00:00:00 IGIHE NETWORK KN KINYARWANDA EN ENGLISH FR FRANCAIS

Ibitabo bitanu wasoma muri iki gihe mu mboni za Bill Gates

Yanditswe na Léana Bisa
Kuya 10 June 2022 saa 12:50
Yasuwe :

Bill Gates uri mu bakire ba mbere ku Isi, aho abarirwa umutungo wa miliyari 128$, ni umwe mu bantu bakunda gusoma ibitabo cyane, ikintu avuga ko cyamufashije mu iterambere yagezeho, aho bivugwa ko nibura asoma ibitabo amasaha ane ku munsi, nubwo agira izindi nshingano nyinshi.

Uyu mugabo yatangaje ibitabo bitanu abona bishobora gufasha uwabisoma, bigaruka ku mihindagurikire y’ikirere, uburinganire, inkuru mpimbano ndetse n’ibivuga kuri siyansi.

Bill Gates avuga ko ibi bitabo bishobora kugora abantu bamwe na bamwe bifuza gusoma ibivuga ku ngingo zoroshye, ariko ko ababyanditse babashije kuganira ku ngingo zikomeye ariko mu buryo busobanutse kandi butera amatsiko.

Yavuze ko yakunze gusoma ibi bitabo kandi ko abazabisoma bazabyishimira.

How the World Really Works cya Vaclav Smil

Umwaka ushize Gates yavuze ko Smil ari umwanditsi akunda cyane. Mu gitabo ‘How the World Really Works,’ Vaclav Smil usanzwe ari umuhanga mu by’ubukungu ndetse n’ibidukikije muri Canada, asobanura ibintu birindwi bizagena imibereho n’ubukungu bw’abantu ku Isi isaba kugira ubumenyi.

Ni igitabo kivuga ku buhinzi, ingufu, umusaruro n’izindi ngingo zitandukanye.

Gates avuga ko abifuza kwiga ku mbaraga zigenga ubuzima bwa muntu, iki gitabo ari intangiriro nziza.

The Lincoln Highway cya Amor Towles

Iki ni igitabo kirimo inkuru mpimbano, Gates yavuze ko ari nziza kandi iryoshye.

Muri iki gitabo, Towles avuga ku nkuru yo mu 1954, ikurikirana ubuzima bwa Emett ubwo yatahaga iwabo i Nebraska muri Amerika, agiye gusanga murumuna we Billy w’imyaka umunani wakoraga imirimo muri gereza y’abana, amazemo amezi 15 kubera kwica umuntu atabigambiriye.

Iyi nkuru ivuga ku buryo aba bombi bifuza gutangirira ubuzima bushya mu kandi gace nyuma y’urupfu rwa se.

Why We’re Polarized cya Ezra Klein

Ni igitabo kigaragaza imiterere ya politiki y’Abanyamerika muri iki gihe. Klein yerekana uburyo mu myaka 50 ishize, amacakubiri ashingiye ku bwoko, uturere ndetse n’ibindi bitekerezo bidashamaje byagize ingaruka kuri politiki ya Amerika.

Igitabo gikubiyemo amakuru asobanura impinduka zabaye muri politiki ya Amerika ndetse n’indi mitekerereze yatumye abantu benshi bagira uruhare mu ntambara zagiye zibaho muri Amerika.

Gates avuga ko iki gitabo gituma umuntu asobanukirwa imiterere ya politiki yo muri Amerika muri iki gihe, bikamuha n’ishusho y’ibiri kuba ku rwego mpuzamahanga.

The Ministry for the Future cya Kim Stanley Robinson

Ni igitabo kirimo inkuru mpimbano ivuga kuri siyansi, inshingano za politiki n’ibitekerezo byo kurinda cyangwa se gukiza ejo hazaza h’abantu.

Mur iki gitabo havugwamo agace ko muri Uttar Pradesh, mu Buhinde, kapfiriyemo abantu miliyoni 20 bishwe n’imihindagurikire y’ikirere, yatumye habaho ubushyuhe bwinshi ndetse n’ubukonje bwinshi.

Gates avuga ko ibyo yasomye muri iki gitabo bitoroshye kandi ko bishobora kwerekana ejo hazaza h’Isi.

The Power cya Naomi Alderman

Gates avuga ko yasomye iki gitabo mu 2016 abisabwe n’umukobwa we, Jenn.

Igitabo ‘Power’ cyanditswe na Naomi Alderman, ni inkuru mpimbano ivuga ku ngaruka zabaye ku Isi bitunguranye igihe abagore bahawe ubushobozi bwo kuvana amashanyarazi mu mibiri yabo uko bashatse.

Iki gitabo gikurikirana abagore bane, buri wese afite inararibonye ku bijyanye n’uburinganire.

Alderman yanditse muri iki gitabo ibishobora kuba mu gihe abagore ari bo bahawe imbaraga n’ubushobozi bwose bwo kugenzura Isi.

Iki gitabo kandi kivuga ku mugabo w’umunyamukuru, Tunde w’umunyeshuri i Lagos muri Nigeria ugerageza kwandika ku mpinduka ziba muri politiki, n’imibereho nyuma y’uko abagore ari bo bagize uruhare runini mu miyoborere y’Isi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .