00:00:00 IGIHE NETWORK KN KINYARWANDA EN ENGLISH FR FRANCAIS

Tujyane mu Isi ya none, indiri y’indaya ku Kimisagara

Yanditswe na Thamimu Hakizimana
Kuya 29 June 2022 saa 11:22
Yasuwe :

‘Isi ya none’, aka ni kamwe mu duce tudasanzwe mu Mujyi wa Kigali, gateye ukwako kuko hari n’abavuga ko kayingayinga ahitwa Sodoma na Matimba mu kugira abakobwa n’abagore batunzwe no kwigurisha.

Ni mu Murenge wa Kimisagara mu Karere ka Nyarugenge. Mu gihe kigera ku minota 20 mvuye rwagati mu Mujyi wa Kigali, nari ngeze muri ako gace kitwa Isi ya none ndetse abandi bahabatije mu [rw’igitsina cy’abagabo] bitewe n’ubusambanyi buhabera. Iri ni naryo zina rizwi cyane.

Ku bazi ku nyubako y’Inkundamahoro wambutse umuhanda hepfo ya Station ihari ugana Nyabugogo ni ho hari agahanda kazamuka kerekeza ku Isi ya none.

Nkigera muri aka gace byari bigoye kugira uwo nabwira ijambo iryo ari ryo ryose, kuko natinyaga ko yahita anseka! Byansabaga kwiyumanganya nkigira nk’umuntu usanzwe uhamenyereye.

Byari byangoye cyane kuko nibazaga uwo ndi bubwire nti ‘njyana ahitwa mu isi yanone cyangwa mu rw’i…[igitsina cy’umugabo] nk’uko bahita ndebe izo ndaya zihaba, nkumva ururimi ruragobwe.

Nkigera muri ako gace, nahise mbona abantu batandukanye biganjemo indaya nyinshi zari kunywera inzoga ku muhanda izindi zitumura itabi ryinshi cyane.

Mu kanya nk’ako guhumbya hahise haza abakobwa batatu bicuruza batangira kumbaza niba nshaka “ Uwo dusambana” banyumvisha ko ibitsina byabo babigurisha amafaranga make ku buryo n’amafaranga 1000 bayemera.

Nahise ngira isoni ariko ndiyumanganya mbabwira ko nshaka kubanza kugira icyo nywa n’icyo nshyira mu nda kugira ngo ntangire akazi kanjye ariko nta we urabutswe ko ndi umunyamakuru.

Nkimara kwicara muri kamwe mu tubari two muri ako gace, nahise ntungurwa no kubona umukobwa n’umugabo bamatiranye bari gusomana izuba riva ntacyo bishisha. Icyanteye inkeke ni uko imbere yabo hari abana batatu bari mu kigero cy’imyaka itanu barimo babareba.

Hahise haza umwe mu bakobwa bicuruza wari wamvugishije nkigera muri ako gace arambwira ati “Ko mbona byagutangaje nibwo bwa mbere ukigera mu rw’i…[igitsina cy’umugabo] ko byagutunguye?”

Ako kanya nagize ngo ninjye wumvise nabi ndongera ndamubaza nti “ Hano ngo bahita gute?” Ambwira ko bahita mu isi ya none cyangwa mu rw’ [ibitsina by’abagabo]”.

Ibi byahise bituma ngira amatsiko yo kumenya impamvu aka gace kiswe aya mazina ntangira kuganira n’abagatuyemo kugira ngo menye inkomoko y’iri zina.

Mukeshimana Alice, ni umukobwa utunzwe no kwigurisha, avuga ko hahawe izina ry’igitsina cy’umugabo bitewe n’ubusambanyi bukabije bukaberamo.

Yagize ati “Aha bahita mu isi ya none cyangwa mu rw’i [igitsina cy’umugabo] kubera ko haba indaya nyinshi kandi zihendutse wowe se urabona atari mu yindi isi?”.

Habarugira Daniel, utuye mu Kagari ka Kimisagara, nawe yemeza ko aka gace kahawe ayo mazina bitewe n’ubusambanyi bukabije bukaberamo.

Yagize ati “Ahubwo wowe uje ari ku manywa uzaze nijoro wirebere abantu basambanira hano ku muhanda ntawe bikanga uzi udukingirizo twakoreshejwe tuba twandagaye muri utu tuyira? Hano n’ufite 1000 cyangwa 500 abona indaya baryamana”.

Umwe mu bayobozi bo mu Murenge wa Kimisagara ariko utarifuje ko amazina ye atangazwa na we yemeje ko hari amazina yabatijwe aka gace kubera ibikaberamo.

Ati “Turabizi ko bahita uko kubera indaya nyinshi zihatuye n’ibihabera ariko si yo mazina yaho nyirizina.”

Gusa bamwe mu bazi aka gace banemeza ko kirirwamo abajura benshi ndetse hatagizwe igikorwa mu maguru mashya kazapfiramo abantu cyane cyane ko kabaye indiri y’abajura n’indaya ku buryo abamaze kwiba Nyabugogo ari ho bajya kwihisha.

Inzira ijya muri aka gace kahawe amazina adasanzwe
Ni agace kagaragaramo abicuruza benshi
Ni agace kagaragaramo indaya nyinshi
Iyo uri muri aka gace uba ureba mu Murenge wa Gatsata bitewe n'uko gaherereye ku musozi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .