00:00:00 IGIHE NETWORK KN KINYARWANDA EN ENGLISH FR FRANCAIS

Ibyo wamenya kuri ’Square Kilometre Array, indebakure nini izajya itanga amakuru y’ibibera mu isanzure

Yanditswe na Igizeneza Jean Désiré
Kuya 7 Ukuboza 2022 saa 08:10
Yasuwe :

Nyuma y’imyaka 30 iri mu mishinga, ’Square Kilometre Array ,SKA’, indebakure (radio-telescope) ya mbere mu Isi izifashishwa mu kugenzura ibibera mu isanzure, yatangiye kubakwa kuwa mbere tariki ya 05 Ukuboza 2022.

Ni igikoresho kizafasha mu gukusanya amakuru yose abera mu isanzure harimo no guhindura amajwi atangwa n’imibumbe itandukanye kikayahindura mu buryo bwumvwa kugira ngo zirusheho kumenya byinshi biberayo.

SKA izubakwa mu byiciro, aho icya mbere kizuzura mu 2028 hakoreshejwe miliyari 1.4$ mu gihe ikindi cyiciro cya kabiri kizatwara miliyoni 700$.

Iki gikorwaremezo kizaba gifite ibice bibiri, aho kimwe kizubakwa muri Afurika y’Epfo ikindi mu Burengerazuba bwa Australia.

Kuri uyu wa Mbere tariki 05 Ukuboza 2022 inzobere mu by’isanzure zagiye mu bice by’Amajyaruguru ya Cape Town ndetse no mu Burengerazuba bwa Australia mu gutangiza iyi nkuru.

Umuyobozi muri Afurika y’Epfo ushinzwe ibijyanye n’Iyubakwa ry’iki gikorwaremezo, yatangaje ko imyaka 50 yari ishize bari mu mushinga wo kureba uko cyatangira kubakwa.

Ati "Kuba tubigezeho ni ikintu gishimishije cyane. Ni igikorwa cy’ingenzi kizagira akamaro mu gihe kirambye."

Mu 2012 byemejwe ko SKA izubakwa mu bice bibiri, kimwe muri Afurika y’Epfo ikindi muri Australie, ibi bice bikazitwa SKA-Mid na SKA-Low uko bikurikirana.

SKA-Low izaba ifite antennes ibihumbi 131 aho imwe izajya iba iteretse ku buhagarike bwa metero ebyiri, zikaba zitezweho gukusanya amakuru ku buryo butandukanye kure n’ubwari busanzwe.

Umuyobozi mu Kigo cy’Umuryango w’Ibihugu bikoresha Icyongereza gishinzwe ubushakashatsi, CSIRO muri Australia, Douglas Bock yavuze ko iki ari igikorwaremezo cy’ikinyejana kigiye kubafasha byinshi "cyane ko ibyo tuzi ku isanzure ari nk’agatonyanga mu nyanja."

Igice cya SKA Mid kizubakwa muri Afurika y’Epfo kizaba kigizwe na za antennes z’ibisahani 197 zizaba zubatse ku birometero 150 mu gace ka Karo. Biteganijwe ko enye muri zo zizaba zasojwe mu 2024 n’izindi ikazasozwa mu 2028.

Kugeza mu 2028 SKA izaba yubatse ku buso bwa metero kare ibihumbi 500 ndetse byitezwe ko buziyongera mu gihe ibihugu bitandukanye byashoramo amafaranga cyane ko intego ari ukugeza ku buso bwa metero kare miliyoni.

Kugeza ubu ibihugu biri mu mushinga wo kubaka SKA, harimo Afurika y’Epfo, Australia, u Bwongereza, u Bushinwa, u Butaliyani, u Buholandi, Portugal n’u Busuwisi.

Ibyasabye kwinjira mu mushinga ndetse byasinye amasezerano birimo u Bufaransa, Espagne ndetse n’u Budage.

Byitezwe ko u Buhinde, Canada, Suède, Koreya y’Epfo ndetse n’u Buyapani nabyo byakwijira mu mushinga isaha ku isaha.

Square Kilometre Array yatangiye kubakwa kuri uyu wa Mbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .