Ubuhamya bw’umwana w’imyaka umunani wamaze imyaka itatu asambanywa na se

Yanditswe na Tuyishimire Raymond
Kuya 28 Mutarama 2021 saa 12:17
Yasuwe :
0 0

Ni ibintu bigoye kwiyumvisha ko umubyeyi yatinyuka gusambanya umwana we yibyariye akwiye kuba aha uburere ndetse n’ indangagaciro.

Si amakabyankuru byarabaye! Umubyeyi ufite umwana witwa Life (izina ryahinduwe ) , aherutse kuganira n’umuhanzi Gahongayire Aline, asobanura uburyo umwana we yasambanyijwe na se, bikaba byarabasigiye igikomeye gikomeye.

Umuhanzi Gahongayire asanzwe afite gahunda yo kurwanya ihohoterwa no gufatwa ku ngufu ku bana b’abakorwa yise Mimi Zawadi ya Afrika".

Uwo mubyeyi yavuze ko Life w’imyaka umunani yasambanyijwe n’uwari umubereye Se mu bihe bitandukanye ndetse akamutera ubwoba ko nabivuga azamwica.

Mama Life yagaragaje intimba ikomeye n’ubuzima bushaririye yanyuzemo ubwo yageragezaga guhishira ihohoterwa ryakorerwaga umukobwa we nubwo byagezeho akagaragaza icyaha.

Ibi byose byabaye nyuma y’aho umugabo bari barashakanye ndetse bakabyarana uyu mwana w’umukobwa, yitabye Imana mu 2005. Yaje kurera uyu mwana kugeza mu 2013 aho yaje gusanga undi Mugabo,ari we waje kumusambanya.

Mu buhamya bwe, avugana umubabaro ndetse anasuhuza umutima, bitewe n’agahinda yatewe n’umugabo we. Yavuze ko bwa mbere byatangiye abona imyitwarire y’umugabo we idasanzwe ku mwana,kuko yamushukishaga kumwereka filime kugira ngo amusambanye.

Ati” Bigeze mu 2014 byaje guhindura isura nkabona ntabwo amufata nk’umwana. Rimwe na rimwe nazaga ntashye mvuye mu kazi, we yatashye kare nkasanga bashyizeho filime z’abantu barwana, baseka banezerewe, nkabona bari muri uwo munyenga birebera filime zitafasha umwana w’icyo kigero nkabibona nkababara”.

Uyu mubyeyi yavuze ko bwa mbere afata umugabo we asambanya umwana we, yari mu myiteguro yo kujya kubyara kuko icyo gihe yari akuriwe.

Ati “Byari ijoro buri bucye ndibujye kwa muganga, ubwo Muramukazi wanjye yari yaje kumfasha, bigeze igihe cyo kuryama njya kuryama. Ngeze mu cyumba arambwira ngo urambangamiye, ntabwo uri butume nsinzira, wasanze muramukazi wawe mukagumana?Nzanira umwana hano.”

Yavuze ko umwana yagiye kurarana n’umugabo, we akajya kurarana na muramukazi we wari waje kumufasha kuko nawe yumvaga koko yamubangamira nk’umubyeyi uri ku gise.

Nyuma y’aho nibwo yatekereje ko bitari bisanzwe maze yigira inama yo gusubira mu cyumba asanga amaze gusambanya uwo mwana w’imyaka umunani.

Ati”Nahagurutse vuba vuba njya mu cyumba iwanjye nsanga bararyame, nsanga yamwambuye baryamanye yamupfumbase nk’uko umugabo apfumbata umugore we. Nkibibona nahise ncika intege , nicara hasi mba nk’umuntu ugiye muri koma.”

Mama Life yavuze ko byakomeje, agahengera nta wundi muntu uhari akamusambanya.

Nubwo yasambanyaga umukobwa we , ntiyabibwiye ubuyobozi kuko yumvaga byaba bikojeje isoni urugo ndetse umugabo yamubwiraga ko yisubiyeho.

Ati “Mu by’ukuri mu bantu hanze hari ikintu cy’urujijo utamenya. Nariibaza ngo ndabivuga gute, ukumva icyo cyaha ari nk’aho ari wowe wagikoze.”

Yavuze ko nyuma yaje gufatira umugabo we mu cyuho, afata ibimenyetso by’umwenda w’imbere w’umukobwa we maze abishyikiriza ubuyobozi , iperereza rirakorwa uyu mugabo arafungwa.

Nyuma yo kumara hafi imyaka itatu Life akorerwa ihohoterwa, kuri ubu ubuzima bwarahindutse abayeho neza, nubwo ku mutima agifite igikomere.

Uyu mubyeyi agira inama abandi bantu bose muri rusange kutaba mu rujijo bakajya bihutira gutanga amakuru.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .