U Budage: Intare bise "Kigali" yabyaye utwana tubiri, birangira ituriye

Yanditswe na IGIHE
Kuya 12 Kanama 2019 saa 06:32
Yasuwe :
0 0

Intare imwe yiswe Kigali yo mu gace kororerwamo inyamaswa ka Leipzig mu Budage, yariye utwana twayo tubiri nyuma y’iminsi itatu gusa itubyaye.

Hari hashize imyaka 15 nta ntare itabyarira muri ako gace kororerwamo inyamaswa ariko byatunguranye nyuma y’iminsi itatu Kigali iriye utwo twana twayo.

Umuvugizi w’ako gace kororerwamo izo nyamaswa, Maria Saegebarth, yabwiye CNN ko mu mizo ya mbere nta myitwarire mibi iyi ntare yigeze igaragaza ku twana twayo.

Yagize ati “Nta myitwarire idasanzwe yigeze igaragaza ku ikubitiro ndetse mbere y’iryo sanganya yari yiriwe irya neza umunsi wose.”

Abari bashinzwe kwita kuri izo nyamaswa batangaje ko bababajwe cyane kandi bagatungurwa n’ibyakozwe n’iyo ntare.

Umuganga w’inyamaswa muri Pariki ya African Safari de Plaisance-du-Touch mu Bufaransa, Morgane Martin yavuze ko imyitwarire nk’iyo ishobora guterwa n’uko inyamaswa ziba zaravanywe mu buturo bwazo zigatakaza ubushobozi bwo kwita ku bana bazo.

Yagize ati “Ubusanzwe intare z’ingore zikuze ziha uburere utwana twazo ariko iyo zafashwe zigashyirwa mu kato ibyo birarangira kuko n’intare zikuze ntacyo ziba zizi ku buzima. Ntacyo zishobora kwigisha izikiri ntoya kuko nazo ntabyo ziba zarigishijwe.”

Morgane yavuze ko uko kudahabwa uburere aribyo bishobora kuba byaratumye iyo ntare yica utwana twayo.

Icyakora yavuze ko binashoboka ko utwo twana tw’intware twaba twari turwaye, nyina igahitamo kutureka tugapfa cyangwa ikatwiyicira.

Ngo biranashoboka ko intare iyo ibona aho gufata umwanya munini yita ku mwana wayo kandi ibona nta mahirwe menshi yo kubaho, imwiyicira ngo ye gukomeza kugaragurika.

Morgane yavuze ko intare ishobora no kwica umwana wayo igihe ibona idafite amata ahagije yo kumutunga cyangwa se ikabikora ishaka imbaraga.

Kumenya niba utwana twa Kigali twari turwaye biragoye kuko yaturiye ikatumara ku buryo batabasha gupima uburyo twari tumeze tujya gupfa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza