Imitako ya Noheli iri mu ishusho y’igitsina cy’umugabo yateye ururondogoro mu Bubiligi (Amafoto)

Yanditswe na IGIHE
Kuya 20 Ugushyingo 2020 saa 01:42
Yasuwe :
0 0

Meya w’Umujyi wa Oudenburg wo mu Bubiligi, Anthony Dumarey, yiseguye ku baturage b’iki gihugu nyuma yo gukwirakwiza imitako ya Noheli iri mu ishusho y’igitsina cy’umugabo, bigateza impagararara.

Iyi mitako mishya iteguza iminsi mikuru ya Noheli yatatswe muri Oudenburg mu Ntara ya Flandre y’Uburengerazuba no mu duce twegereye uyu mujyi.

Abayobozi bashyizeho iyi mitako babanje gutekereza kwifashisha buji ariko baza guhitamo gushyiraho urumuri hejuru y’uruti rwayo rwera ariko ruri mu ibara ry’ubururu.

Abaturage bagikubita amaso iyi mitako bahise bayisanisha n’ishusho y’igitsina cy’umugabo aho kuba isanzwe igenewe ibihe bya Noheli.

Meya Anthony Dumarey yemereye abaturage ko ibyakozwe bitari bigambiriye guteza ikibazo muri rubanda.

Yagize ati “Ntibyari mu bushake bwacu gushyiraho imitako y’amatara ya Noheli yibutsa abantu igitsina gabo.’’

Yavuze ko ikibazo batigeze bakibona kugeza igihe amatara yakijwe, ishusho yindi ikajya yaboneka.

Ati “Nanjye nabibonye ubwo [imitako] yacanwaga. Njye ndabona ku rundi ruhande bisekeje. Tugomba kubikora mu bihe by’umwijima binagoye.’’

Iyi mitako yashushanyijwe n’itsinda rishinzwe ibya Tekiniki mu Mujyi wa Oudenburg ndetse Meya Anthony Dumarey yavuze ko iyo igurwa, igiciro cyayo cyari kwikuba gatatu.

Yakomeje ati “Ubwa mbere nkiyibona ku manywa sinigeze mbyitaho. Ubwo yacanwaga nibwo nahise mbibona. Simbona impamvu yo kuyikuraho cyangwa kuyisimbuza.’’

Meya Anthony Dumarey yavuze ko bikwiye ko ibihe bya Noheli by’uyu mwaka bizaguma mu mitwe ya benshi havugwa imitako yakoreshejwe mu kuyizihiza.

Mu Mujyi wa Oudenburg hatatswe imitako 90 minini ifite ishusho y’igitsina gabo.

Imitako iri mu ishusho y’igitsina gabo yakozwe mu isura y’ifi yasimbutse si ubwa mbere ikoreshejwe kuko muri Nzeri muri Maroc yasenyuwe nyuma y’uko abaturage bagaragaje ko yamamaza filime z’urukozasoni.

Mu myaka yashize kandi hagiye hakwirakwizwa amafoto agaragaza ubwogero bushushe nk’igitsina gabo muri hoteli zitandukanye.

Imitako ya Noheli iri mu ishusho y’igitsina cy’umugabo yateye ururondogoro mu baturage batuye mu Bubiligi
Iyi mitako yashyizwe ahantu hatandukanye
Hari hoteli zubaka ubwogero bwazo mu ishusho y’igitsina cy’umugabo
Muri Maroc, abaturage basenye ishusho yubatswe mu buryo bugaragaza imiterere y'igitsina cy'umugabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .