00:00:00 IGIHE NETWORK KN KINYARWANDA EN ENGLISH FR FRANCAIS

Musanze: Umunyonzi yafashwe arira igisheke mu nzira ahanishwa kwamburwa igare

Yanditswe na Thamimu Hakizimana
Kuya 20 September 2022 saa 02:54
Yasuwe :

Umunyonzi witwa Maniraguha Fabien wo mu Murenge wa Cyuve mu Karere ka Musanze, ari kurira ayo kwarika nyuma y’aho afatiwe ari kurira igisheke mu nzira, agasabwa gutoragura ibishishwa no kuzenguruka umujyi wose abyikoreye kugira ngo asubizwe igare rye.

Uyu musore yabwiye IGIHE ko Umunyamabanga Nshingwabikorwa w’Umurenge wa Cyuve, ari we wamufashe arimo kurira igisheke mu nzira ahita atwara igare rye arijyana kuri koperative y’abanyonzi.

Avuga ko nyuma y’uko bamutwariye igare yagiye kuri koperative y’abanyonzi asaba ko barimuha maze bamubwira ko agomba kubanza gutoragura imifuka y’ibishishwa akabyikorera ndetse akabizengurukana umujyi wose kugira ngo asubizwe iryo gare.

Yagize ati “ Igare barimaranye iminsi ine, Gitifu yaraje asanga ndi kurya igisheke ararifata arijyana kuri koperative ngiye kuryaka perezida arambwira ngo ngomba kubanza gutoragura imifuka y’ibishishwa nkayikorera nkazenguruka mu Mujyi ngenda mvuga ko ndi imbwa kugira ngo arinsubize.”

Yakomeje avuga ko ari ihohoterwa yakorewe kuko nta mategeko abuza abantu kurira ibisheke mu nzira anashimangira ko ubuyobozi bwamuhombeje kuko ku munsi yakoreraga ibihumbi bibiri none akaba amaze iminsi ine adakora.

Umuyobozi wa Koperative y’abanyonzi mu Murenge wa Cyuve, Mutsindashyak Evariste,we yabwiye IGIHE ko babikoze mu rwego rwo kumuhana kugira ngo bibere abandi urugero kuko bugarijwe n’abantu barira ibisheke mu nzira bagata ibishishwa mu muhanda.

Yongeyeho ko banmusabye kujya gusaba imbabazi Umunyamabanga Nshingwabikorwa w’Umurenge wa Cyuve wamufashe ntiyabikora.

Ati “ Byakozwe mu kurengera inyungu rusange kuko yariye ibisheke agata umwanda mu muhanda kandi ibyo byose yakoze ni amakosa ahubwo aho gusaba imbabazi yihutiye mu itangazamakuru,mwe se i Kigali iyo umuntu ataye agacupa mu nzira ntabihanirwa?”

Umunyamabanga Nshingwabikorwa w’Umurenge wa Cyuve, Gahonzire Landouald,we yavuze ko ikibazo cy’uyu munyonzi gikwiye gukemurwa na Koperative yabo.

Ati “ Ntabwo ari njye wakemura ikibazo cyabo kuko bafite koperative yabobanyonzi kandi ifite amategeko igenderaho kandi nabo baje turaganira ndabibabwira.”

Yakomeje avuga ko niba uyu munyonzi yifuza ko yamukorera ubuvugizi kuri koperative kugira ngo imusubize igare rye ari bwo yakwinjira muri iki kibazo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .