U Buhinde: ‘Application’ yo gutega kajugujugu igiye gukoreshwa mu gukemura ikibazo cy’abagenzi benshi

Yanditswe na Mukaneza M.Ange
Kuya 5 Ukuboza 2018 saa 03:11
Yasuwe :
0 0

Porogaramu yitwa ‘Blade’ ikoreshwa mu gutumiza indege za kajugujugu igihe wifuza gukora ingendo zihuse, igiye gutangira gukoreshwa mu Mujyi wa Mumbai mu Buhinde.

Iyi porogaramu isanzwe ikoreshwa muri Leta Zunze Ubumwe za Amerika, aho umuntu wese ubyifuza ayifashisha mu gutega kajuguju imuvana mu Mujyi wa New York imujyana Hamptons, urugendo rwishyurwa amadolari 795. Inakoreshwa kandi mu ngendo zerekeza mu yindi mijyi y’iki gihugu.

Ku wa Kabiri ikigo Blade gitanga iyi porogaramu cyatangaje ko igiye gukoreshwa n’Abahinde bifuza gutega kajugujugu mu ngendo zitandukanye mu Mujyi wa Mumbai by’umwihariko mu duce twa Juhu na Mahalaxmi.

Irateganya kandi gushyiraho ingendo z’indege mu mijyi wa Pune na Shirdi izwiho kuba umujyi wiganjemo ibikorwa by’iyobokamana.

CNN ivuga ko Blade India izatangizwa ku bufatanye n’Ikigo Hunch Ventures cyo mu Buhinde, ikazayoborwa na Amar Abrol wahoze ari umuyobozi wa Sosiyete y’indege yo muri Malaysia izwi nka AirAsia.

Umuyobozi wa Blade, Rob Wiesenthal, yatangaje ko impamvu bahisemo umujyi wa Mumbai utuwe n’abasaga miliyoni 19, ari uburyo ukomeje kwihuta mu iterambere, ariko ubwikorezi bukaba butabasha kugendana n’uyu muvuduko.

Ubushakashatsi bwakozwe na Boston Consulting Group muri uyu mwaka bwagaragaje ko imijyi yo mu Buhinde ariyo igendwa n’abantu benshi, aho Mumbai, New Delhi, Bangalore na Kolkata ihomba asaga miliyari 22$ buri mwaka kubera umubyigano w’imodoka.

Ku gihe gikoreshwa na gari ya moshi mu rugendo runaka usanga harengaho isaha n’iminota 50 ugereranyine no mu yindi mijyi yo ku mugabane wa Aziya.

Wiesenthal yavuze ko ikigamijwe ari ukoroshya ingendo, aho byatwaraga amasaha atandatu hagakoreshwa kajugujugu zikoresha iminota 35 gusa.

Nubwo Blade yitezweho koroshya ingendo ariko, biragoye ko yigonderwa n’Umuhinde utabasha kwinjiza byibura ibihumbi bibiri by’amadolari buri mwaka.

Ibi bishingirwa ku kuba ingendo zizaba zihenze, ahanini urebeye ku biciro bikoreshwa muri Amerika aho urugendo rwishyurwa make ari urw’iminota itanu ruva Mahnattan rwerekeza ku kibuga cy’indege cyitiriwe John Franklin Kennedy rutwara amadolari ari hagati ya 195-295.

Blade igiye ku isoko ry’u Buhinde butuwe n’abaherwe b’abamiliyoneri basaga ibihumbi 340 isanzeyo ikigo JetSetGo gisanzwe gitanga serivisi nk’iyi.

Umujyi wa Bangalore nawo uherutse gutangiza ingendo za kajugujugu ku bibuga by’indege, aho zishyurwa guhera ku madolari 65.

Umujyi wa Mumbai uza mu mijyi ituwe cyane ku Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza