00:00:00 IGIHE NETWORK KN KINYARWANDA EN ENGLISH FR FRANCAIS

Ubucuruzi bw’intwaro ku isi bwazamutse ku mwaka wa karindwi wikurikiranya

Yanditswe na Zigiranyirazo Bajecteur
Kuya 5 Ukuboza 2022 saa 09:34
Yasuwe :

Raporo ku icuruzwa ry’intwaro igaragaza ko ubu bucuruzi bwazamutseho 1,9% muri uyu mwaka, nubwo intambara u Burusiya bwagabye kuri Ukraine yakomye mu nkokora uruhererekane ruzishamikiyeho ku masoko hirya no hino ku isi.

Amakuru atangwa na Stockholm International Peace Research Institute: SIPRI gikora ubushakashatsi ku guharanira amahoro, avuga ko icuruzwa ry’intwaro n’ibikorwa birebana na serivisi za gisirikare mu bigo 100 bikomeye muri ubu bucuruzi, ryazamutseho 1,9% kuri miliyari 592$ zacurujwe mu mwaka ushize.

Aljazeera itangaza ko muri raporo yasohowe n’icyo kigo kuri uyu wa Mbere, yerekana ko ubu bwiyongere bwazamutse buvuye ku rugero rwa 1,1% mu 2019-2020, ibituma izamuka ry’iri curuzwa rigeze ku mwaka wa karindwi wikurikiranya ryiyongera ku rwego rw’isi.

Umuyobozi wa gahunda ishinzwe ibijyanye n’itunganywa ry’intwaro muri SIPRI, Lucie Béraud-Sudrea, yavuze ko umwaka ushize bari biteze izamuka ryisumbuye ry’icuruzwa ry’intwaro ariko bigakomwa mu nkokora ntibigende uko byari byitezwe.

Yagize ati "Twateganyaga ko iby’icuruzwa ry’intwaro bizazamuka kurushaho muri 2021 iyo hatabaho impamvu zakomye mu nkokora iyoherezwa ryazo."

Ibigo bito n’ibinini bikora ubu bucuruzi byose bihuriza ku kuba byarakozweho umwaka ushize ubucuruzi ntibugere ku rugero rwari rwitezwe, mu gihe ibigo bimwe na bimwe nka Airbus na General Dynamics byatangaje ko byahuye n’ikibazo cy’ibura ry’abakozi.

Itangizwa ry’ibitero by’u Burusiya kuri Ukraine muri Gashyantare na ryo ryabaye imwe mu mbogamizi, kuko nk’ibihugu byo mu burengerazuba bw’isi bivuga ko ibikoresho byifashishwaga mu itunganywa ry’intwaro byinshi byaturukaga mu Burusiya.

Iyi raporo ikomeza ivuga ko ibi bishobora kubangamira cyane u Burayi na Amerika byari biri gukoresha ingufu nyinshi bigamije kuzuza ububiko bwabyo bikanakomeza igisirikare cyabyo, ariko bikaba byarerekeje amaboko yabyo ku gutera ingabo mu bitugu igihugu cya Ukraine, ahamaze koherezwa ibibarirwa muri miliyari z’amadolari ya Amerika.

Byitezwe ko bizanagira ingaruka ku Burusiya buhugiye mu gukora no gukoresha izo ntwaro muri Ukraine, ariko kandi bikanatuma batabona isoko ry’ibikoresho bagurishaga bitewe n’ibihano bafatiwe.

Ibigo byo muri Leta Zunze Ubumwe za Amerika ni byo byiganje ku rutonde rw’ibyasaruye akayabo mu icuruzwa ry’intwaro, aho mu mwaka ushize ibigera kuri 40 byinjije miliyari 299$ nubwo bavuga ko bitazamutse cyane bitewe n’itakazagaciro k’ifaranga ryabayeho, ibiciro bigahindagurika.

Mu 2018 hari hatangajwe ko ibigo bitanu biza ku isonga byacuruje intwaro nyinshi ari ibyo muri Leta Zunze Ubumwe za Amerika, aho ku rutonde hariho Lockheed Martin, Raytheon Technologies, Boeing, Northrop Grumman na General Dynamics.

Hanagaragajwe ko inganda zo mu Bushinwa zasaruye akayabo muri iri curuzwa ry’intwaro, aho izigera ku munani zaho zaje ku rutonde zabashije kwinjiza miliyari 109$.

Iri curuzwa ry’intwaro ryiyongereye ku rugero rwa 6,3% ugereranyije n’umwaka wari wabanje, ndetse enye muri izo nganda ziri mu 10 za mbere zacuruje ku rwego rwo hejuru.

Umushakashatsi Xiao Liang ukorana na SIPRI yavuze ko "habayeho uburyo bwo gukorera hamwe mu nganda z’intwaro mu Bushinwa kuva mu 2010, binatuma u Bushinwa buba igihugu cya mbere gihambaye mu iyubakwa ry’ubwato bw’intambara mu 2021."

Aha hakaba hari ibigo bibiri byihuje bituma bihita bigurisha intwaro zifite agaciro ka miliyari 11,1$.

Uru rutonde runagaragaraho inganda zo muri Korea y’Epfo, aho nk’inganda enye zaho zazamuyeho 3’7% by’intwaro zacuruje mu mwaka wari wabanje zikinjiza miliyari 7,2$.

Izi nganda zirangajwe imbere n’urwa Hanwha Aerospace rwazamuyeho 7,6 % kuri miliyari 2,6$ rwinjije, bikaba byitezwe ko bizakomeza kuzamuka mu buryo bugaragara mu myaka iri imbere nyuma yo gusinyana amasezerano n’imikoranire n’igihugu cya Pologne.

Dassault Aviation Group yo mu Bufaransa na yo ntiyatanzwe imbere kuko yabashije kuzamura ubucuruzi bwayo ku rugero rwa 59%, biyinjiriza miliyari 6,3$ mu 2021 nyuma yo kugurisha indege z’intambara zo mu bwoko bwa Rafale zigera kuri 25.

Ahandi hasigaye hirya no hino mu Burayi ho, ibigo byaho birataka igihombo ku bwo kubura isoko ry’aho kugurisha intwaro by’umwihariko izifashishwa mu rugamba rwo mu kirere.

Icyakora, muri rusange mu bigo 100 byagaragaye ku rutonde, harimo 27 bifite icyicaro mu Burayi aho imibare yerekana ko ubihurije hamwe ubucuruzi bwabyo bwiyongereyeho 4,2% bikinjiza miliyari 123$.

Ibigo bitandatu byo mu Burusiya byo byazamuyeho 0,4% ku bucuruzi bwabyo bw’intwaro bituma byinjiza miliyari 17,8$ ku buryo raporo ivuga ko hajemo icyuho.

SIPRI yashinzwe mu 1989, aho kuri ubu ifite imibare yo kuva mu 2002 yongewemo ibigo byo mu Bushinwa kuva mu 2015. Muri uyu mwaka amakuru agaragaza ko ibigo byigenga bikomeje kugenda bishora imari binagura iby’ubucuruzi bw’intwaro.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .