Ibintu bishobora kwangiza uruhu rwawe utabizi

Yanditswe na Mukahirwa Diane
Kuya 26 Ukuboza 2020 saa 12:47
Yasuwe :
0 0

Uruhu nicyo gihe kigaragara cyane, ndetse ni igice cy’umubiri kidakunze kurwaragurika no kononekara, ariko nanone n’iyo rutitaweho neza, kimwe n’izindi ngingo z’umubiri, uruhu rushobora kugenda rwangirika, rimwe na rimwe bikaba mu gihe kirekire ku buryo iyo bititaweho, bishobora guteza ingaruka zikomeye.

Hari ubwo rero bimwe mu bituma rwangirika, birimo nk’imyitwarire runaka cyangwa amavuta atandukanye, byangiza uruhu rw’umuntu kandi yakekaga ko ibyo arimo gukora nta ngaruka bifite ku ruhu.

Muri iyi nkuru, tugiye kugaruka kuri bimwe mu bintu bishobora gutuma uruhu rwawe rwangirika, kabone n’ubwo waba utabizi.

Gushyira ku ruhu ibintu birimo alcool nyinshi

Mu minsi ishize, hari imiti isukura intoki (hand sanitizer) yagiye ihagarikwa ku masoko atandukanye ishinjwa ko abayikoresheje ibashishura intoki. Ibi bifite ishingiro kuko ‘alcool’ nyinshi mu kintu runaka ishobora kugira uruhare mu iyangirika ry’uruhu.

Ni ngombwa rero kureba ko mu bintu ugiye kugura uzajya ukoresha ku ruhu, birimo amasabune, amavuta ndetse n’ibindi by’imitako ko nta kibazo bishobora guteza ku ruhu rwawe, bitewe na ‘alcool’ nyinshi.

Akenshi usanga ibipimo bya alcool iri mu kintu biba binanditse ku rupapuro rusobanura ibigize igicuruzwa runaka, gusa wenda kuko bishobora kugorana kubisobanukirwa, bitewe n’uko akenshi biba byanditse mu ndimi z’amahanga cyangwa se byandikishijwe ibimenyetso bya gihanga ushobora gusanga bitazwi na benshi, umuntu ashobora kugenekereza ingano ya alcool iri mu kintu runaka binyuze mu kumva nk’uburyo iyo amaze kwisiga nk’amavuta amwokera ku mubiri, cyangwa se akanamubabura.

Igihe ubonye ibimenyetso nk’ibyo, ni ngombwa gusuzuma neza amavuta ukoresha cyangwa ikindi kintu, ukagenzura neza ko kitarimo alcool ishobora kuzagira ingaruka ku ruhu rwawe. Igihe bikomeje ushobora guhindura amavuta, cyangwa se ukagana kwa muganga bagasuzuma icyo kibazo.

Bimwe mu bindi bishobora kukwereka ko amavuta n’isabune ukoresha birimo alcool nyinshi, harimo kugira uruhu rukanyaraye, ruhora rwumye kandi rudafata amavuta.
Mu gihe uruhu rwawe rumeze gutyo, kandi ukabona bimaze igihe kirekire, ni ngombwa gushaka ubufasha bwisumbuye.

Muganga w’isura, Dr. Maryam Zamani, avuga ko gukoresha alcool nyinshi mu bintu bikoreshwa mu isura, bishobora gutuma ikweduka kandi igakanyarara.

Ibigize amavuta akoreshwa mu musatsi

Umusatsi utandukanye n’uruhu rw’umuntu, ku buryo n’ibikoreshwa mu gusukura uruhu bitandukanye n’ibikoreshwa mu gusukura umusatsi.

Ku rundi ruhande, umusatsi uri hafi y’uruhu, kandi ahantu hashobora kwangirika vuba. Hajya habaho rero ko nk’iyo uri gusukura umusatsi, hari amavuta cyangwa amasabune yawugenewe ashobora kugera ku ruhu ruri mu mutwe munsi y’umusatsi kandi ruba rworoshye cyane, bikaruviramo kwangirika.

Hari ubwo kandi ayo mavuta ashobora kugera mu isura, nayo iri hafi y’umusatsi, cyangwa se ku ijosi kandi byose ni ibice by’umubiri byoroshye.

Iri yangirika rishingira akenshi ku kinyabutabire cya ‘Propylene glycol’ kiba mu bikoreshwa mu gusukura imisatsi, kikaba cyangiza umubiri kubi.

Ni ngombwa rero kwigengesera mu gihe uri gusukura umusatsi kugira ngo amavuta yawo atajya ku bindi bice by’umubiri.

Koga amazi ashyushye inshuro nyinshi

Koga amazi ashyushye ni byiza ku mubiri, ariko ni ngombwa kwirinda kubikora kenshi kuko amazi ashyushye atwika uruhu, byakorwa igihe kinini bikangiza uruhu by’igihe kirekire.

Ubwo bushyuhe bukamura amavuta karemano aba ari mu mubiri, bigatuma uruhu rutakaza intungamubiri zarwo, bityo rukaba rwakwibasirwa n’indwara mu buryo bworoshye.

Uruhu rudafite amavuta n’intungamubiri zihagije rurangwa no gushishuka, ari nayo mpamvu abenshi mu bantu boga amazi ashyushye igihe kirekire bakunze no kugira uruhu rushishuka.

Ku bantu basanganywe indwara z’uruhu nka czema, psoriasis na oroseaca, bo babujijwe koga amazi ashyushye igihe cyose.

Kurarana ibirungo by’ubwiza

Umuntu yisiga ibirungo by’ubwiza kugira ngo ase neza, ahanini kuko aba yitabiriye ibirori cyangwa ari bujye guhura n’abandi. Hari ubwo rero uwisize bya birungo agira atya agataha ananiwe, agahita yirambika ku buriri atabanje kubikuraho.

Ibi ntibishobora guhita bigira ingaruka z’ako kanya, ariko iyo bikozwe igihe kinini, bigira ingaruka ku ruhu rwo mu isura bikayangiza.

Uku kwangirika guterwa n’uko iyo wisize ibirungo by’ubwiza, utwenge duto tuba ku ruhu turifunga, bigatuma uruhu rudahumeka neza.

Kunywa ikawa nyinshi

Ubusanzwe ikawa ni nziza ku mubiri, kuko irimo ikinyabutabire cya ‘antioxidants’ gituma umuntu atagira amavunane ndetse ubuzima bwe bukagenda neza.

Gusa kunywa ikawa nyinshi ikabije bishobora gutuma umusembura wa ‘cortisol’ uzamuka, kandi uyu musemburo uzwiho gutera ibiheri binini ku ruhu.

Kugira ngo bijye kugera ku kigero cyo kugutera ibiheri, ni uko uba unywa ikawa nyinshi ikabije, kandi ukabikora igihe kirekire cyane, gusa niba uziko ukunda kunywa ikawa, ukabona unafite ibyo biheri, ni ngombwa kujya gusuzumisha ko nta sano bifitanye, wasanga ihari ukaba wagabanya ikawa ukoresha.

Kudakora imyitozo ngoraramubiri

Gukorara imyitozo ngororamubiri bituma amaraso atembera neza mu bice byose by’umubiri, kandi akagenda ku muvuduko ukwiriye ku buryo bituma uruhu rwawe rudahura ni ibibazo.

Ikindi ni uko gukora sipiro bituma imyanda iri mu mubiri isohoka binyuze mu byuya, bikazibura twa twenge tw’uruhu maze rugahumeka neza. Uko utu twenge tuzibuka, ni nako uruhu rusa neza, rukagaragara rucyeye.

Kunywa isukari nyinshi

Gukoresha isukari nyinshi bigabanya intungamubiri za collagen fibers mu mubiri, izo ntungamubiri nizo zishinzwe kurinda uruhu. Iyo izo ntungamubiri zigabanutse mu mubiri, uruhu ruba rushobora gufatwa n’uburwayi mu bueyo bworoshye.

Kutanywa amazi

Amazi ni ingenzi cyane mu buzima bwa muntu ndetse kuyanywa bireme itandukaniro rinini k’uyakoresha n’utayakoresha. Amazi rero anafasha uruhu koroha no kumera neza, ari yo mpamvu ugomba kuyanywa cyane niba wifuza kugira uruhu rusa neza.

Guhinduranya amavuta yo kwisiga

Amavuta ni meza ku ruhu rwawe, ariko si byiza guhora uhinduranya amavuta kuko bituma uruhu rutagira ayo rumenyera. Ibyo rero bishobora gutuma rwivumbaganya, rukazana ibiheri kuko ibigize amavuta atandukanye bihora birujyaho, bimwe na bimwe ntibirwakire.

Ubundi biba byiza kugana muganga w’uruhu kugira ngo abe ari we ukubwira amavuta akugenewe, ajyanye n’uruhu rwawe. Habaho kandi amavuta atandukanye, ayagenewe gusigwa isura, ahashobora kugera izuba, ahadashobora kugera izuba, ibiganza n’ahandi hatandukanye. Mu gihe ubishoboye, byaba byiza gukoresha ayo mavuta.

Gukoresha amavuta/amasabune igihe kirekire

Hari igihe umuntu akoresha amavuta cyangwa isabune akayimarana igihe kirekire cyane, gusa abaganga b’uruhu bagira abantu inama yo kudakoresha amavuta amaze umwaka urenga atangiye gukoreshwa. Ni byiza gukoresha amavuta amara igihe gito, akazashira ukagura andi mashya, kandi mu gihe ugura amavuta, buri gihe jya ureba igihe azarangiza gukoreshwa, urebe ko uzaba warayamaze bitewe n’uko usanzwe uyakoresha. Amavuta yarengeje igihe ntuzigere uyagura, n’ubwo yaba ari ku giciro gito cyangwa usanzwe uyakoresha, kirazira ntuzayagure.

Kugira uruhu rwiza ni kimwe mu bigaragaza ko ufite ubuzima bwiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .