RDC: Kabila yatangariwe ubwo yagaragaraga kuri moto agaragiwe mu karasisi k’abamotari

Yanditswe na Ferdinand Maniraguha
Kuya 4 Ukuboza 2019 saa 10:00
Yasuwe :
0 0

Joseph Kabila wahoze ayobora Repubilika Iharanira Demokarasi ya Congo ntasiba mu dushya! Kuri iyi nshuro amashusho n’amafoto ye atwaye moto, agaragiwe mu karasisi k’abamotari yabaye inkuru ku mbuga nkoranyamba.

Ayo mafoto n’amashusho byafashwe ku wa 1 Ukuboza mu Ntara ya Congo Central, mu mihanda yo mu gace ka Muanda. Kabila agaragara yambaye amadarubindi yijimye, umusatsi mwinshi n’ubwanwa bw’umweru yicaye atwaye moto yo mu bwoko bwa Honda Shadow.

Kabila yari yaraye kuri La Beviour Hôtel iherereye Muanda, ikaba ari iya murumuna we badahuje nyina, Zoé Kabila kuri ubu uyobora Intara ya Tanganyika.

Muri uwo Mujyi, Kabila yahasanze bamwe mu bagize Ihuriro ry’abamotari n’abakunda moto b’i Kinshasa, bazwi nka Club des Motards de Kinshasa (CMDK).

Bari bageze muri uwo mujyi ku wa Gatanu mu rugendo rw’akarasisi bakoze guhera i Kinshasa kugera Muanda rwagombaga gutangira tariki 29 Ugushyingo rugasozwa tariki 1 Ukuboza.

Bamaze guhura na Joseph Kabila, ngo bifuje gukorana na we akarasisi kuri moto, nkuko byatangajwe Kikaya Bin Karubi wavugiye Ihuriro ry’abamotari akaba yaranabaye Umujyanama mu by’ububanyi n’amahanga wa Joseph Kabila.

Aganira na Jeune Afrique yagize ati “Ntabwo byari byateguwe. Ubwo yahageraga twese byaradutunguye.”

Ubusanzwe abo bamotari bari biyemeje gukora urugendo rw’akarasisi bava i Kinshasa baza i Muanda, ahantu hari intera y’ibilometero 1200.

Kabila yemeye gukorana akarasisi n’abagize iryo huriro nyuma yo gusangira ifunguro ryo ku mugoroba wo ku wa Gatandatu.

Icyakora akarasisi ka Kabila n’abamotari kateje impaka ku mbuga nkoranyambaga, bamwe bavuga ko bishe amategeko kuko atari yambaye ingofero y’abagenzi (casque) kandi bibujijwe.

Karubi yavuze ko ingofero itari ngombwa kuko bagenderaga ku muvuduko muto wa kilometero 40 ku isaha.

Nubwo yavuye ku butegetsi, Kabila aracyagaragara rimwe na rimwe mu buzima bwa politiki y’igihugu cye. Yaje i Muanda avuye mu mwiherero w’ishyaka rye Front commun pour le Congo wabereye mu mujyi wa Kisantu.

Kabila amaze guhura n'itsinda ry'abamotari b'i Kinshasa, bamusabye kujyana nabo mu karasisi
Abamotari b'i Kinshasa bari bagiye i Muanda mu rugendo rwo kwishimisha no gusuzuma moto zabo
Kubona Kabila kuri moto byatunguye benshi, bamwe bavuga ko yishe amategeko y'umuhanda kuko nta ngofero yabugenewe yambaye
Kabila yafashe moto ajyana n'abandi mu karasisi bazenguruka imihanda yo mu mujyi wa Muanda
Kabila ukunze kugaragara mu dushya yazengurutse Muanda ari kuri moto mu karasisi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .