Impamvu abaganga bagira umukono udakunze kuvugwaho rumwe

Yanditswe na Iradukunda Serge
Kuya 30 Kamena 2020 saa 02:04
Yasuwe :
0 0

Abantu benshi bakunze kwibaza impamvu abaganga bakunze kurangwa n’umukono udasomeka kandi bigasa nk’ibintu bahuriyeho, bamwe bakumva ko ari impano bavukana cyangwa babikora kubera impamvu z’akazi.

Uku kwandika umukono udasomeka kw’abaganga byageze aho bifatwa nk’urwenya kugeza aho uwandika nabi wese bamubwira ko yandika nk’abaganga cyangwa umwana ugaragaza umukono mubi mu buto bwe bakamubwira ko azaba umuganga.

Ibi bituma abantu bibaza niba umwana uzaba umuganga avukana kamere yo kwandika umukono udasomeka, niba abyiga amaze gukura cyangwa niba kwandika ibidasomeka byaba ari rimwe mu masomo yigwa n’abaganga wenda ku mpamvu runaka.

Kwandika umukono udasomwa na buri wese si umwihariko wa bamwe mu baganga b’abanyarwanda gusa, ahubwo ni ikibazo gisangiwe n’Isi yose.

Ubushakashatsi bugaragaza ko mu Bwongereza buri mwaka hapfa abagera ku bihumbi 30 bitewe n’amakosa ahanani yaturutse mu myandikire mibi y’abaganga mu gihe muri Leta Zunze Ubumwe za Amerika ho bashobora no kugera ku bihumbi 100.

Ibi birumvikana kuko mu bushakashatsi bwakozwe mu 2017 bwagaragaje ko 82% by’abaforomo aribo bonyine babasha gusoma amabwiriza bahawe n’abaganga b’abadogiteri mu gihe 75% by’abatanga imiti ari bo bonyine babasha gusobanukirwa ibyo umurwayi yandikiwe na muganga.

Umuganga mu bitaro bya Mercy Medical Center, biherereye Baltimore muri Maryland avuga ko akiri muto yandikaga neza gusa nawe aza gutungurwa n’uburyo umukono we wagiye uhinduka amaze kwinjira mu kazi kikiganga.

Yagize ati “Navuye ku kuba umuntu wigeze gutsindira igihembo cy’umuntu ufite umukono mwiza mu mashuri yisumbuye ngera ku kuba umuntu wandika ibintu bidasomeka, ndabizi ko abantu bagorwa no gusoma umukono wanjye”

Umunaniro n’akazi mu bibatera kwandika gutya

Akazi k’ubuganga ni kamwe mu dusaba kwandika cyane kuko icyitanditswe bagifata nk’ikitarabaye, amakuru hafi ya yose y’umurwayi umuganga aba agomba kuyandika kugira ngo azifashishwe mu gihe bibaye ngombwa.

Umuganga mu bitaro bya Genesis Pain Centers, Asher Goldstein, avuga ko uku kwandika byinshi kandi vuba hakiyongera n’umunaniro aribyo bitera abaganga kwisanga batangiye kwandika umukono udasomeka.

Yagize ati “Niba ku munsi umara igihe kiri hagati y’amasaha 10 na 12 wandika, ibiganza byawe bigera aho byumva bitakibishoboye, abaganga benshi umukono wabo uba ugenda urushaho kuba mubi uko amasaha agenda kubera ko imikaya yo mu biganza iba yakoze cyane”

Umubare munini w’abarwayi abaganga bakira nawo ushyirwa mu mpamvu zibatera kwandika umukono udasomeka, cyane ko muganga ashobora kumarana n’umurwayi iminota 15 akamubwira ibibazo by’ubuzima umunani kandi byose akaba arangije kubyandika muri iyi minota kugira ngo yakire n’abandi barwayi.

Indi mpamvu itangwa na Dr. Thum ishobora gutuma abaganga bandika umukono udasomeka ni ubwoko bw’amagambo akunda gukoreshwa muri uyu mwuga.

Dr Thum avuga ko mu kazi k’ubuganga habamo amagambo akenshi usanga afite ingombajwi zisubiramo bigatuma ibanza ayandika neza ikurikiyeho ntiyite ku kuyinonosora ahubwo agasa n’uyiburijemo, cyangwa akayandika mu buryo butagaragara neza kuko atibuka uko yandikwa neza.

N’ubwo abaganga bagira akazi kenshi, basabwa kwigengesera cyane cyane igihe bari kwandika ibintu bishobora kugira ingaruka ku buzima bw’umuntu nko kumwandikira imiti aho ikosa rimwe rishobora guteza ingaruka zikomeye.

Kwandika umukono udasomeka kw'abaganga akenshi babiterwa n'umunaniro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .