00:00:00 IGIHE NETWORK KN KINYARWANDA EN ENGLISH FR FRANCAIS

Ku myaka 25 yabashije kwinjira ku rutonde rw’abatunze miliyari imwe y’amadolari

Yanditswe na Zigiranyirazo Bajecteur
Kuya 28 May 2022 saa 11:44
Yasuwe :

Alexandr Wang, ni umunyamerika wakuriye muri Leta ya New Mexico mu gace kazwiho kuba karakorewemo igisasu cya mbere cya kirimbuzi cya Leta Zunze Ubumwe za Amerika mu gihe cy’Intambara ya Kabiri y’Isi.

Nyuma yo kuva mu ishuri afite imyaka 19 ubwo yigaga muri Kaminuza y’Ikoranabuhanga ya Massachusetts, mu 2016 Wang yisunze Lucy Guo maze batangiza Scale AI, ikigo cy’ikoranabuhanga mu kubika no kurinda umutekano w’amakuru, aho kuri ubu afitanye imikoranire n’inzego zikomeye zirimo Igisirikare cya Amerika kirwanira mu kirere n’ibindi.

Forbes ivuga ko Wang akomoka ku babyeyi b’abanyabugenge bagiye bakora ku mishinga ikomeye y’intwaro ku bw’igisirikare cya Leta Zunze Ubumwe za Amerika ku buryo bifatwa ko urwego agezeho rusanishwa no kuba akomeje kugera ikirenge mu cy’ababyeyi be.

Ku myaka itandatu Scale AI imaze, yabashije gusinyana amasezerano y’imikoranire abarirwa akayabo ka miliyoni 350$, aho ikigo cya Wang cyitezweho gufasha igisirikare cya Amerika kirwanira mu kirere mu bijyanye n’ibikorwa by’ikoranabuhanga byifashisha ubwenge buhimbano, ikintu gifatwa nk’intambwe ihambaye ku muntu ufite imyaka 25.

Ikoranabuhanga rya Wang rifite ubushobozi bwo gusesengura amashusho afatwa n’ibyogajuru kandi rikabikora mu buryo bwihuse kuruta uko byakorwa n’umuntu ndetse iri koranabuhanga riri no kwifashishwa mu isesengura ry’urugero ibisasu by’u Burusiya bishobora kwangiza Ukraine.

Uretse imikoranire n’igisirikare cya Amerika kirwanira mu kirere, Scale AI yatangijwe na Wang afite imyaka 19, ubu iri gukorana n’ibindi bigo birenga 300 mu nzego zitandukanye birimo nka General Motors, Flexport, GM n’ibindi.

Alexandr Wang ubu ni we ushyirwa ku mwanya wa mbere na Forbes nk’umuntu ukiri muto wabashije guhinduka umuherwe ku isi abigizemo uruhare ubwe ku buryo aza ku isonga ry’abakiri bato batunze akayabo kagera kuri miliyari imwe y’amadolari ya Amerika aho umugwa mu ntege ari umunya-Brésil witwa Pedro Francheschi na we ufite imyaka 25 akaba mu bashinze Brex nk’ikigo cy’imari n’ikoranabuhanga.

Ajya gutangiza Scale AI, Wang avuga ko yari yabwiye ababyeyi be ko agiye kubikora mu biruhuko by’impeshyi gusa ariko bikarangira adasubiye ku ishuri ukundi.

Ati “Nabwiye ababyeyi banjye ko bigiye kuba ikintu cy’impeshyi gusa ariko mu by’ukuri sinigeze nsubira ku ishuri.”

Kwinjiza amafaranga angana na miliyoni 325 $ mu mwaka ushize byazamuye agaciro ka Scale AI, ubusanzwe yinjizaga abarirwa muri miliyoni 100 $, ku buryo ubu ibarirwa mu gaciro ka miliyari 7.3 ndetse ubu umugabane wa Wang ungana na 15% ufite agaciro ka miliyari imwe y’amadolari, bimugira umuherwe wa mbere muto ku isi wabyigejejeho ku giti cye.

Wang yize ari umuhanga mu mibare ku buryo yanagiye yitabira amarushanwa akomeye harimo n’irya Disney World ku buryo ku myaka 17 yari yarabonye akazi ko gukora ibijyanye na “Coding” ku rubuga rwa Quora ari naho yahuriye na Lucy Guo bafatanyije gushinga Scale AI.

Alexandr Wang yinjiye mu batunze miliyari imwe y'amadolari ku myaka 25

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .