00:00:00 IGIHE NETWORK KN KINYARWANDA EN ENGLISH FR FRANCAIS

Ubushakashatsi bwagaragaje ko abagabo baca inyuma abo bashakanye kurusha abagore

Yanditswe na Idukunda Kayihura Emma Sabine
Kuya 6 Mutarama 2023 saa 03:11
Yasuwe :

Ubushakashatsi bwakozwe n’Umuryango Institute for Family Studies (IFS) wo muri Virginia wigisha ibijyanye n’imibanire myiza y’abashakanye, bugaragaza ko umubare w’abagabo baca inyuma abagore babo ari bo benshi, ugereranyije uko abagore baca inyuma abagabo babo.

Imibare igaragaza ko 20% by’abagabo bakora imibonamo mpuzabitsina n’undi muntu w’igitsinagore utari uwo bashakanye, mu gihe abagore bayikora n’umuntu w’igitsinagabo utari uwo bashakanye ari 13%.

Ubushakashatsi bwakozwe hagati ya 2010 na 2016 butangazwa ku rubuga Discreet Investigation and Security, bugaragaza ko n’ubwo abagabo ari bo baca inyuma cyane abagore bashakanye, abagore bari hagati y’imyaka 18 na 29 baba batanyuzwe n’abagabo babo ku kigero cya 11%, mu gihe uw’abagabo uri hasi ku 10%.

Hagati ya 2000 na 2009 abagabo 29% bari hagati y’imyaka 60 na 69 bagaragaweho no kutanyurwa n’abagore bashakanye babaca inyuma, mu gihe abagore 17% bari hagati y’imyaka 50 na 59 ari bo babikoze.

Mu 2020 ISF yashyize hanze ubushakashatsi bushya, igaragaza ko abagabo 20% bemeye ko baca inyuma abo bashakanye, mu gihe abagore babyemeye ari 10%.

Ni ryari umugabo cyangwa umugore abwira uwo bashakanye ko yamuciye inyuma?

Mu mwaka wa 2021, abantu 441 babajijwe igihe byabatwaye kugira ngo babwire abo bashakanye ko babaciye inyuma.

Abagera kuri 47.7% by’ababajijwe, basubije ko babivuze mu cyumweru bakoreyemo icyo gikorwa cyo guca inyuma abo bashakanye, naho 26.6% bavuga ko byabatwaye ukwezi kugira ngo babivuge, ni mu gihe 25.7 byabatwaye amezi atandatu cyangwa anarenga.

Mu bo byatwaye icyumweru kimwe, 48% bari abagore, naho 46.9% bari abagabo. Abo byatwaye ukwezi, 26% bari abagore, ni mu gihe 27.4% bari abagabo.

Abavuze ko byabatwaye amezi atandatu kugira ngo babwire abo bashakanye ko babaciye inyuma, 26% bari abagore, naho abagabo bo bari 25.7%.

Ubu bushakashatsi bwa IFS bugaragaza ko ku myaka 30 kugeza kuri 39, ari bwo imibare y’abatanyurwa n’abo bashakanye itangira kwiyongera. Bugaragaza ko 14% by’abagabo bo muri iyo myaka ari bo baca inyuma abagore bashakanye, naho 11% bo mu kigero nk’icyo akaba ari bo baca inyuma abagabo babo.

Bwongera kugaragaza ariko ko mu myaka 60 ari bwo umubare w’abagabo batanyurwa n’abo bashakanye bakabaca inyuma wiyongera cyane ku kigero cya 24%, iyo mibare igakomeza kwiyongera ku myaka hagati ya 70 na 79, ku kigero cya 26%.

Mu bagore bari mu myaka 60, abaca inyuma abo bashakanye ni 16%, ariko bo uko imyaka yiyongera ni nako bagabanya guca inyuma abagabo babo kuko abafite imyaka 70 babikora ku kigero cya 13%, naho abafite imyaka 80 bakabikora ku kigero cya 6%.

Ubushakashatsi bwa IFS kandi bugaragaza ko uburyo bwo guhuza abantu ngo bakundane hifashishijwe imbuga nkoranyambaga, biri mu byongera ugucana inyuma hagati y’abashakanye, kuko izo mbuga ari zo benshi bakuraho abakunzi bashya kandi bakiri mu rushako.

Ubu bushakashatsi bwakozwe muri 2020 bugaragaza ko uku gukoresha imbuga nkoranyambaga abantu bashakiraho abakunzi, byiyongereye cyane ubwo ibihugu byinshi ku isi byari muri gahunda ya Guma mu Rugo kubera icyorezo cya Covid-19.

Wagumana n’uwo mwashakanye nyuma yo kuguca inyuma ukabimenya?

Umujyanama mu mitekerereze wo muri Virginia, Luann Olivier, avuga ko kugumana kw’abashakanye kandi umwe azi ko mugenzi we yamuciye inyuma biterwa na bo ubwabo.

Avuga ko hari abahitamo gusasa inzobe uwahemutse agasaba imbabazi akanahinduka, n’uwahemukiwe akazitanga bakamera nk’abatangiye umubano wabo bundi bushya bakibagirwa ibyahise, mu gihe abandi bananirwa kugarurira icyizere abo bashakanye bagahitamo gutandukana na bo.

Urubuga Discreet Investigation rugaragaza ko gucana inyuma kw’abashakanye ari ikintu gikomeje gufata intera iri hejuru kuruta uko abantu babitekereza, kuko abakorerwaho ubushakashatsi ari bake kurusha uko iki kibazo ari kinini.

Ukira ute igikomere watewe no kumenya ko waciwe inyuma?

Ubushakashatsi bwa IFS bugaragaza ko udakwiriye kwicira urubanza ngo wumve ko kuba uwo mwashakanye yaguciye inyuma ari amakosa yawe.

Aho kwicira urubanza, bakubwira ko ukwiriye gushaka uburyo bwiza bwagufasha gukira icyo gikomere, ndetse ukanatekereza niba wumva ushaka kuguma muri urwo rushako cyangwa ukaruvamo.

Ikindi bakubwira cyagufasha ni ugushaka abajyanama mu mitekerereze bakagufasha, kuganira n’abo mu muryango wawe ndetse no kuganira n’inshuti zawe wizera.

Zimwe mu mpamvu zigaragazwa n’ubushakashatsi zituma benshi baca inyuma abo bashakanye, harimo kuba uwaciye inyuma yarabaswe no gukora imibonano mpuzabitsina n’abantu batandukanye mbere yo kujya mu rushako, ibibazo byo mu mutwe, ibikomere byo mu bwana, no kuba umwana yarakuze abona umwe mu babyeyi be aca inyuma mugenzi we bikamuviramo kuzabikora na we ageze mu rushako.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .