Kenya: Ubuyobozi bwasabye ko inkwano zitangwa ku bakobwa bakebwe imyanya ndangagitsina zigabanywa

Yanditswe na IGIHE
Kuya 27 Ugushyingo 2020 saa 04:43
Yasuwe :
0 0

Mu gihe umugenzo wo gukeba imyanya y’inyuma ku gitsina gore hari benshi bawukomeyeho, ubuyobozi buri mu bukangurambaga bw’uko inkwano zitangwa kuri bene abo bakobwa zagabanywa, ngo harebwe niba ababikora bacika intege.

Gukeba imyanya y’inyuma y’igitsina gore bizwi nka Female Genital Mutilation (FGM), bikorwa mu buryo gakondo, hagakebwa imyanya imwe cyangwa yose igakurwaho, mu buryo bibwira ko buhesha ishema umukobwa, kugeza aho hari ababyeyi bumva kugira umukobwa udakebwe biteye ipfunwe.

Nyamara ni igikorwa gikomeje kurwanywa kuko ari ihohoterwa rikorwa umukobwa akiri muto, atabyihitiyemo, kandi bishobora kugira ingaruka zitandukanye ku buzima bwe.

Ishami ry’Umuryango w’Abibumbye ryita ku Buzima, OMS, riheruka gutangaza ko nibura buri mwaka, abakobwa miliyoni eshatu baba bari mu byago byo gukebwa imyanya ndangagitsina y’inyuma, benshi bagakebwa mbere y’uko buzuza imyaka 15.

Umuyobozi mu Ntara ya Tharaka-Nithi, Beverly Opwora, aheruka gusaba abajyanama muri iki gice, kwemeza ko inkwano y’abakobwa bakebwe iba nto, hagamijwe ko abantu barushaho gucika kuri uwo mugenzo, nk’uko ikinyamakuru Nation cyabitangaje.

Yagize ati “Mu gihe mutunganya itegeko rigena inkwano rizaba rigaragaza uko zingana ku mugeni, muzazirikane ko inkwano zitangwa ku bakobwa bakebwe zijya hasi kurusha izindi.”

Yavuze ko uyu mugenzo ari ikibazo gikomeye, kinabangamiye umutekano w’akarere n’ubuzima rusange, byongeye muri ibi bihe bya COVID-19.

Umuyobozi w’agace ka Meru y’Amajyepfo, Mutegi Kiungo, na we aheruka kuvuga ko bihangayikishije cyane kuba hari abakobwa bagikebwa, ababikora ntibanababarire abana biga mu mashuri abanza.

Yagize ati “Abakobwa bakwiye kongererwa ubushobozi binyuze mu burezi, ntabwo ari mu kubakeba.”

Yashimangiye ko abayobozi gakondo bakwiye gukorana n’inzego za leta mu kurwanya uyu mugenzo, abakobwa bagashyirwa ku rundi rwego hakoreshejwe uburyo bubahesha icyubahiro.

Kenya yaciye uyu mugenzo mu 2011, ariko kugeza ubu bibarwa ko Umunyakenyakazi umwe muri batanu bafite imyaka hagati ya 15-49, yakebwe.

OMS igaragaza ko nta nyungu na nto bigira ku buzima bw’umugore cyangwa umukobwa, ahubwo bishobora kumugiraho ingaruka zirimo kuva cyane, kubabara igihe yihagarika cyangwa kugira ikibazo arimo kubyara.

Nyamara hirya no hino habarwa abagore n’abakobwa bagera muri miliyoni zisaga 200 bakebwe, mu bihugu nibura 30 byo muri Afurika, Uburasirazuba bwo hagati na Aziya, aho uyu mugenzo ugaragara cyane.

Nubwo bikomeza gukorwa, bitera ibibazo byinshi by’ubuzima, ndetse ibihugu 27 byiganjemo uyu mugenzo bihomba nibura miliyari 1.4$ buri mwaka, mu kuvura abagizweho ingaruka no gukebwa.

Ijanisha ry'abakobwa bakebwe bari hahati y'imyaka 15-49 (Ifoto ya OMS)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .