gihe udahari

Yanditswe na Zigiranyirazo Bajecteur
Kuya 22 April 2022 saa 07:41
Yasuwe :

Imwe mu nshingano zikomeye zibaho mu gucirira imbwa ni ukubasha kuba shebuja cyangwa nyirabuja mwiza w’iyawe, iki kandi ni kimwe mu bishobora gutera umuntu akanyamuneza mu gihe iryo tungo ryo mu rugo ribasha gukurikiza ibyo ritozwa.

Ibi kandi uretse ibyishimo, ubushakashatsi bugaragaza ko binafasha umuntu kumererwa neza mu buzima. Nubwo bimeze bityo ariko hari abatoroherwa no kwihanganira imbwa zabo bitewe n’uko buri gihe iyo bagize aho batarabukira bazisize zihita zitangira kumoka ubudatuza ku buryo hari n’abashiduka biyambuye nk’urukweto bambaye bakaruyitera nubwo atari ko biba byagakwiye gukorwa.

Hari imbwa nyinshi ziba zifite imyitwarire nk’iyo idasanzwe ku buryo ziba zikeneye gufashwa aho kukwa inabi na ba nyirazo.

Umuntu yakwibaza impamvu ishobora kuzitera iyi myitwarire akanibaza niba hari uburyo yakoresha akabishyiraho iherezo ariko uri bubashe gusoma iyi nkuru arayigera ku musozo yamaze kubona igisubizo kimufasha guturisha imbwa ye igasezerera ibyo kumoka ubutitsa igihe cyose ayisize yonyine.

Ni iki gishobora gutera imbwa guhora imoka?

Kubera ko imbwa idashobora kuvuga nk’uko abantu babigira, bikunze kugorana kumenya impamvu iyitera kumoka ubutitsa ku buryo bishobora no gutesha umutwe nyirayo cyane cyane iyo atuye ahantu hari amabwiriza agamije gukumira urusaku.

Icya mbere ukwiye kuzirikana mu gihe imbwa yawe iri kumoka umusubizo, si uko iba ishaka kugutesha umutwe ahubwo ugomba gushakisha uko watahura ubutumwa ishaka kuguha.

Biba bishoboka ko iri kubona idatekanye bitewe n’uko hari nk’umuntu itamenyereye uri gusatira umuryango, ishobora kumoka kubera izi ko iyo ibikoze ari bwo ubasha kuyitaho cyangwa se ikabikoreshwa no kumva ihangayikishijwe n’impamvu runaka.

Uko wayica ku muco wo kumoka umusubizo

Mu gihe wifuza gutoza imbwa yawe kudahora imoka, ushobora kuyimenyereza gahoro gahoro kuyisiga mu rugo ahantu hatuje by’igihe gito ugahita ugaruka ndetse ukaba wanayizanira akantu runaka nk’igihembo.

Ushobora kandi kujya uyikoresha imyitozo ngororangingo runaka ku buryo isa n’iguye agacuho ntishishikazwe no kumoka, ukanirinda cyane kuyikankabukira uyikanga mu ijwi ryo hejuru kuko na yo bishobora kuyitera kongeza umurego rukabura gica.

Mu gihe ubonye idacogora igakomeza iyo migirire, ugirwa inama yo kugana muganga w’amatungo akakubwira imiti ushobora kuyiha ikayigabanyiriza umuhangayiko cyangwa se ukanisunga abantu biyeguriye ibyo gutoza imbwa bakagufasha kuvugutira umuti icyo kibazo.

Ugomba no kumenya amahitamo ukora mu gihe ugiye gucirira imbwa iwawe kuko hari izimenyereweho kuba zituje nk’izo mu bwoko bwa bulldog, basenji, izizwi nka King Charles spanial, French bulldog ndetse na Australian shepherd.

Ukwiye no kuba uzi ko izo mu bwoko bwa Chihuahua, Beagle na Pomeranian; zikunda gusaragurika ntizihame hamwe kandi zikanakunda gusakuza cyane.

Hari imbwa nyinshi ziba zifite imyitwarire idasanzwe ku buryo ziba zikeneye gufashwa aho kukwa inabi na ba nyirazo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .