Kigali: Hari abavuye mu buraya kubera gutinya COVID-19

Yanditswe na Thamimu Hakizimana
Kuya 7 Mutarama 2021 saa 05:55
Yasuwe :
0 0

Bamwe mu bagore n’abakobwa bakoraga uburaya mu bice bitandukanye by’Umujyi wa Kigali, bemeza ko bahisemo kubuvamo bakagana iy’ubucuruzi buciriritse batinya kwandura COVID-19.

Kubera uburyo COVID-19 yandura, abakora uburaya ni bamwe mu bashobora kuyikwirakwiza kuko bahura n’abantu benshi batandukanye kandi bataziranye.

Bamwe muri bo baganiriye na IGIHE, bavuga ko bahisemo kureka uburaya mu rwego rwo kwirinda ko bakwandura icyorezo cya COVID-19 kimaze igihe kigarika ingogo ku Isi.

Bavuga ko mu bindi byatumye basezera kwigurisha harimo ingaruka mbi nyinshi bahuriragamo nazo zirimo gukubitwa, kwamburwa no gufatwa nk’ibicibwa.

Umwe mu baganiriye na IGIHE wo mu Kagari ka Katabaro mu Murenge wa Kimisagara yagize ati “Nabiretse nkimara kumva ko COVID-19 yageze mu Rwanda. Nabanje kumara iminsi nta bagabo mbona muri cya gihe cya Guma mu rugo.”

Uyu mubyeyi w’abana batatu yongeyeho ko nyuma yo kureka uburaya yaje kugira amahirwe ahura n’umugiraneza amutekerereza ubuzima yari abayemo n’uburyo yaje kureka uburaya, amuha igishoro atangira ubucuruzi buciriritse.

Ati “Uwo mugiraneza yahise angirira impuhwe ampa ibihumbi 20 Frw ngura utwenda, ubu nitwo nzunguza kuko nasanze aho kuba indaya waba umuzunguzayi.”

Undi utuye ahazwi nka Kokobe mu Murenge wa Nyakabanda, we avuga ko yaretse uburaya kubera gutinya ko yakwandura COVID-19. Ubu yahisemo gucuruza udupfukamunwa.

Ati “Uburaya kuri njye bwabaye amateka kuko maze igihe naraburetse, naburetse nyuma y’aho numvise ko utubari twafunzwe ndetse na mugenzi wanjye wayanduye.”

Uyu mukobwa yavuze ko nubwo byabanje kumutonda, ngo nyuma y’aho arekeye uburaya abayeho neza ndetse sosiyete Nyarwanda isigaye imufata neza bitandukanye na mbere.

Nubwo hari ababiretse, hari bamwe mu bakiri mu buraya bavuga ko bafite impungenge z’uko bashobora kwandura COVID-19 bitewe n’uko nta buryo bashobora kuryamana n’abakiliya babo badakoranyeho.

Umwe mu bicururiza ahitwa i Nyamirambo yagize ati “Wakora gute se imibonano n’umugabo mudakoranyeho? Ikindi ntimwanayikora mwambaye udupfukamunwa. Ahubwo nk’abanyamakuru nimutuvugire natwe bajye baduha inkunga y’ibiryo kuko COVID-19 nitugeramo twese tuzashira.”

Yongeyeho ko abagore benshi bicuruza muri iki gihe babikorana ubwoba cyane kuko baba batinya ko bashobora kwandura bikabaviramo kubura ubuzima.

Ushinzwe Itangazamakuru mu Karere ka Nyarugenge, Serugendo Jean de Dieu, yasabye abaturage bose gushyira imbaraga mu bijyanye no kwirinda COVID-19 kuko umuntu iyo yanduye bigira ingaruka ku gihugu cyose.

Ati “Ntitwavuga ngo hari ubutumwa bugenewe abicuruza kuko ni icyiciro cy’abantu bakora imirimo itemewe. Ubutumwa butangwa bureba buri Munyarwanda kuko buri wese akwiye kubyumva, tukabyumva mu buryo bumwe kuko kuba njye nakwirinda wowe ntiwirinde ejo twese bitugiraho ingaruka kimwe.”

Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

Uyu mwari ukorera uburaya i Matimba yavuze ko asigaye afite ubwoba bwo gukomeza iyo ngeso kubera COVID-19
Uyu mubyeyi utuye Katabaro mu Murenge wa Kimisagara yaretse uburaya ubu asigaye acuruza imyenda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .