00:00:00 IGIHE NETWORK KN KINYARWANDA EN ENGLISH FR FRANCAIS

Ubushakashatsi bwagaragaje isano iri hagati y’iyangirika ry’ikirere na Covid-19

Yanditswe na Zigiranyirazo Bajecteur
Kuya 14 May 2022 saa 06:56
Yasuwe :

Nk’uko byari bimenyerewe, ubushakashatsi bugaragaza ko kudakingirwa byuzuye byongera ibyago byo kwandura icyorezo cya COVID-19, mu gihe gusaza, umubyibuho ukabije cyangwa umubiri ukunda guhindurwa kenshi bishobora kongera ibyago byo kuzahazwa n’icyi cyorezo.

Kuri ubu, abashakashatsi bavuga ko indi mpamvu ishobora kongera ibyago byo kwandura icyorezo cya Covid-19, ari ukuba umuntu yahumeka umwuka wanduye muri iki gihe Isi ihanganye n’imihindagurikire y’ibihe no kugabanya imyuka ihumanya ikirere.

Ibimenyetso byinshi bigaragaza ko hari isano nini iri hagati yo guhumeka umwuka uhumanye n’ibyago byo kwandura Covid-19, uburwayi bukomeye ndetse no kuba umuntu yahitanwa n’icyo cyorezo.

Nubwo ubwinshi mu bushakashatsi bwakozwe bwari bwaribanze gusa ku by’ingaruka z’igihe kirekire ku bantu bahumeka umwuka wanduye, abahanga mu bya siyansi bavuga ko hari kugenda hagaragara ibindi bimenyetso byerekana ko hashobora no kubaho ingaruka z’igihe kigufi ku bantu batabasha guhumeka umwuka mwiza.

Ubushakashatsi bwakorewe ku bantu 425 bari hagati y’imyaka 20 na 40 muri Suède, bwagaragaje ko guhumeka umwuka wanduye byongera ibyago byo kwandura virusi ya SARS-Cov-2 ari na yo itera Covid-19, ibi bikaba byagaragaye cyane ku bari mu kigero cy’imyaka 25 mu gihe ubushakashatsi bwakundaga kugaragaza gusa ko abafite ibyago ari abakuze n’abakiri bato cyane.

Ibyagaragaye mu bushakashatsi byitezweho gutuma abantu baba maso bakamenya ko buri wese afite ibyago hadashingiwe ku kigero cy’imyaka arimo nk’uko bishimangirwa na Erik Mélen, umwarimu mu ishami ry’ubuvuzi rya Kaminuza ya Karolinska muri Suède.

Zhebin Yu wayoboye ubu bushakashatsi, yatangaje mu ikorwa ryabwo bibanze ku bantu batakingiwe mu ntango z’icyorezo cya Covid-19, ndetse ko ubushakashatsi bwabo butageze ku bantu bakingiye cyangwa se abigeze kwandura ubwoko bwa Coronavirus yihinduranya nka Omicron.

Ubu bushakashatsi buheruka gukorwa bwagaragaje ko guhumeka umwuka wanduye byorohereza virusi kwinjira vuba mu mubiri no mu tunyangingo imbere ndetse bikanahungabanya imikorere y’abasirikare b’umubiri nk’uko byavuzwe na McCormark wigisha muri Kaminuza ya John Hopkins.

Byitezwe ko ubu bushakashatsi buri bukomeze kuba nk’imbarutso ifasha abatuye isi kuzirikana umumaro wo gukomeza kubungabunga ikirere no guhumeka umwuka mwiza.

Ubushakashatsi butandukanye bukomeje guhuza iyanduzwa ry'ikirere n’ibyago bya Covid-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .