00:00:00 IGIHE NETWORK KN KINYARWANDA EN ENGLISH FR FRANCAIS

MINUAR yamusanze mu bitaro arwaye imbasa imujyana mu Bubiligi: Ibigeragezo bya Chantal Iris Mukeshimana

Yanditswe na IGIHE
Kuya 26 Ugushyingo 2022 saa 05:55
Yasuwe :

Chantal Iris Mukeshimana yanyuze mu buzima bugoye burimo kurwara imbasa no gushegeshwa na Jenoside yakorewe Abatutsi yatwaye bamwe mu bo mu muryango we ariko ntibyamuheranye.

Mukeshimana yavutse mu 1983. Yakuriye mu Rwanda mu muryango mwiza ariko ntibyamaze kabiri kuko akiri muto, ku myaka umunani gusa yaje kurwara imbasa yatumye amugaraga amaguru ye yombi.

Mu gihe Jenoside yakorewe Abatutsi yatangiraga, Mukeshimana yari mu bitaro mu nkengero z’Umujyi wa Kigali aho yakuwe n’ingabo z’umuryango w’Abibumbye zari mu Rwanda icyo gihe (Minuar) zimujyana mu Bubiligi akaba ari na ho abarizwa kuva mu 1994.

Ati "Ndibuka ko nari ndyamye ku gitanda kwa muganga. Nisanze nsigaye jyenyine mu kanya gato. Bari bamaze kudutera ubwoba ko ari twe bakurikizaho bica. Abarwayi bose n’abafasha b’abaganga bari bahuriye ahantu hamwe ngo basenge."

"Bamaze kugenda nibwiye ko birangiye; nti ’reka ntegereze urupfu rwanjye’, umuryango wari ufunguye, numvaga induru hirya yanjye muri kiliziya kandi hari abantu benshi bari bahiciye, numvaga ari jye ukurikiyeho."

Ku bw’amahirwe ingabo za Minuar zamugezeho zirahamukura ndetse zitwara n’abandi bana bari mu kigo cy’imfubyi hafi aho zibajyana mu Bubiligi.

Ageze mu Bubiligi yabaye nk’uwibuze kuko atari azi ururimi rwaho cyangwa umuco. Nyuma y’ibyumweru bibiri nibwo yabonye igare ry’abafite ubumuga (chaise roulante) mu bitaro byitwa Reine Fabiola.

Inshuro ya mbere yicaye muri iyo ’ntebe’ yumvise ari nk’aho asubiranye amaguru ye yombi. Ni ibintu avuga ko byamushimishije cyane kuko noneho yashoboraga kujya aho ashaka hose.

Mu buhamya yahaye Radio/Televiziyo yo mu Bubiligi, yavuze ko yishimiye kuguma mu Bubiligi kuko ari ho yabonaga ubuzima bushoboka bijyanye n’ubumuga bwe ariko yari ataramenya niba hari uwo mu muryango we ukiriho.

Ati "Nakomeje gukurikirana igihe cyose menye ko hari umuntu ugiye kugana mu Rwanda nkandika urwandiko ruto nkarwohereza nshakisha umuryango; naje kwakira ibaruwa ya Data ansobanurira uko bahunze; ko Mama yishwe muri Jenoside, ko hari abavandimwe babiri bakiriho."

Nyuma y’imyaka icumi yabashije kuza mu Rwanda kubonana n’abo mu muryango we aho asobanura ko yahuye na Se akamumenya nubwo yamubwiye inkuru z’uburyo Nyina yishwemo ntabashe no kubona imva ye.

Ubusanzwe Mukeshimana yumvaga ashaka kwiga ibijyanye n’ubunyamabanga ariko akabona ubumuga bwe bumubera imbogamizi. Yagerageje kwiga ibijyanye no gutunganya imisatsi na byo abona ntibihura.

Umunsi umwe yabonye umuntu ufite ubumuga n’utabufite babyinana biramutangaza. Uwo muntu udafite ubumuga yamusabye kubigerageza ari mu kagare. Avuga ko yabishiboye nk’uko usanzwe abizi yabikora.

Yakomeje kubyiga arabyimenyereza bigeze mu 2017 ashinga ishuri rye ’ASBL Cycloceza’. Ati "Ubu rero ndi umwarimu wa ’cyclodanse’" (ni nk’imbyino z’abafite ubumuga babyina bicaye mu igare).

Mu buhamya bwe avuga akababaro yatewe n’urupfu rwa Se. Umunsi umwe ngo yamuhamagaye amubwira ko arwaye ahita ategura urugendo rwo kugaruka mu Rwanda kureba umubyeyi we ariko apfa icyumweru kimwe mbere y’uko amugeraho.

Yasigaye mu ihurizo ry’uburyo abavandimwe be babiri bazabaho kuko ari nk’aho ari we mubyeyi se yari abasigiye ariko agerageza kubafasha uko ashoboye.

Kuri ubu yabashije gushaka umugabo arabyara none umwana we afite imyaka itatu.

Nubwo bimeze bityo yongeye kwakira inkuru mbi y’urupfu rwa musaza we wasize umugore n’abana batatu, ubu intego ye ni ugukomeza gufasha abo yasize.

Nubwo afite ubumuga bw'amaguru, Mukeshimana ahora amwenyura yirinda ibimuca intege

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .