Ubushakashatsi: Ingaruka kwangirika k’ubwonko bigira ku mivugire zitandukana bitewe n’ururimi

Yanditswe na Iradukunda Serge
Kuya 17 Mutarama 2020 saa 07:46
Yasuwe :
0 0

Itsinda ry’abashakashatsi bo muri San Fransico berekanye ko hari ikinyuranyo hagati y’uburyo abantu bavuga Icyongereza n’Igitaliyani bagerwaho n’ingaruka ziterwa n’indwara zangiza ubwonko (dementia).

Dementia ni imihindagurikire mu mivugire, imyitwarire n’imikorere y’ibindi bice by’umubiri biterwa n’uko igice runaka cy’ubwonko cyangiritse.

Iyo igice cy’ubwonko cyangiritse ari icy’inyuma umuntu ashobora kugira ibibazo mu kureba bityo akaba yagorwa no gusoma ndetse n’ibindi bikorwa bisaba kwitegereza cyane.

Iyo ibice by’ubwonko byangiritse ari ibyo mu mpande (iburyo n’ibumoso) umuntu ashobora kugira ikibazo mu kuvugana n’abandi n’uburyo akoresha ururimi.

Ikipe y’abashakashatsi bo muri San Fransisco muri Leta Zunze Ubumwe za Amerika bagaragaje ko izi mpinduka zigaragara mu mivugire bitewe n’iyangirika ry’ubwonko zigenda zitandukana bitewe n’ururimi umuntu yari asanzwe avuga.

Aba bashakashatsi bavuga ko abasanzwe bakoresha Icyongereza bagira ikibazo mu kuvuga neza amagambo mu gihe abavuga Igitaliyani bagira ikibazo cyo kuvuga interuro ngufi kandi zitarimo ikibonezamvugo gikomeye.

Ubu bushakashatsi bwakorewe ku bantu 38 bafite iki kibazo aho 20 bavugaga Icyongereza n’aho 18 bakavuga Igitaliyani.

Ibyuma byerekanaga ko aba bantu bose uburwayi bwabo buri ku kigero kimwe ariko hakibazwa impamvu ingaruka byabateye mu mivugire zitandukanye.

Umwe mu bagize iyi kipe akaba n’umwarimu wigisha isomo ry’imikorere y’ubwonko, Maria Luisa Gorno-Tempini yavuze ko ibi biterwa n’imiterere y’ingombajwi zo mu Cyongereza.

Yagize ati “Turatekereza ko ibi biterwa n’ingombajwi zikurikirana mu ijambo nta nyajwi ijemo hagati, zikunze kugaragara mu Cyongereza, ibi biteza ikibazo mu mikorere y’uburyo bugena uko umuntu akurikiranya ibyo avuga.”

Yongeyeho ko abavuga Igitaliyani batagira ikibazo mu kuvuga neza ijambo kuko cyoroshye ku kivuga.

Ati “Ku rundi ruhande, Igitaliyani cyoroshye kukivuga, gusa kikagira ikibonezamvugo gikomeye akaba aribyo bitera abavuga Igitaliyani guhura n’ingorane.”

Iyi kipe y’abashakashatsi irateganya kwagura ubushakashatsi bukagera no mu zindi ndimi nk’Icyarabu n’Igishinwa ndetse bugafasha abantu kumva neza imikorere y’ubwonko ku bijyanye n’ururimi kugira ngo abafite iki kibazo barusheho kwitabwaho.

Uretse kunanirwa kuvuga neza, kimwe mu bindi bimenyetso biranga umuntu ufite Dementia harimo kwibagirwa, gucanganyikirwa, guhindura imyitwarire no kugira ibibazo mu bijyanye n’imitekerereze.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza