00:00:00 IGIHE NETWORK KN KINYARWANDA EN ENGLISH FR FRANCAIS

Inkomoko y’amazina ‘Ku mugore ucana urugo’ no mu ‘Inkononshya’ yiswe uduce two muri Muhanga (Video)

Yanditswe na IGIHE
Kuya 26 April 2022 saa 10:30
Yasuwe :

Mu mazina udusozi cyangwa uduce runaka two hirya no hino mu gihugu dufite uyu munsi usanga harimo afitanye isano n’ibikorwa byahabereye kera bitewe n’igihe ibyo bikorwa byamaze cyangwa ubukana byagize ku b’icyo gihe izina rigahita rifata ubwo.

Niba ukunda gukora ingendo unyuze mu muhanda wa Muhanga-Ngororero, uzi ahantu bita ‘Ku mugore ucana urugo’ cyangwa mu ‘Inkononshya’, uduce twegeranye duherereye mu Murenge wa Muhanga, mu Karere ka Muhanga.

Umugore witiriwe gucana urugo aracyariho ariko kuri ubu ageze mu zabukuru; umugabo we yapfuye mu myaka ya vuba aha. Uyu mukecuru ngo ntajya yishimira iyi mvugo uhereye kera ukageza n’ubu.

Mu kiganiro yagiranye na IGIHE ubwo yamusangaga mu rugo iwe, yasobanuye inkomoko y’iyi mvugo avuga ko ishingiye ku kinyoma cyakwirakwijwe igihe kirekire.

Ati “Ubusanzwe uru rugo rwabagamo inka nyinshi. Aha ureba [ku mbuga] hari hubatse urugo ruzengurutse hakaba urwo inka zararagamo. Abantu banyuraga hano barimo n’abazaga gucumbika barahabonaga.Uko bucyeye n’uko bwije izo nka baziragiraga ku musozi zikagwa mu manga zigenda zishira.”

Uyu mukecuru yakomeje avuga ko rwa rugo rw’inka na rwo rwaje gusenywa kuko byasaga nk’aho umumaro warwo utagihari.

Akomeza ati “Nyuma rero ba Bakiga barahanyuraga bakabona rwa rugo nta rugirahri bati ‘Nimurebe bararucanye, ni umugore warucanye. Bihera aho bigenda bikura na nyirurugo agihari yakumva ababivuga akabirwanya, yababaza uko rwacanywe bamwe bakamwara bakabireka.”

Iyi mvugo ngo yagiye itera ipfunwe abo muri uyu muryango ndetse bikagira ingaruka ku bana ighe baragiye amatungo cyangwa bagiye ku ishuri ndetse nyirubwite ntibyigeze bimushimisha nk’uko yakomeje abisobanura.

Ati “Kumva bavuga ngo ndi umugore ucana urugo birambabaza cyane n’ababivuga tukumva ari abantu babi. Ikimbabaza ni uko twimukira hano hari ishyamba kandi inkwi zari ishyano ryose ku buryo utabura inkwi byatuma ucana urugo. Ni igisebo, birababaza na nyirurugo agihari yarabirwanyaga cyane.”

Uyu mukecuru uri mu kigero cy’imyaka 80 ntiyibuka igihe iyo mvugo yadukiye ariko avuga ko imaze igihe kirekire.

Izina ‘Inkononshya’ ryo ryavuye he?

Uvuye ahiswe ‘Ku mugore ucana urugo’ mu cyerekezo cya Ngororero, ugera mu gasantere gato k’ubucuruzi ahitwa mu ‘Inkononshya’.

Izi zina na ryo ngo ni irya kera nk’uko Gahimanyi Gervais w’imyaka 93, utuye mu Murenge wa Kabacuzi, Akagari ka Ngarama, yabisobanuye.

Ati “Namenye ubwenge bahita mu ‘Inkononshya’ kubera ko ari ho havaga ingwa ababumbyi bakoreshaga mu kuraba [gusiga] inkono nyuma yo kuzotsa. Niho bazaga gukura ingwa yererana basigaga inkono zimaze gutwikwa mbere yo kuzigurisha. Abantu babiheraho bavuga ko ari ‘mu Inkononshya’ kuko byatumaga zisa neza zikiri nshya.”

Agace kacukurwagamo iyo ngwa ni ko kanyujijwemo umuhanda wa Muhanga-Ngororero waje no gushyirwamo kaburimbo ahagana mu 1989.Hari kandi agasantere k’ubucuruzi, Gahimanyi akaba ari umwe mu bagacururijeho.

Urugo rutuyemo umugore witiriwe gucana urugo. Yamagana iyi mvugo akababazwa n'uko yamwitiriwe mu buryo budakwiye
Uyu mukecuru yasobanuye ahaturutse imvugo yamwitiriwe ko acana urugo
Mu Inkononshya ni agace ko mu Murenge wa Muhanga mu Karere ka Muhanga
Izina Inkononshya na ryo rimaze igihe ryitiriwe agace ko mu Karere ka Muhanga
Gahimanyi Gervais asobanura ibyo azi ku mpamvu y'izina 'Inkononshya'

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .