00:00:00 IGIHE NETWORK KN KINYARWANDA EN ENGLISH FR FRANCAIS

Intangangabo ku Isi zagabanutse ku kigero kirenga 50% - Ubushakashatsi

Yanditswe na Igizeneza Jean Désiré
Kuya 20 Ugushyingo 2022 saa 09:52
Yasuwe :

Abashakashatsi mu by’Ubuzima binyuze mu isesengura bakoze bagaragaje ko mu myaka 50 ishize intangangabo zagabanutse ku kigero kirenga 50% ku batuye Isi, bemeza ko mu gihe iri gabanuka ryakomeza, ubuzima bw’abagabo bwarushaho kujya mu kaga.

Ni isesengura ryasohotse ku itariki ya 15 Ugushyingo 2022, rinyuzwa mu Kinyamakuru cya Kaminuza ya OXFORD, ariko rigibwaho impaka n’inzobere mu by’ubuzima bw’imyororokere.

Iri sesengura ryashingiye ku bushakashatsi bwakozwe mu myaka itandukanye ariko bwose bugaruka kuri iyi ngingo y’uko intangangabo ziri kugabanuka.

Bamwe bavuga ko ibyavuyemo ari byo ndetse biteye inkeke mu gihe abandi bemeza ko hakenewe gukorwa ubushakashatsi bwimbitse kuko ngo uburyo bwakoreshejwe mu kubara intanga buhinduka umunsi ku wundi.

Gusa ababihakana bose ni abatarabigizemo uruhare bakavuga ko ibyarivuyemo bidahagije kuko batagarutse ku mpamvu zose zibitera nk’uko CNN yabyanditse.

Dr Michael Eisenberg wo muri Kaminuza ya Stanford na we utaragize uruhare muri iri sesengura ry’ubushakashatsi, yavuze ko bishoboka ko ubu abagabo bashobora kuba badafite ubuzima buzira umuze nk’uko byahoze, akemeza ko na yo ari imwe mu mpamvu n’ubwo itarebweho.

Dr. Alexander Pastuczak wo muri Kaminuza ya Utah na we yemeje ko hakenewe andi makuru kugira ngo ubu bushakashatsi bwemerwe, kuko uburyo bwo gupima amasohoro y’umugabo buhinduka buri munsi.

Ati "Niba ufashe impagararizi ukazipima mu buryo bwo mu myaka ya 1960, izindi ukazipima ku buryo bugezweho, ibisubizo bizaba bitandukanye, kandi urabona ko uburyo bwo kuzipima bwakoreshejwe butandukanye."

Abakoze isesengura ry’uko intangangabo ziri kugabanuka, bashingiye no ku bushakashatsi bwashyizwe hanze mu 2017 n’Ikinyamakuru ’Human Reproduction Update’ , aho bwarimo amakuru yo ku migabane ya Aziya, Amerika yo Hagati n’iya Ruguru na Afurika.

Iri tsinda ry’abashakashatsi ryanyuze mu bushakashatsi burenga 3000, bushingira ku mibare y’intangangabo zibugaragaramo, ubwinshi bwashyizwe hanze hagati ya 2014 na 2020.

Mu gusesengura, iri tsinda ntiryashyizemo ubwibanze ku bagabo batabyara, ahubwo ryibanze ku bwarimo imibare y’intanga z’abagabo bafite inzima n’ubwagarutse ku bafite ibibazo mu myanya myibarukiro.

Ubugera kuri 38 ni bwo bwahuje n’ibyo iri tsinda ryashakaga, hemezwa ko kuva mu 1973 kugeza mu 2018 hagabanukaga intanga ku kigero cya 1% buri mwaka aho impuzandengo ku Isi, yagaragazaga ko mu 2018 intangangabo zagabanutse ku kigero cya 52%.

Igiteye inkeke ni uko babonye ko biri kwiyongera kuko kuva mu 2020 iri gabanuka riri ku rugero rwa 2.64% ugereranyije na 1.16% uvuye mu 1973 kugeza mu 2018.

Kuva mu 1973 kugera mu 2019 iri sesengura ryagaragaje ko intangangabo zavuye kuri milliyoni 104 zigera kuri miliyoni 49 kuri mililitiro imwe y’amasohoro, gusa umuntu muzima ntagomba kujya munsi ya miliyoni 40 kuri mililitiro imwe y’amasohoro.

Kugeza ubu abashakashatsi nta makuru ahagije bafite ku bihugu byaba bifite imibare myinshi y’iri gabanuka ndetse n’ikibitera ntabwo kivugwaho rumwe. Abahanga bavuga ko hagomba gukorwa ubundi bushakashatsi kugira ngo amakuru yose aboneke.

Dr. Hagai Levine wo muri Kaminuza y’Ubuvuzi ya Braun yemeza ko n’ubwo impamvu itaragaragara, ubuzima abantu babayemo, kudakora imyitozo ngororamubiri, ibiribwa byakozwe n’inganda, ibintu bihungabanya ubuzima bw’umuntu muri rusange byose bigira uruhare mu kwangiriza intanga.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .