00:00:00 IGIHE NETWORK KN KINYARWANDA EN ENGLISH FR FRANCAIS

Kimironko: Umugore ushinjwa ubusambanyi yakubise umugabo we aramukomeretsa

Yanditswe na Bukuru JC
Kuya 15 June 2022 saa 02:47
Yasuwe :

Umugore wo mu Murenge wa Kimironko, Akarere ka Gasabo, yakubise umugabo we aramukomeretsa. Uyu mugabo amushinja kumuca inyuma dore ko yanamusanganye n’abandi bagabo babiri ku buriri bwe.

Aba bombi bamaranye imyaka isaga 27 babana nk’umugore n’umugabo, ariko umugabo ashinja umugore ko ajya kuryamana n’abandi bagabo yavuga akamukubita.

Mu ijoro rishyira kuri uyu wa Kabiri ngo yamusanganye n’abandi bagabo babiri barimo gusangirira inzoga iwe ku buriri, agize icyo avuga aramukubita kugeza ubwo yamukomerekeje mu mutwe.

Umugabo yabwiye BTN TV ati "Hari inyandiko mfite imbwira ko ibyo bikorwa abikora kubera ko nta bufasha cyangwa ubushobozi afite bwo kuba yakwigurira amavuta cyangwa ibindi bigendanye no kwigira mwiza k’umugore, niyemeza kujya muha ayo mafaranga ariko ntabwo byakemuye iyo ngeso."

Akomeza agira ati "Iri joro ni bwo byarenze inkombe abonye ko ndimo kumuvumbura mubuza n’uburyo, nibwo yankubise ibi bintu mubona mu mutwe".

Uyu mugabo avuga ko nyuma y’uko umugore we afashe umwanzuro wo gukora ubusambanyi, batandukanye ku buriri umugore aryama mu ruganiriro ariko ntiyigeze abicikaho. Asaba ko ubuyobozi bwabatandukanya akagira uburenganzira ku bana babyaranye.

Umugabo ati "Niba ibyo akora byitwa icyaha akaba yabihanirwa byaba ngombwa bakadutandukanya babona ari cyo gisubizo, nabishyigikira".

Abaturanyi bavuga ko ibyo uyu mugabo asaba yabihabwa kuko na bo babizi neza ko uyu mugore ari umusambanyi. Basabye ko leta ibatandukanya hataragira uwica undi.

Uyu mugore avuga ko yabyaranye n’uyu mugabo afite imyaka 13 kandi kuva babana nta munsi n’umwe yigeze amukunda ndetse ngo ntanamushaka mu buzima bwe.

Ati "Ntabwo nigeze mukunda n’iyi saha simukunda sinanamushaka mu buzima bwanjye. Mwubahira ko nabyaranye na we abana bangana kuriya, ni cyo kintu mwubahira kandi no gusambana ni uburenganzira bwanjye. Mfite uburenganzira bwo kuryamana n’uwo nshaka ku myaka yanjye, na we ajya ajya kuryamana n’abakecuru bangana na we".

Umunyamabanga Nshingwabikorwa w’Umurenge wa Kimironko, Umuhoza Rwabukumba yavuze ko iki kibazo batari bakizi ariko bagiye kugikurikirana mu maguru mashya, agasaba abaturage kujya batabarana kuko bidakwiye ko abantu barwana bakagera aho umwe amena undi umutwe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .