00:00:00 IGIHE NETWORK KN KINYARWANDA EN ENGLISH FR FRANCAIS

Ubushakashatsi bwagaragaje imikino ishobora kurinda abana ibibazo byo mu mutwe

Yanditswe na IGIHE
Kuya 28 May 2022 saa 08:53
Yasuwe :

Ubushakashatsi bwakozwe na Kaminuza ya Exeter yo mu Bwongereza, bwagaragaje ko gukinisha abana imikino ishobora kubatera ubwoba ariko idakanganye cyane, bituma batinyuka kandi bishobora kugira ingaruka nziza ku mitekerereze yabo, ikaba yazabarinda kugira umuhangayiko n’agahinda gakabije mu gihe bazaba bakuze.

Ubu bushakashatsi bwakorewe ku babyeyi 2500 bafite abana bari mu kigero cy’imyaka itanu na 11, bwari bugamije gusuzuma imvugo zakunze kugaragaza ko abana bagize umwanya wo gukina imikino isa nk’iteye ubwoba, bakurana ubushobozi bwo guhangana n’ibibazo birimo agahinda gakabije kurusha bagenzi babo batakinnye iyo mikino.

Iki gitekerezo cyaturutse ku mpungenge zakunze kugaragazwa n’ababyeyi, zivuga ko kuba abana bo muri iyi minsi batakibona umwanya uhagije wo gukina imikino irimo kurira ibiti, kugenda ku igare, gusimbuka ahantu harehare, kwijyana mu mwijima n’indi mikino nk’iyo, bisigaye bituma badakurana ubushobozi bwo kwihagararaho mu gihe bahuye n’ibibazo.

Kimwe mu bisubizo byatangajwe, ni uko abana bagira umwanya wo gukina iyo mikino, bagira ubushobozi bwo guhangana n’ibibazo birimo umuhangiyiko, ndetse no mu gihe cya Covid-19, ubwo benshi mu bana bamaraga igihe kinini batisanzura ndetse batanajya ku ishuri, abana bari basanzwe bakina iyo mikino bari bafite ibyishimo kurusha abana batayikina.

Prof. Helen Dodd, umwarimu w’imitekerereze y’abana muri Kaminuza ya Exeter, yavuze ko nk’ababyeyi “Dukunze guhangayikishwa n’ubuzima bwo mu mutwe bw’abana bacu, ubu bushakashatsi bwerekanye ko dushobora kugira uruhare mu gufasha abana bacu kugira imitekerereze myiza binyuze mu mikino bakina.”

Yongeyeho ko “Abana n’abakiri bato bakeneye uburenganzira n’amahirwe yo guhura n’ibintu bibabera imbogamizi ariko biri mu mikino ya buri munsi…bituma bagira umuco wo guhangana n’ibibazo iyo bakuze muri rusange.”

Imwe mu mikino abana bashobora gukina bakiri bato ikabafasha gutinyuka harimo gusimbuka ahantu harehare (ariko hatatuma bavunika), gukina imikino yo kwihisha, imikino ituma umwana atekereza ku buryo yakwikura mu bibazo, imikino irimo kunyonga igare, kuboneza mu kintu runaka n’indi ishobora gutuma umwana atekereza uburyo ari buyitsinde ariko bitamworoheye.

Ababyeyi baragirwa inama yo kugira uruhare mu gufasha abana babo gukina, ntibakunde kubarekera mu nzu aho bamara umwanya munini kuri televiziyo, ahubwo bakagira umwanya wo kubonana na bagenzi babo bakishimana kuko ibi bituma bagira ubuzima bwiza n’iyo bamaze gukura.

Ababyeyi kandi bagirwa inama yo kudacyaha abana mu buryo buhoraho, ahubwo bakaba amahirwe yatuma biga kwikorera ibintu runaka, kabone niyo byasaba ko abana babanza kubona amakosa.

Ni byiza kandi kwereka umwana ko ibyo yakoze wabihaye agaciro, ukamufasha mu bimugora ndetse ugahora umuha icyizere, kuko bituma nawe agikurana, akazaba umuntu ushobora kwirwanaho mu Isi y’ahazaza.

Ni byiza na none kwigisha abana ibirimo gucuranga umuziki, gusoma ibitabo ndetse no kugenzura ubushobozi bw’umwana, impano afite igatangira gushyigikirwa akiri muto. Nk’urugero, niba umubyeyi abonye ko umwana azi kuririmba, ni ngombwa kubimufashamo nubwo we yaba atabikunda.

Imikino isaba imbaraga ni myiza ku bana kuko ishobora kubarinda kuzagira ibibazo mu mutwe mu bihe biri imbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .