00:00:00 IGIHE NETWORK KN KINYARWANDA EN ENGLISH FR FRANCAIS

Imvo n’imvano ya ‘Tequila’, ikinyobwa gisusurutsa abanyabirori bigatinda

Yanditswe na Muyisenge Jean Felix
Kuya 24 June 2022 saa 04:12
Yasuwe :

Nugerageza kuganira n’abakunda kuruhuka no gusabana basoma ku gasembuye bazakubwira ko ikinyobwa cya Tequila kiri mu byambere ku Isi byishimirwa n’abantu b’ingeri zitandukanye by’umwihariko abifata nk’abasirimu.

Ubuhangange bw’iki kinyobwa ntibuzwi n’abanywa agasembuye gusa kuko ijambo Tequila ushobora kuba wararyumvise mu ndirimbo, filime cyangwa inkuru by’umwihariko izerekeye ibikorwa byo kwishimisha no kurwanya icyaka.

Nyamara hari abantu bake bazi ko Tequila itatangiye imeze uko tuyibona ubu. Ubwoko bwayo bwa mbere bwatangiye kwengwa mu myaka 1000 mbere y’ivuka rya Yesu, icyo gihe yengwaga n’aba-Olmerics baje kuvamo abanye-Mexique tuzi ubu.

Icyo gihe Tequila yari itarahabwa iryo zina kuko yitwaga ‘Pulque’ ikaba yarengwaga mu gihingwa cyitwa ‘Agave’ gifite ibara ry’ubururu. Pulque yanyobwaga n’abifite cyangwa abantu babaga bagiye gutangwamo ibitambo ku bigirwamana.

Mu myaka ya 1500 ubwami bw’abanya- Espagne bwatangiye kwigabiza ibice bya Amerika ari na bwo bageraga muri Mexique.

Nyuma yo gushirirwa n’inzoga zo mu bwoko bwa brandy bari bitwaje bakabura n’uko bazitumiza mu Burayi, Abanya-Espagne babaga muri Mexique batangiye kwifashisha ibi bihingwa bya Agave n’icyondo benga inzoga yitwaga Vino de Mezcal bisobanuye “divayi ya Agave.”

Mu myaka ya 1600 umwe mu bayobozi bakuru wakomokaga muri Espagne, Pedro Sánchez de Tagle yubatse uruganda rwa mbere rwenga inzoga ruherereye mu gace ka Tequila ko muri leta ya Jalisco ari na ho hengerwa inzoga nyinshi za Tequila kugera n’uyu munsi. Birumvikana ko ari na ho iri zina ryaturutse.

Umwami wa Espagne Carlos wa IV yaje guha umuryango wa Jose Cuervo uburenganzira bwo gucuruza iki kinyobwa kugeza ubu sosiyete ya Jose Cuervo ni yo icuruza Tequilla kurusha izindi ku Isi.

Mu gihe umuryango wa Sauza ari wo watangiye gucuruza iki kinyobwa hanze ya Mexique, unaharanira ko Tequila yajya ikorerwa muri Mexique gusa kuko ari ho honyine habarizwaga Agave.

Mu 1974 Leta ya Mexique yatangaje ko izina rya Tequila ari umutungo bwite w’igihugu bityo kugira ngo ikinyobwa cyemererwe kwitwa iryo zina kigomba kuba cyarengewe muri Mexique.

Tequila iri mu bwoko bubiri harimo izigizwe na 100% bya alcool iva muri Agave mu gihe izindi zigizwe na 49% ya alcool ituruka mu isukari y’ibindi bintu bitari Agave.

Hari ibyiciro bya Tequila bitandukanye harimo Blanco zifatwa nka Tequila z’umwimerere, Reposado, Joven, na Añejo ziba zimaze umwaka zitaze na Extra Añejo ibanza kumara imyaka itatu itaze.

Inganda nyinshi zitunganya ibinyobwa byo mu bwoko bwa Tequila harimo zagiye zifungurwa mu bice bya Mexique. Muri izo nganda harimo Teremana Tequila y’icyamamare muri sinema Dwayne Johnson ‘The Rock’, rwashinzwe i Jalisco mu 2020.

Imibare ya Stastica yerekana ko mu mwaka wa 2020 ibinyobwa byo mu bwoko bwa Tequila byacurujwe bifite agaciro ka miliyari 8,2$ mu gihe byitezwe ko kazagera kuri miliyari 18,5$ muri 2028.

Mu mwaka wa 2021 wonyine Mexique yakoze litiro miliyoni 527 za Tequila mu gihe izoherejwe hanze ari miliyoni 339,4.

Tequila zo mu mu cyiciro cya Extra Añejo zibanza gutarwa mu bigega mu gihe cy'imyaka itatu
Tequila Añejo ziba zimaze byibura umwaka mu bigega
Na The Rock ari mu bashinze uruganda rwenga Tequila
Ibihingwa bya Agave ni byo byengwamo inzoga za Tequila

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .