Sobanukirwa ‘Natural Cycles’ ifasha abagore kugena igihe cyo gusama

Yanditswe na Joy Monique Dukuze Umutesi
Kuya 18 Mutarama 2020 saa 11:48
Yasuwe :
0 0

Hakozwe porogaramu ishyirwa muri telefoni ngendanwa ‘Natural Cycles’, igafasha abagore kumenya iminsi y’ukwezi kwabo ku buryo bakwirinda gusama ndetse bakaba bamenya n’iminsi bashobora gusamiraho.

Iyi porogaramu yakozwe n’umugore w’imyaka 36, usanzwe ari umuhanga mu bijyanye na siyansi, ukomoka mu gihugu cya Suède, Elina Berglund, afatanyije n’umugabo we, Raoul Scherwitzl.

Ubu buryo cyangwa iyi porogaramu ntabwo ihindura imikorere y’imisemburo yo mu mubiri, mu gihe ubundi buryo bwo kuboneza urubyaro nk’inshinge cyangwa ibinini, bushobora guhindura imikorere y’imisemburo yo mu mubiri w’umuntu.

Kugira ngo ubashe gukoresha iyi porogaramu, bisaba kuyimanura kuri internet, ukoresheje Google Play cyangwa App Store, ukifashisha n’igikoresho gipima ubushyuhe mu mubiri (Thermomètre).

Biba byiza iyo upimye ubushyuhe mu gitondo ukibyuka, ukandika ibipimo byawe muri ya porogaramu. Iyo imaze gusesengura ibipimo ikwereka ko ushobora gusama (mu ibara ritukura), ikagusaba gukoresha agakingirizo, cyangwa ko uri mu minsi udashobora gusama (mu ibara ry’icyatsi) igihe ukoze imibonano mpuzabitsina.

Berglund n’umugabo we bafatanyije gukora iyi porogaramu nyuma y’uko hari harageragejwe ubundi buryo bwinshi bukora nka yo ariko butakoraga neza.

Ibi byatumye iyi porogaramu ihabwa icyemezo mu bihugu biri mu muryango w’Ubumwe bw’u Burayi, n’ikigo gishinzwe igenzura no gutanga ibyemezo muri Gashyantare 2017.

Mu Ugushyingo 2017, iyi porogaramu yahawe inkunga yo kuyagura ya miliyoni 30 z’amadolari itangwa n’ikigega gifasha imishinga kubona igishoro gifatanyije n’abandi bashoramari basanzwe barimo n’itsinda ryigenga ry’abanyamakuru.

Mu mwaka wa 2018, yari ifite abayikoresha bagera ku bihumbi 800 bo mu bihugu 160, 75% bakoresha iyi porogaramu nk’agakingirizo birinda gusama, abandi bakayikoresha kugira ngo barebe igihe bashobora gusama kandi bagasama.

Muri uyu mwaka ni bwo yemejwe n’ikigo cy’abanyamerika gishinzwe imiti n’ibiribwa (FDA).

Iyi porogaramu iboneka ku Isi hose, ariko abayikoresha cyane ni abo mu bihugu biri mu muryango w’ubumwe bw’u Burayi, u Bwongereza, no mu Majyaruguru y’u Burayi mu gace ka Scandinavia.

Ku bakoresha iyi porogaramu bibatwara hagati y’amayero 40 na 72 ku mwaka. Iyi porogaramu yizewe ku kigero cya 93% n’aho ku bayikoresha neza ikabafasha ku kigero cya 98%.

Porogaramu, Natural Cycles ifasha umugore kumenya igihe ashobora gusama
Porogaramu yitwa Natural Cycles ifasha umugore kuboneza urubyaro hifashishijwe igipimo cy'ubushyuhe
Elina Berglund n'umugabo we Raoul Scherwitzl bafatanyije gukora porogaramu ifasha kuboneza urubyaro ya Natural Cycles

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza