Ubwoko butanu bw’impeta bukunzwe n’abasore bo mu Rwanda bashaka gutera ivi (Amafoto)

Yanditswe na Mukahirwa Diane
Kuya 17 Mutarama 2021 saa 11:33
Yasuwe :
0 0

Impeta ni ikintu gikomeye cyane mu rukundo kuko ni ikimenyetso cyerekana igihango gikomeye kiri hagati y’abakundana. Umwe mu minsi ikomeye y’abakundana ni igihe umusore yambitse umukobwa impeta.

Umusore afata umwanzuro wo kwambika umukobwa impeta iyo amaze kumushima muri byose yumva ko yamaze kumuhitamo ngo azamubere umugore akamwambika impeta imusaba ko bazabana.

Uyu muhango wo kwambikana impeta mu Rwanda bakunze kwita gutera ivi watangiye kubaho mu kinyejana cya 20 aho watangiriye mu bihugu by’I Burayi ariko ugenda ukwirakwira ku Isi hose.

Mu Rwanda kimwe no mu bindi bihugu kwambika umukobwa impeta umusaba ko muzabana bimaze kuba umuco kubitegura ku rushinga aho byabaye nk’ikimenyetso cy’integuza y’ubukwe.

Ku Isi hose usanga bambikana impeta z’ubwoko butandukanye bitewe n’amahitamo y’abantu ariko inyinshi ziba zikoze muri zahabu, umuringa n’ifeza.

Mu busanzwe impeta zibamo amoko menshi biterwa n’icyo isobanuye, kuko habaho izo abashyingiranwe bambara, hakabaho izo kwambara byo kurimba gusa ndetse n’iyo umusore yambika umukobwa amusaba kuzamubera umugore.

Iyi mpeta umusore yambika umukobwa ikiyigaragaza ni ukuntu iba iteye aho iba irimo ibuye rito riyirimbishije rizwi nka ‘Zirconia’, nicyo kiyigaragaza kuko impeta z’umurimbo ntabwo ziba zirimo iryo buye.

Umucuruzi w’imitako y’ubwiza, Irumva Magnifique yabwiye IGIHE ko impeta zibamo ubwoko bwinshi ariko umuntu ahitamo agendeye kucyo akunda cyangwa n’iri bumubere.

Yagize ati “Ubundi impeta zibamo amoko menshi ariko umuntu ahitamo bitewe n’icyo akunda cyangwa n’ibereye ugiye kuyambara. Ubundi Zahabu zibera abantu b’inzobe naho izikoze mu Ifeza cyangwa Umuringa zibera abantu birabura.”

Yakomeje avuga ko mu Rwanda abenshi bagura izikoze mu Ifeza kuko ari zo ziri ku giciro cyo hasi ugereranyije n’iza Zahabu.

Ibiciro by’impeta bigenda bitandukana bitewe n’icyo ikozemo aho usanga izikoze mu Ifeza ziba zigura hagati y’ibihumbi 100 Frw n’ibihumbi 150 Frw kuzamura, naho izikoze muri Zahabu usanga ziba zigura hagati y’ibihumbi 350 Frw na 450 Frw kuzamura.

Impeta za Diamant ntabwo zipfa kuboneka mu Rwanda gusa uyikeneye ashobora kugana abacuruzi bazo bakayimutumiriza, aho umuntu ashobora kuyibona kuri miliyoni 5 Frw.

IGIHE yabateguriye ubwoko butanu bw’impeta bugezweho kurusha ubundi abasore bari kwambika abakunzi babo muri iyi minsi.

Emerald engagement ring

Emerald ni impeta iba igizwe n’impande enye ebyiri zingana ikaba irimo ibuye rinini rya zirconia ndetse n’utundi duto twayo turi ku muzenguruko wayo. Iyi mpeta isobanura ko urukundo rwanyu rukomeye cyane.

Iyi mpeta uyiha umukobwa mu kumwereka ko ariwe wahisemo kandi ariwe utezeho amahoro n’ibyishimo by’ubuzima bw’iteka kandi ko wifuza kuzarambana nawe iteka ryose.

Iyi ni Emerald engagement ring ikoze muri Zahabu ikaba isobanura ko urukundo rwanyu ntacyaruhungabanya

Pear engagement ring

Pear ring ni impeta iba ari mpande eshatu ikabamo ibuye rinini rya zirconia. Izi mpeta ziba zikozwe muri Zahabu cyangwa mu Ifeza biterwa n’icyo uyigura akunda.

Iyi mpeta isobanura amarira y’urukundo ihabwa umukobwa udakunda kugira ibintu bisa n’iby’abandi kandi ufite aho yigejeje, umukobwa w’umukozi cyane, umuhungu ayikwambika agira ngo amwereke ko yifuza umugore ukomeye nka we.

Pear engagement ring isobanuye amarira y'urukundo, ihabwa umukobwa w'umukozi cyane

Cushion engagement ring

Cushion ni impeta iba ikoze muri Zahabu cyangwa mu Ifeza ikaba ari mpande enye ndetse irimo rya buye. Iyi mpeta isobanura imbaraga n’urukundo. Bivuze ko uyihaye umukobwa biba bisobanuye ko urukundo rwanyu rufite imbaraga kandi ko witeguye kubana na we ubuzima bwose.

Iyi ni Cushion engagement ring, isobanura ko urukundo rwanyu rufite imbaraga zidasanzwe

Round engagement ring

Round ni impeta ikoze mu buryo bw’uruziga iriho rya buye ry’umutako naryo ry’uruziga. Iyi mpeta iri mu zikunzwe cyane n’abantu bakunda ibintu bituje kuko iba itarimbishijwe cyane.

Iyi mpeta isobanura icyizere n’ubunyangamugayo. Bisobanuye ko ihabwa umukobwa w’umwizerwa, umukunzi wawe nagusaba ko muzabana n’iyi mpeta uzamenye ko akwizera cyane.

Round engagment ring isobanuye icyizere. Uyambika umukunzi wawe iyo ari wa muntu w'umwizerwa cyane

Marquise engagement ring

Marquise ni impeta iba ikoze mu buryo bw’uruziga ariko isongoye hasi no hejuru. Iyi mpeta iboneka mu bwoko butandukanye haba muri Zahabu na Feza.

Ni impera ikunda kwambikanwa hagati y’abantu bafite inkuru y’urukundo idasanzwe ndetse bahuye mu buryo butangaje. Iyi mpeta akenshi ihabwa umukobwa ukunda kurangwa n’udushya cyangwa ari wa muntu uzwi cyane ari icyamamare.

Marquise engagement ring ikunze kwambikwa abakobwa b'ibyamamare bafite inkuru y'urukundo idasanzwe
Impeta za Zahabu usanga zifite igiciro kiri hejuru
Impeta za Zahabu zikunda kubera abantu b'inzobe
Impeta ziboneka mu moko atandukanye uhitamo bitewe n'icyo uzayambara akunda
Impeta zikose muri Feza zibera abantu birabura
Iri buye riri hajuru kuri iyi mpeta niryo bita Zirconia, rigaragaza impeta yo gusaba umukobwa ko muzabana

Amafoto: Igirubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .