Ivu ry’umubiri wa Mahatma Gandhi ryibwe

Yanditswe na Bukuru JC
Kuya 5 Ukwakira 2019 saa 09:39
Yasuwe :
0 0

Abajura mu Buhinde bibye bimwe mu bisigazwa bya Mahatma Gandhi ku munsi yakabaye yizihizaho imyaka 150 amaze avutse iyo aba akiriho.

Ivu rya Gandhi ryibiwe mu rwibutso ruri rwagati mu Buhinde aho ryari ryabitswe nyuma y’urupfu rwe mu 1948.

BBC yatangaje ko abibye ivu rye banangije ifoto ye bandikaho ko ari umugambanyi.

Bamwe mu baturage bo mu Buhinde bo mu idini y’abahindu babona Gandhi nk’umugambanyi kubera ko yaharaniye ubwiyunge hagati yabo n’abayisilamu.

Kubera ko Ghandhi yari umuhindu w’umwimemerere, hari abatarifuzaga ko aharanira ubwiyunge n’abayisilamu.

Polisi yo mu gace ka Rewa, muri Leta ya Madhya Pradesh yabwiye BBC ko batangiye iperereza kuri abo bantu baba bibye ivu rya Ghandi.

Mangaldeep Tiwari, ushinzwe kwita ku rwibutso rwa Bapu Bhawan yavuze ko biteye isoni kuba ivu ry’intwari y’u Buhinde ryibwe.

Yagize ati “Nafunguye amarembo y’urwibutso mu gitondo kuko yari umunsi w’amavuko wa Gandhi. Ubwo nagarukaga nka saa tanu z’ijoro, nasanze hari rimwe mu ivu rya Gandhi ridahari, ifoto ye yangijwe.”

Gandhi yayoboye impinduramatwara itamena amaraso yagejeje u Buhinde ku bwigenge yivana mu nzara z’abakoloni b’abongereza.

Benshi mu Bahinde bamufata nk’umubyeyi w’igihugu, nubwo benshi mu Bahindu bamushinja kwikundisha cyane ku bayisilamu byatumye u Buhinde bucikamo kabiri hakavuka u Buhinde na Pakistan.

Gandhi yishwe n’umuhezanguni w’umuhindu muri Mutarama 1948.

Nyuma y’urupfu rwe, umubiri we waratwitswe ariko ntabwo ivu rye ryamenwe mu mazi nkuko biri mu migenzo y’abahindu.

Iryo vu ryarabitswe, rikwirakwizwa mu nzibutso ziri hirya no hino mu gihugu harimo no muri Bapu Bhawan.

Kubera ko Ghandhi yari umuhindu w’umwimemerere, hari abatarifuzaga ko aharanira ubwiyunge n’abayisilamu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza