00:00:00 IGIHE NETWORK KN KINYARWANDA EN ENGLISH FR FRANCAIS

Impano za Noheli waha abo ukunda zikabanezeza

Yanditswe na Idukunda Kayihura Emma Sabine
Kuya 25 Ukuboza 2022 saa 12:08
Yasuwe :

Umunsi mukuru wa Noheli, ni umunsi wizihizwa n’abatari bake ku isi. Abawizihiza ni abakirisitu akenshi bajya mu nsengero/kiliziya kwizihiza ivuka rya Yesu/Yezu, bamwe bakanyuzamo bagaha impano abo bakunda banabashimira uko babanye bakanabifuriza impera nziza z’umwaka.

Muri iyi nkuru tugiye kukubwira impano nziza waha uwo ukunda ikamunezeza niba mwembi muwizihiza.

Impano ya Noheli waha ‘maman’ wawe

Ababyeyi muri rusange banezezwa n’impano bahawe n’umwana wabo n’iyo yaba ari nto.

Umubyeyi w’umugore umuhaye impano y’igitenge, ikanzu cyangwa isakoshi ndetse ukanamubwira ko umukunda, arishima cyane akibuka ko ari umubyeyi ndetse akumva koko akunzwe kuko afite umwana umutekerezaho.

Impano ya Noheli waha papa wawe

Abantu batandukanye bumva bigoye guhitamo impano nziza yo guha umuntu w’igitsinagabo cyane cyane ba se. Gusa nabo guhitamo impano zabo ntibigoye.

Banza umenye icyo umubyeyi wawe akunda umenye icyo umuhitiramo. Gusa umuhaye isaha yiyubashye yayikunda ndetse akishima.

Impano ya Noheli waha umukobwa mukundana

Muri rusange abakobwa banezezwa n’utuntu duto wabaha nk’impano iyo ubikoranye urukundo rwinshi.

Umukobwa mukundana umuhaye chocolat cyangwa ‘Parfum’ akunda kwitera ukanamwibutsa ko umukunda, yakwishima cyane kuri uyu munsi.

Impano ya Noheli waha umuhungu mukundana

Hari abibwira ko abahungu nabo kubahitiramo impano bigoye, ariko umuhungu mukundana umuhaye isaha cyangwa ukamugurira imyenda ya siporo nk’impano, biri mu byamushimisha. Igihe ibi utabashije kubibona bikoroheye wamugururira ikofi cyangwa inkweto bitewe n’izo akunda.

Impano ya Noheli waha abana bawe bato

Abana banezezwa n’utuntu duto bahawe n’ababyeyi babo, niyo mpamvu kubahitiramo impano bitagoye.

Abana bakunda ibintu bishya, niyo mpamvu mbere y’umunsi wa Noheli ubaguriye imyenda cyangwa inkweto ukababwira ko ari ibyo kwambara kuri Noheli, barishima cyane ku munsi nyirizina.

Impano ya Noheli waha inshuti yawe magara

Inshuti yawe magara ntabwo inezezwa n’impano uyiha, ahubwo inezezwa n’umwanya uyibonera mu byago cyangwa mu byishimo byayo. Impano iza nk’inyongera.

Mu gihe ku munsi mukuru abantu benshi basangira n’abo mu miryango yabo, utunguye inshuti yawe magara ukajya kuyireba kuri uyu munsi ukayishyira ikintu uzi ikunda kurya cyangwa kunywa, birayinezeza cyane.

Ari umukobwa ukamushyira biscuits zirimo chocolat, arishima cyane. Naho umuhungu uramutse umushyiriye ikintu uzi akunda kunywa na we arishima cyane.

Impano ya Noheli waha uwo mukorana

Mu gihe abantu benshi baba bari kumwe n’imiryango yabo ku munsi mukuru wa Noheli, ntiwakwirengagiza ko hari abantu baba bari mu kazi kuri uwo munsi ntibabone uko bishimana n’imiryango yabo.

Niba wowe n’inshuti yawe kuri uyu munsi mwiriwe mu kazi, igomwe amafaranga make uyijyane ahantu mu masaha y’ikiruhuko musangire.

Yaba wowe cyangwa yo murishima, kuko mwembi muribuka ko n’ubwo bitakunze ko mwishimana n’imiryango wanyu, mwe muri kumwe buri wese atari wenyine kuri uyu munsi mukuru.

Impano ya Noheli waha umuturanyi wawe

Ku munsi mukuru wa Noheli iyo abantu benshi bavuye gusenga, bakomeza ibirori byo kuwizihiza bagategura ibyo kurya n’ibyo kunywa bakunda.

Uyu munsi niba wabashije kubitegura nawe, tumira umuturanyi musangire arabona ko umuzirikana yishime.

Hari ubwo mumara gusangira ibyo wateguye, na we akagutumira mukajya gusangira ibyo yateguye iwe mugakomeza ibyishimo bya Noheli.

Iyi mpano ni nziza ku baturanyi kuko igaragaza ko buri wese azirikana mugenzi we, inakomeza umubano buri wese akazirikana mugenzi we no mu bindi bihe.

Impano ya Noheli waha umugore wawe

Abagore muri rusange bakunda impano bahawe n’abo bashakanye. Niyo mwaba mumaranye imyaka myinshi, iyo umuhaye impano abona ku urwo umukunda rudasaza.

Umugore wawe umuhaye impano y’umwambaro akunda arishima.

Ushobora kumugurira ikanzu akunda, cyangwa undi mwambaro ufite amabara akunda. Arishima cyane akabona ko umuzirikana.

Impano ya Noheli waha umugabo wawe

Umugabo wawe ushobora kumuha impano y’ikintu uzi akunda kurusha ibindi akishima, ariko na none umuguriye ishati nziza ashobora kurimbana agiye ahantu hatandukanye, yakwishima cyane akumva ko umukunda kandi umuzirikana.

Umunsi mukuru wa Noheli ukunze kurangwa no guhana impano hagati y’abagize umuryango

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .