Aya mafoto yafashwe na telescope yoherejwe mu kirere yiswe “James Webb Space Telescope”.

Iyi telescope ifite agaciro ka miliyari 10$, ifite ubushobozi burenze ubwo abantu batekerezaga kuko ishobora no kubona inyenyeri za mbere zagaragaye bwa mbere mu isanzure mu myaka irenga miliyari 13 ishize.

James Webb Space Telescope yoherejwe mu isanzure ku wa 25 Ukuboza 2021, yahagurukiye muri Amerika y’Amajyepfo muri French Guiana. Yakoze urugendo rw’ibilometero miliyoni 1,6 kugira ngo igereyo mu rugendo rwamaze ukwezi.

Muri Nyakanga 2022 nibwo Nasa yashyize hanze amafoto ya mbere yafashwe n’iyi telescope. Ni yo mafoto ya mbere yabashije kugaragaza ibiri mu isanzure neza kandi mu buryo bufite amabara.

Nyuma y’amezi aya mafoto agiye hanze, mu mpera z’icyumweru gishize NASA yongeye gushyira hanze icyiciro cya kabiri cy’aya mafoto.

Aya mafoto agaragaza amabuye atandukanye ari mu isanzure, ubwoko bw’inyenyeri zitandukanye zirimo n’izigiye kuzima n’umubumbe wa Neptune.

“James Webb Space Telescope” yabashije gufata umubumbe wa Neptune ugaragara neza

‘Carina’ ni kimwe mu bice bigize isanzure kigizwe cyane n’imvumbi n’indi myuka iremereye ituruka cyane ku kwikora kw’inyenyeri

Aka gace kagizwe n’inyenyeri nyinshi cyane mu isanzure kazwi nka ‘Orion’ gaherereye nibura mu ntera ya kilometero miliyari ibihumbi 12,771

Ubu ni ubwoko bw’inyenyeri izwi nka ‘Wolf-Rayet’, ni imwe munini zibaho nubwo yenda kuzima

Iki ni igice cy’isanzure kizwi nka ‘Phantom Galaxy’, hagati y’iki gice n’Isi harimo intera ingana na kilometero miliyari ibihumbi 302

Iki kibuye kinini kiri mu isanzure kizwi nka Dimorphos, giherereye nibura muri kilometero miliyoni 11 uvuye ku Isi