Uko Umunyamerika Evan Jarrell yagize igitekerezo cyo kwiga Ikinyarwanda akanakiririmbamo

Yanditswe na Uwiduhaye Theos
Kuya 22 Mutarama 2020 saa 08:50
Yasuwe :
0 0

Umunyamerika Evan Jarrell usanzwe ari umuramyi yatangiye gukora album y’indirimbo zizaba ziri mu rurimi rw’Ikinyarwanda ndetse iza mbere zatangiye kujya hanze.

Evan Jarrell ukomoka muri Leta Zunze Ubumwe za Amerika mu minsi ishize yari mu Rwanda aho yari mu gitaramo yari yatumiwemo na Gentil Misigaro wamamaye mu ndirimbo “Buri munsi” na “Biratungana”. Iki gitaramo cyiswe ‘Hari Imbaraga Rwanda Tour’ cyabereye muri Kigali ku wa 10 Werurwe 2019.

Uyu muhanzi ni umuhanga mu kuririmba aho yibanda ku ndirimbo zo kuramya no guhimbaza Imana. Kuri ubu aherutse gushyira hanze indirimbo iri mu rurimi rw’Ikinyarwanda akaba ari no gukora album yazo.

Yabwiye IGIHE ko yamenye Ikinyarwanda ubwo yazaga mu Rwanda agakunda ibintu bitandukanye byo mu Rwanda birimo ibiryo, ururimi, umuco ndetse agakunda n’Abanyarwanda.

Ati “Bwa mbere nza mu Rwanda nakunze Abanyarwanda, umuco wabo, ururimi bihita bintera imbaraga zo kwiga uru rurimi. Ntekereza ko ari Imana yanzanye mu Rwanda kuko ntari nziko bizaba.”

Uyu mugabo w’Umunyamerika asanzwe asengera mu rusengero rwa Belpres rw’i Bellevue muri Leta ya Washington aho ari umuyobozi w’itsinda ryo kuramya no guhimbaza muri korali yo mu rusengero abarizwamo.

Yamenyanye n’Abanyarwanda ubwo muri uru rusengero asengeramo mu 2018 batumiraga umuramyi Gentil Misigaro kuza gufatanya nabo no kubayobora mu kuramya no guhimbaza Imana.

Ati “Nta kintu na kimwe nari muziho gusa nari nziko ari umuntu w’Imana ukomeye mfatanya nawe kuyobora mu kuramya Imana. Turamya Imana mu buryo butandukanye burimo n’indirimbo ziri mu Kizulu. Gentil atashye yabwiye umuvandimwe we Adrien Misigaro umuzungu yabonye uririmba mu Kizulu.’’

‘‘Nyuma twaje kongera guhura bose turamenyana tuba inshuti kugeza bantumiye mu gitaramo bakoreye mu Rwanda muri Werurwe 2019. Numvaga ninza mu Rwanda nziga Ikinyarwanda ni uko natangiye kukiga gake gake.”

Yavuze ko ubu azi amagambo menshi y’ururimi rw’Ikinyarwanda n’ubwo hashize igihe gito atangiye kucyiga ndetse akaba ari kugerageza kukiga cyane gashoboka.

Ati “Nzi Ikinyarwanda cyane rwose! Nkunda u Rwanda. Ni ahantu heza banyakiriye neza bwa mbere mpaza kurusha ahandi hose nagiye. Ndi gukora ku zindi ndirimbo z’Ikinyarwanda. Ngiye gukomeza nandike indirimbo ziri mu Kinyarwanda nkomeza no kwimenyereza ururimi. Ntekereza ko ari ururimi rwiza, kandi ndaruririmba nkanaruvuga.”

Evan Jarrell mu gihe yamaze mu Rwanda mu 2019, yakundaga kuba ari kuramya muri Prayer House ya Olivier Kavutse iherereye Kicukiro ndetse ni naho yagiye arushaho kwitoza kuvuga Ikinyarwanda.

‘Ushimwe’, indirimbo aheruka gushyira hanze yo yanditse amagambo yakoreshejwemo ndetse ashaka n’ijwi ryayo. Avuga ko yanditse iyi ndirimbo ariko agafashwa kunoza Ikinyarwanda cyayo neza na Gentil Misigaro na Adrien Misigaro basanzwe ari inshuti ze magara.

Evan Jarrell afite umugore n’abana b’abahungu babiri. Ni umuramyi akaba n’umwanditsi w’indirimbo. Yavutse muri Nzeri 1985 muri Santa Barbara muri California, akurira mu Majyaruguru yaho.

Yashakanye na Laura mu 2011. Ubu baba mu Mujyi wa Kirkland muri Washington muri Leta Zunze Ubumwe za Amerika. Yanyuze mu matsinda yo kuririmba, ayobora ayo guhimbaza ndetse anandika indirimbo kuva mu myaka 13 ishize.

Umunyamerika Evan Jarrell usanzwe ari umuramyi yatangiye gukora album y’indirimbo zizaba ziri mu rurimi rw’Ikinyarwanda
Evan ni umuzungu wiyemeje kuvuga ubutumwa bwo kuramya no guhimbaza Imana mu Kinyarwanda
Evan Jarrell ari mu bahanzi bafite inkomoko muri Amerika batangije umushinga wo gukora album y'indirimbo ziri mu Kinyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .