Jessica Nabongo yaciye agahigo ko kuba umugore w’umwirabura wazengurutse ibihugu byose

Yanditswe na IGIHE
Kuya 11 Ukwakira 2019 saa 09:55
Yasuwe :
0 0

Dukunze kumva abafite intego cyangwa ababaye ibyamamare mu mikino n’amarushanwa atandukanye nk’abaciye agahigo mu gusimbuka cyangwa kwiruka kurusha abandi. Ntibisanzwe kumva umuntu ahigira kuzaba uwa mbere usuye ibihugu byo ku Isi yose.

Jessica Nabongo, Umunyafurika usanzwe ari umukozi w’Umuryango w’Abibumbye yahize kuzaba uwa mbere usuye ibihugu byose byo ku Isi, anabigeraho.

Mu 2016 ubwo yari amaze kugera mu bihugu 60, yihaye intego yo kuzasura ibihugu 193. Ku wa 6 Ukwakira uyu mwaka yanditse kuri Instagram ye ko yabashije kugera mu gihugu cya 195 nk’uko byanditswe na CNN.

Ati “Ikaze muri Seychelles! Igihugu cya 195 muri 195! Birashimishije kubivuga ariko ubu ndashimira abantu bose bambaye hafi, uru rwari urugendo dusangiye kandi ndashimira mwese twari kumwe muri urwo rugendo.”

Uyu Munyafurika watangiriye urugendo rwe mu Bwongereza mu 2007, avuga ko mu bihugu byose yagiyemo yabonye Sénégal aricyo gihugu gitangaje aho abantu bose bafatwa kimwe, hakiyongeraho Ghana.

Muri urwo rugendo yagiye ahuriramo n’ibibazo bitandukanye birimo kwibasirwa no kubwira ko akora umwuga w’uburaya, gusabwa gutonda inyuma abazungu bakabanza gukemurirwa ibibazo byo ku mipaka ahandi agasabwa ruswa, ivangura n’ibindi ariko ntiyacika intege.

Undi muntu uheruka gutangaza ko yabashije gukoza ibirenge mu bihugu 195 ku Isi ni umunyamuziki witwa Woni Spotts, watangaje umwaka ushize ko abaye umuntu wa mbere ukomoka ku babyeyi bo muri Afurika na Amerika ubashije kubigeraho mu myaka 40.

Spotts yavuze ko ubishidikanyaho yakwemezwa n’icyegeranyo cy’amashusho yakoze cyangwa kashi yagiye aterwa mu rupapuro rw’inzira ‘Passport’.

Nabongo yavukiye i Detroit mu Mujyi wa Michigan ku babyeyi bafite ubwenegihugu bwa Uganda. Kugeza uyu munsi ku Isi habarurwa abantu 150 babashije kugera mu bihugu byose ku Isi, biganjemo abafite pasiporo z’i Burayi.

Jessica Nabongo yaciye agahigo ko kuba umugore w’umwirabura uzengurutse ibihugu byose
Jessica Nabongo ubwo yageraga muri Algeria
Pakistan ni kimwe mu bihugu uyu mukobwa yanyuzemo
Jessica Nabongo yasoreje urugendo rwe muri Seychelles

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza