00:00:00 IGIHE NETWORK KN KINYARWANDA EN ENGLISH FR FRANCAIS

Uko ibibazo bitangwa mu bizamini bya ‘interview’ byahinduye isura mu 2022

Yanditswe na Zigiranyirazo Bajecteur
Kuya 14 April 2022 saa 06:59
Yasuwe :

Kuva mu mpera za 2019 ubwo hadukaga icyorezo cya COVID-19 kigakwirakwira ku Isi yose mu gihe gito, ibigo bikora imirimo itandukanye yaba iya leta cyangwa iy’ubucuruzi, byatangiye kureba ubundi buryo bushya bw’imikorere kubera ko bitari bigishoboka gukomeza gukorera mu murongo byari bisanganwe.

Hiyambajwe uburyo bw’imikorere aho abakozi bakora basimburana ku kazi hakaba umubare muto mu rwego rwo kubahiriza amabwiriza yo gukumira ikwirakwira ry’icyo cyorezo, abandi bakozi bagasabwa gukorera mu rugo ndetse hari n’abahagaritswe ku mirimo yabo nubwo muri iki gihe ibintu bisa n’ibigenda bisubira mu buryo.

Mu gihe ibintu bisa n’ibiri gusubira ku murongo, ibigo bikeneye gukomeza gukura no gutera imbere ari na yo mpamvu amatangazo y’akazi y’ahakenewe abakozi bashya, yongeye kugenda arumbuka ku mbuga n’ibinyamakuru binyuranye, kandi bitewe n’uko ibyo bigo byifuza abakozi bashoboye kuba babifasha kuzahuka; itangwa ry’ibizamini by’umwihariko ibikorwa mu buryo bw’ibazwa buzwi nka “interview”, ryajemo impinduka ku buryo hari ibibazo bishya byiyongereyemo cyangwa n’ibyabazwaga bikabazwa mu buryo butandukanye n’ubwa mbere.

Ibi ni bimwe mu byo ugomba kuba wujuje n’ibyo ugomba kujya uba witeguye gusubizaho mu gihe wakwicara mu ntebe ukoreshwa ikizamini cy’akazi mu buryo bwa “interview” nk’uko bigaragazwa na fastcompany.com.

Ibijyanye n’urukingo

Mu gihe abakozi bongera gusubira mu biro nk’uko byahoze, amabwiriza ateganya ko nibura bibiri bya gatatu by’abakozi bose bagomba kuba baramaze gufata inkingo za COVID-19 mu buryo bwuzuye. Ibi bisobanuye ko mu gihe wicaye mu kizamini ubazwa, ugomba kuba witeguye ko uri busubize ku kibazo cy’aho uhagaze ku bijyanye n’urukingo rwa COVID-19 niba waramaze gukingirwa cyangwa se bitaraba.

Itumanaho

Christy Pruitt-Haynes, ukora nk’umujyanama mu bigo by’ikoranabuhanga bikomeye birimo Netflix, Microsft na Zoom; avuga ko gahunda yo gukorera mu ngo no kuba ibikorwa byinshi bisigaye bikorwa hifashishijwe uburyo bw’ikoranabuhanga, umuntu uri mu kizamini cy’akazi agomba kuzajya aba yiteguye gusubiza ku bushobozi bwe mu gukoresha ibikoresho by’ikoranabuhanga, uburyo agerageza gutangamo amakuru kandi akabikora ku gihe no ku bantu bose bagomba kugerwaho n’ubutumwa runaka bugomba gutambutswa.

Kuri iyi ngingo, Haynes avuga ko wakwitega kubazwa ku bushobozi bwawe mu kumenya kuganiriza umuntu umwe cyangwa imbaga kandi ukabasha kumenya niba buri wese yacengewe n’ubutumwa watangaga.

Amahitamo yawe n’ibyo ukeneye

Abakoresha bagenda basobanukirwa ko gukoresha umukozi bazi ibyo yishimira mu gihe ari mu kazi, bazi n’ibyo yumva byamubera imbogamizi; ari kimwe mu bituma umukozi wabo atanga umusaruro bamwifuzamo bigatuma bagira umukozi wishimye kandi na bo bakagera ku ntego zabo.

Bimwe mu bibazo wakwitega ku kijyanye n’iyi ngingo mu gihe ugiye mu kizamini, harimo kukubaza iminsi uba wumva yagushobokera kugira ngo ubashe kujya ku kazi mu buryo bw’imbonankubone, kukubaza ku mukoresha mwaba mwarigeze gukorana n’uburyo yagukoreshagamo bukakunyura kurusha ubundi hamwe n’ibindi bibazo bigamije gutuma basobanukirwa ibyo ukunda mu kazi kugira ngo ubashe gutanga umusaruro.

Ibindi bibazo bitabura kugarukwaho mu bizamini by’akazi muri uyu mwaka wa 2022 harimo icyo gusubiza niba witeguye kuba wahita uboneka igihe bibaye ngombwa ko ujya gukorera mu biro kandi wari usanzwe ukorera mu rugo, kuba uri umuntu ushobora kwakira impinduka mu mikorere mu gihe zibayeho ndetse no kuba wumva neza umumaro wo gukorana n’abandi, kutagira ivangura no gusumbanisha abakozi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .