00:00:00 IGIHE NETWORK KN KINYARWANDA EN ENGLISH FR FRANCAIS

Ifoto y’umunsi: Perezida Kim Jong Un yagaragaye atwaye isanduku y’umusirikare mukuru wapfuye

Yanditswe na IGIHE
Kuya 23 May 2022 saa 05:11
Yasuwe :

Perezida wa Korea ya Ruguru, Kim Jong Un, yagaragaye mu batwaye isanduku irimo umubiri w’umwe mu basirikare bakuru b’iki gihugu, witabye Imana.

Marshal Hyon Chol Hae yapfuye ku wa 19 Gicurasi 2022, ku myaka 87. Yabaye umwe mu bayobozi ba Komite nkuru ya gisirikare, aba minisitiri wungirije ushinzwe ingabo n’umuyobozi w’ishami rishinzwe ibikoresho bya gisirikare.

Kuri iki Cyumweru, Perezida Kim yifatanyije n’abagiye gushyingura uyu mugabo, wafatwaga nk’umwe mu baharuye amayira y’ubutegetsi bwe.

Ni umubano wubatswe na mbere y’uko se wanamubanjirije ku butegetsi, Kim Jong Il, yitaba Imana mu 2011.

Ku wa 15 Mata 2016, Hyon Chol-hae yabaye umuntu wa gatanu mu ngabo za Korea ya Ruguru wahawe ipeti rya Marshal, akaba yari muri babiri barihawe mu myaka 21 ishize.

Korean Central News Agency [KCNA] yasohoye ifoto ya Kim atambaye agapfukamunwa, ari kumwe n’abandi bayobozi bo batwambaye, batwaye isanduku irimo umurambo wa Marshal Hae.

Iki gihugu kimaze igihe gihanganye n’ubwandu bwa COVID-19, bwatumye gishyiraho na gahunda ya guma mu rugo.

Mu mpera z’icyumweru gishize, KCNA yatangaje ko icyorezo noneho kirimo kugenzurwa neza, ndetse ko umubare w’abahitanwa na cyo ukomeje kumanuka.

Iki gihugu gituwe n’abaturage miliyoni 25 ntabwo cyigeze gitanga inkingo za COVID-19, ndetse n’izo cyahawe nk’impano cyarazanze.

Ku wa 12 Gicurasi nibwo cyatangaje ko mu gihugu hageze ubwandu bwa mbere bwa COVID-19.

Kuri uyu wa Mbere Leta ya Pyongyang yatangaje ko mu gihugu hari abantu 167.650 "bafite ikibazo cy’umuriro", bavuye ku 390.000 mu cyumweru cyashize.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .