00:00:00 IGIHE NETWORK KN KINYARWANDA EN ENGLISH FR FRANCAIS

Kugira inda bifatwa nk’ibihesha abagabo igikundiro: Imibereho itangaje y’Aba-Bodi

Yanditswe na Igizeneza Jean Désiré
Kuya 5 Ukuboza 2022 saa 10:59
Yasuwe :

Abatuye mu kibaya cya Omo mu Majyepfo ya Ethiopia bo mu bwoko bw’Aba-Bodi babaho mu buzima butangaje burimo guhatanira kubyibuha, ubyujuje agafatwa nk’intwari ubuzima bwe bwose.

Kubyibuha mu buryo butarengeje ikigero bishobora kuba byiza kuri bamwe ariko abo mu bwoko bw’Aba-Bodi, kubyibuha cyane ukazana inda nini ni akarusho n’ubwiza.

Aba-Bodi ni umuryango utuye muri Ethiopia ubamo imihango idasanzwe aho abasore baho banywa amaraso y’inka n’amata mu rwego rwo guharanira kwambikwa ikamba ry’uwabyibushye cyane kandi akaba na mwiza.

Abaturage bo mu bwoko bwa Bodi bakora ubuhinzi n’ubucuruzi bwo guhanahana ibicuruzwa. Bubaha inka zabo kandi zikaba zihariye ku buryo amaraso n’amata yazo ari isoko y’ibiribwa n’ubwiza kuri bo.

Aya matungo akoreshwa mu mihango imwe n’imwe mu birori birimo ibyo kwizihiza umwaka mushya udasanzwe kuri bo. Mu gutangira umwaka bizihiza muri Kamena bakora umuhango witwa Ka’el ufatwa nk’u w’abagabo babyibushye.

Ni umuhango uhuriza ingaragu mu marushanwa ariko mbere yawo banywa imvange y’amaraso n’amata mu gihe cy’amezi atandatu.

Mu miryango 14 ihatuye buri umwe werekana umusore utarashaka kandi babona ko akwiriye amarushanwa, akitegura muri ayo mezi atandatu kandi muri icyo gihe ntagomba gukora imibonano mpuzabitsina no kugaragara hanze y’aho atuye kuko ibyo kunywa no kurya babishyikirizwa aho bari.

Ku munsi w’amarushanwa, barasohoka kugira ngo barebe impinduka, bakisiga ibumba rivanze n’ivu ubundi bakagaragaza ubuhanga bwabo mu rwego rwo guhatana, biruka isaha imwe iruhande rw’ibiti byera babifashijwemo n’abagore babaha amazi yo kunywa no ku bahanagura ibyuya.

Abakemurampaka baba bageze mu zabukuru ni bo bagena uwatsinze, akambikwa ikamba ry’umuntu wabyibushye kurusha abandi mu mwaka ubundi agafatwa nk’intwari mu buzima bwe bwose ndetse abana baho bagaharanira kuba nka we.

Kimwe n’andi marushwana y’ubwiza hatangwa igihembo gusa aba bo babikora bagamije gushimisha ubuzima bwabo.

Ku bo mu bwoko bw'aba-Bodi, inda nini ni ikintu gihesha ishema abagabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .