00:00:00 IGIHE NETWORK KN KINYARWANDA EN ENGLISH FR FRANCAIS

Uburyo kwiyiriza ubusa bishobora gufasha umubiri wawe gukora neza

Yanditswe na Sonia Umuhoza
Kuya 6 July 2022 saa 10:20
Yasuwe :

Kenshi iyo abantu bavuze kwiyiriza ubusa, twumva ko ari igikorwa cy’abantu basenga Imana, bagikora kugira ngo bicuze cyangwa se Imana ibarebe neza, ariko muri rusange ntigifatwe nk’igikorwa kitureba twese.

Ku ruhande rumwe ibi birumvikana kuko umuntu atungwa n’ibyo yariye, icyakora ubushakashatsi butandukanye mu bihe bitandukanye bwakunze kugaragaza ko kuba umuntu yamara amasaha runaka atariye, wenda agasimbuka ifunguro rya Saa sita, ari ibintu bishobora kugira ingaruka nziza ku buzima bwe muri rusange.

Impamvu ni uko kumara igihe umuntu atariye bituma umubiri we ukora mu buryo utari usanzwe ukora iyo yariye, kandi ubwo buryo bukaba bushobora kuwugirira akamaro. Nk’urugero, mu gihe umuntu atariye, umubiri we ubona uburyo wisukura, ukivanamo acide n’indi myanda ishobora kuba yawangiza. Ibi bishoboka kuko iyo umuntu atariye, utunyangingo twe (cells) duhindura imikorere tukabasha gusukura umubiri w’umuntu.

Ikindi ni uko iyo umuntu atariye nko mu gihe cy’amasaha 12, umubiri we utangira gukoresha isukari wifashishije ibinure wabitse n’ibindi bitandukanye, ibi bikaba byagabanya ibyago byo kuba umuntu yarwara indwara zirimo umutima cyangwa se akagira umuvuduko ukabije w’amaraso.

Ku rundi, kwiyiriza ubusa binagira ingaruka nziza ku bantu bafite umubyibuho ukabije kuko bishobora gutuma ugabanuka, kandi ntibigire ingaruka mbi ku buzima bwabo. Mu bihe bya nyuma byo kwiyiriza ubusa, umubiri utangira gukora ibizwi nka ‘Ketosis’, igikorwa cy’aho umubiri ukoresha ibinure wibitsemo nk’isoko ya mbere y’ingufu zawo. Ibi bigira ingaruka nziza kuko biringaniza isukari iri mu mubiri, bityo ibyago byo kurwara indwara nka diabetes nabyo bikagabanuka.

Iki gikorwa kandi kigira ingaruka nziza ku mikorere y’ubwonko, kikagabanya ibyago byo kurwara indwara zirimo iz’amara, igifu n’ibindi bice bifasha mu igogora ry’ibiryo ndetse n’ibindi byinshi.

Muri rusange, kwiyiriza ubusa bigira umumaro nk’uwo imyitozo ngororamubiri igira ku buzima, kuko binatuma umubiri ugira ubushobozi utari usanganywe mu gihe umuntu yiyiriza mu buryo bukwiriye. Ni nk’igikorwa cyo gutoza umubiri muri rusange.

Hari ubushakashatsi bwakorewe ku mbeba bwagaragaje ko kwiyiriza ubusa bishobora kugira ingaruka mu gukumira cancer, kandi ko ’uturemangingo twa cancer’ tubangamirwa no kwiyiriza nk’uko bigenda ku buvuzi bwa ’chemotherapy.’

Mu magambo make, kwiyiriza ubusa mu gihe kirekire, wenda nk’umunsi umwe mu cyumweru mu gihe cy’imyaka itatu, bishobora kugira ingaruka nk’iz’ubuvuzi bwa chemotherapy.

Uburyo bukwiriye bwo kwiyiriza butangwaho inama ni ukumara nibura amasaha 12 umuntu nta kintu arya, ariko akaba yanywa amazi cyangwa utundi tuntu tworoheje. Icyakora ibi biterwa n’umuntu kuko hari n’abamara amasaha 18 ndetse na 24, icyo abaganga batangaho inama ni ukutarengera kugera ubwo wumva umubiri wawe watangiye gucika intege bikabije.

Igihe bigenze gutyo, ni byiza gushaka uburyo ufata ifunguro, cyangwa mu gihe uteganya kwiyiriza by’igihe kirekire, ukajya unyuzamo ugafata utuntu two kurya nk’imbuto, ukaba wanywa ‘jus’ n’ibindi nk’ibyo.

Ikindi cy’ingenzi ni uko atari byiza kwiyiriza mu gihe uri gukora akazi k’imbaraga nyinshi, kuko ibi bishobora gushyira umubiri mu kaga. Ni byiza kubikora mu gihe ufite akazi gake, kandi wizeye ko uri bubone umwanya uhagije wo kuruhuka. Muri make wajya ubiteganya uzi neza ko uri buruhuke bihagije.

Ikindi cy’ingenzi ni ukumenya ko atari byiza kwiyiriza mu gihe uri gufata imiti cyangwa se ufite ubundi burwayi. Mu gihe wifuza kubikora kandi umeze utyo, ni ngombwa kubijyaho inama na muganga wawe. Abagore batwite n’abonsa bo babujijwe gukora iki gikorwa, kereka gusa igihe babisabwe n’abaganga.

Kwiyiriza ubusa bishobora kugira ingaruka nziza ku buzima bwawe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .