00:00:00 IGIHE NETWORK KN KINYARWANDA EN ENGLISH FR FRANCAIS

Imibereho y’abatunzwe n’imbabura zicanwa nijoro i Kigali

Yanditswe na Thamimu Hakizimana
Kuya 26 Ugushyingo 2022 saa 02:49
Yasuwe :

Mu Mujyi wa Kigali, ni hamwe mu hatuye abantu b’ingeri zose ndetse babayeho mu buzima butandukanye bitewe n’imirimo ibatunze.

Kuba gutura mu Mujyi wa Kigali, bisaba kugira umurimo umuntu akora kugira ngo abashe kubona ikimutunga atanduranyije, ni kimwe mu bituma benshi bihangira imirimo y’uburyo bunyuranye.

Mu gihe bimenyerewe ko abantu benshi bakora ku manywa nijoro bakaruhuka, mu Mujyi wa Kigali hari abahisemo kujya batanga serivisi z’ibyo kurya nijoro ku manywa bakaba ari bwo baruhuka.

Iyo utembereye mu dusantere twinshi tw’i Mujyi wa Kigali nijoro, ku mihanda uhabona abantu bacanye imbabura bakaranga amafi n’isambaza, batetse capati n’umureti cyangwa aboswa inyama.

Bamwe muri bo babwiye IGIHE ko uyu mwuga ubatunze neza n’imiryango yabo kuko babasha kwikemurira ibibazo bahura nabyo mu buzima bwa buri munsi.

Kubwimana André ,ni umusore utunzwe no guteka capati hafi y’ahitwa kuri 40 i Nyamirambo uvuga ko yahisemo gukora nijoro kuko ari byo bimuha amafaranga kuruta ku manywa.

Yagize ati “ Ntangira saa kumi n’ebyiri kugeza igihe mbonye ko nta mukiliya n’umwe uri buze kubera ko i Nyamirambo abantu barara bagenda; mu mpera z’icyumweru bwo njya kuryama saa yine za mu gitondo nkagaruka nimugoroba.”

Yongeyeho ko mu ijoro rimwe ashobora gukorera amafaranga ari hagati y’ibihumbi 10 cyangwa 15 mu gihe mbere agikora ku manywa yabonaga make kuri ayo.

Kanzayire Hawa ucuruza amafi ku muhanda, na we avuga ko bimutunze ndetse yahisemo kujya akora nijoro kuko ari bwo abona abakiliya.

Ati “ Nijoro nibwo amafaranga aba ahari kuko ari bwo abafite akazi batabashije guhaha kare baba batashye bakagura nk’ako gasamaki kaba gahiye bakajya kugakorera isosi vuba vuba.”

Avuga ko ingorane bakunze guhura na zo ari iz’uko hari igihe babuzwa gucururiza ku muhanda kubera ko bitemewe.

Muhirwa Hamudu, umaze imyaka 20 yotsa inyama n’ijoro ku muhanda, yemeza ko bimutunze ndetse bimaze kumugeza kuri byinshi.

Ati “ Nabitangiye kera ‘brochette’ ikigura 50 iza kugeza ku mafaranga 100 none ubu igeze kuri 500; ubu se wambwira ute ko bitantunze?”

Abandi biganjemo urubyiruko n’abakora imirimo iciriritse, nabo bavuga ko izi mbabura zicanwa nijoro muri Kigali zibafatiye runini.

Uwitwa Habimana Jean Bosco yagize ati “ Bariya bantu baradufasha nkatwe tubaye mu buzima buciriritse kuko nk’iyo utashye watinze uragenda ukigurira udufi tubiri dukaranze ukagenda ugashyira kuri gaz ukarya cyangwa ukigurira uriya mureti ukarya ukaryama ubuzima bugakomeza.”


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .