00:00:00 IGIHE NETWORK KN KINYARWANDA EN ENGLISH FR FRANCAIS

Uko waca ukubiri no kugona

Yanditswe na Zigiranyirazo Bajecteur
Kuya 6 June 2022 saa 07:58
Yasuwe :

Waba wibuka inkuru zo mu buto aho umwana unyara ku buriri bamubyutsaka mu rukerera ngo ajye kunywa amazi yo ku iteke bamwizeza ko ahita aca ukubiri n’iyo ngeso ?

Ku rundi ruhande ariko birashoboka ko kimwe nanjye, nawe wakuriye mu gace abakuru babwiraga umwana ugona ngo azajye ku ibuye ry’urutare rinini ariryameho ubundi yigoneshe hanyuma aribwire ati "wa buye we ngusigiye umugono."

Aha bahitaga bakubwira ko nta kabuza ibyo kugona uzaba ubisezereye nubwo kuri njye numva ntibuka niba uyu muti gakondo ushingiye ku myizerere warakoraga koko.

Kugona bavuga ko bishobora guterwa n’umunaniro mwinshi cyangwa bigaterwa n’uburyo aryamyemo ariko icyo benshi bahurizaho ni uko umuntu ugona abangamira cyane uwo bararanye n’abamuri hafi nubwo hari igihe na nyirabyo bimubangamira.

Imitwarire yo kugona ituma nyirayo yinubwa ikaba yanamusenyera agatandukana n’umukunzi cyangwa ikabaraza ukubiri.

Niba byakubagaho, uraza gusoza gusoma iyi nkuru wamenye impamvu ibitera ndetse ikirenzeho uranamenya uko wabishyiraho iherezo wowe n’uwo muraranye mukaryama mwiziguye ntawe ubangamiye undi.

Impamvu ituma umuntu agona

Kugona bibaho igihe umuntu aryamye ariko mu buryo atabasha gusohora neza umwuka binyuze mu mazuru ye cyangwa se mu muhogo bigatuma imikaya ikikije ahanyura umwuka imera nk’itogota umuntu asohora ijwi rimenyerewe nko kugona.

Bishobora guterwa n’impamvu zitandukanye zirimo ikigero cy’imyaka umuntu agezemo, uburyo n’ahantu ururimi rwe ruba ruherereye mu gihe asinziriye, kunywa inzoga n’itabi, imiti runaka n’ibindi.

HelpGuide igaragaza ko uko umuntu agana mu zabukuru ari ko umuhogo we urushaho kwegerana ku buryo mu gihe yirambitse ahita atangira kugona.

Nubwo ntacyo umuntu yahindura ku myaka ye, hatangwa inama y’uko yagerageza kujya akora imyitozo ifasha umuhogo kutibasirwa n’iyo ngeso, akagerageza kwimenyereza kuryama ku masaha atandukanye n’ayo yari asanzwe abikoreraho cyangwa se akanahindura uburyo bw’imibereho ya buri munsi.

Umubyibuho ukabije no kwikorera ibintu biremereye cyane by’umwihariko abakunda gutwara imizigo ku rutugu, nabyo bishobobora kubatera kugona aho aba bantu bagirwa inama yo gukora imyitozo ngororangingo ibafasha gutakaza ibiro mu gihe ababiterwa no kwikorera ibintu biremereye, babwirwa kwirinda kubitwara hafi y’irugu kuko biba intandaro yo kugona.

Imiterere y’umuntu na yo ishyirwa mu mpamvu zitera kugona kuko mu buryo bwa siyansi, hagaragazwa ko abagabo bakunze kugira inzira nto zicamo umwuka ugereranyije n’abagore ku buryo akenshi usanga abagabo ari bo bagize umubare munini w’abagona.

Hari kandi uburwayi bukunda gufunga inzira z’ubuhumekero nka ’sinusite’ ku buryo bishobora kubera umuntu intandaro yabyo.

Izindi mpamvu zitera umuntu kugona harimo kunywa itabi n’inzoga cyangwa gufata imiti runaka aho hatangwa urugero ku yitwa "lorazepam" (Activan)na "diazepam" (Vallium) izwiho gutuma imikaya yo mu nzira z’ubuhumekero yirekura ku buryo bushobora kubogama bigatera umuntu kugona.

Kuryama umuntu agaramye na byo bishyirwa mu mpamvu zatuma umuntu kugona aho hatangwa inama yo guhindura uburyo bw’imiryamire.

Icyo wakora ukabisezerera

Hari umuntu ushobora kugona umunwa we ufunguye hari n’uwo bibaho ufunze, abandi bigaterwa no kuryama bagaramye cyangwa hakabaho n’abo bibaho uburyo baba baryamyemo ubwo ari bwo bwose ku buryo bo bashobora no gukenera ubuvuzi bwihariye.

Kubera ko abantu badahuje imiterere, umuntu ugona agirwa inama yo kwihangana no kudacika intege akaba yagerageza gushyira mu ngiro uburyo bunyuranye bufasha gucika kuri iyo ngeso kugira ngo abashe kugera ku buhwanye n’imikorere hamwe n’imiterere y’umubiri we.

Ushobora gutangira ugerageza guhindura uburyo waryamagamo ukitoza kuryamira urubavu niba wakundaga kuryama ugaramye, ukirinda kurara mu cyumba kirimo ivumbi, ukora imyitozo igufasha gutakaza ibiro kandi ugahagarika kunywa inzoga n’itabi niba wifuza guca ukubiri no kugona.

Indi nama yagufasha guhagarika kugona ni ukwirinda kurya ugahaga cyane mbere yo kuryama.

Ni byiza kandi ko wajya ufata iminota itatu inshuro ubashije ku munsi ugasubiramo inyajwi (a-e-i-o-u) kandi ukabikora usohora ijwi.

Ukwiye no gufata iyo minota buri munsi ukagerageza umwitozo w’ururimi usa n’urujyana inyuma wongera urusubiza inyuma, ukajya ufata amasegonda nibura 30 ukora umwitozo wo gukebanya imisaya ujyana iburyo n’ibumoso ndetse ukajya unimenyereza kuririmba kuko bifasha kugenzura imikaya yawe.

Mu gihe ugerageje ubwo buryo bwose bikanga, ugirwa inama yo kwegera umu- ’otolaryngologist’, umuganga uzobereye ibijyanye n’indwara zibasira amatwi, amazuru n’umuhogo akaba yagufasha kubona igisubizo gishingiye ku buvuzi kandi ukibutswa ko mu gihe aguhaye inama ihuye n’iyo wari waragerageje bikanga ukwiye kongera ukabigerageza kuko ku yindi nshuro bishobora gukunda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .