00:00:00 IGIHE NETWORK KN KINYARWANDA EN ENGLISH FR FRANCAIS

Uburyo bwiza bwo kugabanya ibyago byo kurwara kanseri y’ibere

Yanditswe na Sonia Umuhoza
Kuya 19 July 2022 saa 04:25
Yasuwe :

Kugira ngo ibyago byo kwandura kanseri bigabanuke, ni ngombwa gufata ingamba zitandukanye mu mibereho zirimo nko guhindura uburyo bw’imibereho wirinda inzoga, itabi n’ibindi byangiza ubuzima.

Mu 2020, ishami ry’Umuryango w’Abibumbye ryita ku Buzima, OMS, ryagaragaje ko mu bagore bagera kuri miliyoni 2,3 basanganywe kansri y’ibere, abagera ku bihumbi 685 yarabahitanye ku isi hose.

Mu mpera za 2020 abagore bagera kuri miliyoni 7,8 bari bamaranye imyaka igera kuri itanu kanseri y’ibere byatumaga ari bwo bwoko bwa kanseri bugaragara mu batuye isi ku gipimo cyo hejuru.

Imibare y’abarwara kanseri mu Rwanda naho igenda yiyongera, abantu 5 900 mu mwaka wa 2014 barwaye kanseri y’ibere, igera ku bantu 6.044 mu mwaka wa 2020.

Ibyo wakora ngo ugabanye ibyago byo kurwara kanseri

Komeza kugenzura ibiro byawe

Kugira umubyibuho ukabije bishobora kongera ibyago bya kanseri nyinshi zitandukanye, harimo na kanseri y’ibere cyane cyane nyuma yo gucura. Ni byiza rero kugenzura ibiro byawe kugira ngo bitiyongera ku rugero rwo hejuru.

Niba ushaka kugabanya ibiro ushobora kwitabaza muganga ukamugisha inama ku ntambwe zagufasha kubigeraho.

Ushobora no kugabanya ingano y’amafunguro ufata buri munsi kandi ukongera imyitozo ngororangingo ukora.

Jya ukora cyane

Ni byiza gukora imyitozo ngororangingo byibuze iminota 30 ku munsi ku bagore kuko igabanya ibyago byo kurwara kanseri y’ibere.

Imenyereze kurya imbuto n’imboga kandi ugabanye inzoga

Indyo nziza ishobora gufasha kugabanya ibyago byo kurwara kanseri y’ibere. Gerageza kurya imbuto n’imboga nyinshi kandi ugabanye inzoga.

Uko unywa inzoga nyinshi ni ko wongera ibyago byo kurwara kanseri y’ibere.

Hagarika kunywa itabi

Hejuru y’izindi ngaruka nyinshi z’ubuzima, kunywa itabi bitera byibura kanseri 15 zitandukanye harimo na kanseri y’ibere. Niba unywa itabi, gerageza kubireka vuba bishoboka.

Konsa niba bishoboka

Konsa umwaka umwe cyangwa urenga bigabanya ibyago byo kurwara kanseri y’ibere. Bifite kandi akamaro kanini ku buzima bw’umwana ndetse n’umubyeyi bikamurinda kurwara iyi kanseri.

Byagaragaye ko kanseri y’ibere ifite ubukana buri hejuru cyane niyo kanseri ikomeye kurusha izindi zose zo mu bundi bwoko.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .